Trâur nuv mê nhuôk puôs pênhz phax ntơưv tỉnh Quảng Nam

          Tuk nhuôv tuz nênhs Cơ Tu Clâu Ân nhoz xã Tr’hy, huyện Tây Giang, tỉnh Quảng Nam zos njuôs niêv njuôs txir txix thâuv tsênhv zâu. Chuôz zis muôx 3 cưr tix, Ân zos tul nhuôv tiv 2 hâur chuôz zis. Tas nro chuôz zis li xênhz huôx puôr lênhx khov txos lênhx pos tưz muôx 70 shông ntâu cxơưx. Pluôs nox hâur chuôz zis tsuôk zos mor nox đros jâuz đê pêv har jôngr lok, thâuv pos muôx moz gênhs tsi muk uô têz tâu thiêz mak tsi muôx tul tsi chiê nox. Hluz Ân chor pos nhuôk li luz nênhx, jêx jos gra cxur, jâuz tuôx paz. Ân li hâux lưv muk cơưv ntơưr mak ziv phêv liv đuô:

          Shông 2020, Zênhx pênhz phax A Xan uô hâux lưv đros chuôz zis, tiv phaz chiê jênhv Ân uô mê nhuôk puôs. Lok đros têx txir zơưv bộ đội pênhz phax, Clâu Ân tâu bax qơư nhoz đar jông, muôx qơư jâuv chiê cơưv ntơưr muôx cxix cxuô têx chuôz zênhx zuôr trâus chiê cơưv ntơưr thiêz xênhz huôx hâur niêx hnuz… Clâu Ân tâu têx bộ đội pênhz phax hloz, tsoz phưz txix yênhx pluôs nox, pư tsâus jos thiêz kriê cơưv ntơưr. Ân tsênhv cơưv lớp 8 tsêr cơưv mênhx cxưx niêv txir zus mor, tsêr cơưv cxênhx 2 Lý Tự Trọng, Ân heik:

          “Cur chuôz zis luz nênhx lok six txov nhêv, tâu têx txir nzơưv bộ đội jênhv uô mê nhuôv thiêz tsoz phưz cur lok six jông siêz. Têx txir nzơưv cxơưx trâu cur nox, chiê cur muk cơưv ntơưr. Cur uô tsâus txos têx txir nzơưv bộ đội co ntâu hênhr”.

          Tsi sei đrơưv li Clâu Ân, Hốih Đức Hữu mak ho tsi yuô khênhr đros têx mê nhuôk txơưr uô si thav pêv. Hữu chuôz zis cux zos chuôz zis pluôs. Hữu txir tsuv muk liv nyar ntâu shông no. Tas nro têx xênhz huôx hâur chuôz zis zos iz lênhs Hữu niêv cxơưx. Shông 2019, Hữu tâu zênhx pênhz phax A Xan jênhv uô mê nhuôk puôs. Têx hnuz xuz thơưx nhiv kruôr lok nhoz ntơưv Zênhx pênhz phax, Hốih Đức Hữu khênhr trâus moz gênhs thiêz ndo niêv ndo txir khênhr teix muk tsêr. Cán bộ, chiến sĩ Zênhx pênhz phax A Xan thâuv tưs cux tôngv vênhx, paz Hữu shưv jux jus đros luz nênhx yiêz. Lok nhoz no, têx txir nzơưv puôr lênhx seiz 2 tul mê nhuôk co li tuz nhuôk hâur chuôz zis. Clâu Ân thiêz Hốih Đức Hữu li six hơưv xênhz huôx cux uô trơưk ciês li têx txir nzơưv bộ đội nhoz no.

          Zênhx pênhz phax A Xan nhiv no jênhv tsoz phưz 2 lênhx mê nhuôs hâur taz viv thiêz paz txưv 7 lênhx txơưr tsênhv đros chuôz zis nhoz. Thiếu tá Nguyễn Văn Lợi, chính trị viên, Zênhx pênhz phax A Xan, huyện Tây Giang puz pâuz:

          “Đros têx mê nhuôk puôs nhoz hâur zênhx pênhz phax, pêz tsênhv jênhv tsoz phưz 2 lênhx muôx luz nênhx txov nhêv tiv zix, pêz chox lok no tsoz phưz jông thiêz chiê mê nhuôk tâu muk cơưv ntơưr. Chor mê nhuôk cux shưv đros thiêz sir jos cơưv ntơưr hênhr đuô. Txix tsaz yênhx co krêz uô đêz đar, txix thênhv siêz thiêz cán bộ chiến sĩ hâur tas nro quân li phênhv nhiêx txiêx gôngr paz yênhx hli zos 600 cxênhz đeiv iz lênhx mê nhuôk”.

          Têx zênhx pênhz phax sâuv thax tsav tỉnh Quảng Nam tsênhv jênhv tsoz phưz 18 lênhx mê nhuôk lơưr tsaz yênhx “Mê nhuôk puôs pênhz phax”. Têx mê nhuôk no nox nhoz ciês ntơưv zênhx pênhz phax, tâu cxaz chuôz têx huôx tôngv, uô si chiê kriê cxaz pênhr xưv uô nênhx. Zênhx pênhz phax sik côngv jông đros tiv phaz, chuôz zis thiêz tsêr cơưv ntơưr, yax six thôngz xor mông, pâuz tâu yênhx lênhx mê nhuôk li qênhx shênhx cơưv ntơưr.

          Têx taz viv pênhz phax Quảng Nam li tsaz yênhx “Paz mê nhuôk muk cơưv ntơưr” tsênhv paz 164 lênhx mê nhuôk shux xênhz muôx luz nênhx txov nhêv, hâur co muôx 6 lênhx shux xênhz nhoz têz qơưk Lào. Iz lênhx tâu paz 500 cxênhz đeiv iz luz hlik txos thâuv cơưv tiêr cxênhx 3. Trâur nuv “Mê nhuôk puôs pênhz phax” jông li qơư khov txos truôx jông, paz têx mê nhuôk shux xênhz muôx luz nênhx txov nhêv, đros têx cấp, têx nganhx, chính quyênx tiv phaz muôz siêz jênhv pâuz, hlôngr yiêz luz nênhx nox nhoz nhoz thax tsav ntus đriv. Đại tá Hoàng Văn Mẫn, Chính ủy Bộ đội pênhz phax tỉnh Quảng Nam ntâuk grê:

          “No zos iz tsaz yênhx lok six muôx ziz njiêz, chênhr viv li pêz tsênhv phuôx tôngv têx taz viv tror sik côngv đros têx tiv phaz, têx tsêr cơưv seiz car thiêz tror jênhv têx mê nhuôk muôx luz nênhx txov nhêv uô mê nhuôv puôs zênhx pênhz phax. Đhâu co paz têx mê nhuôk tâu cơưv ntơưr, nox nhoz jông đuô, tov kaz muôx tâu luz nênhx jông đuô. Thôngz đhâu tsaz yênhx ziv chuôz cxaz cêr sik côngv siêz hâur cấp ủy zênhx pênhz phax thiêz tiv phaz, tsôngv box ntus đriv thax tsav”

          Têx cán bộ, chiến sĩ pênhz phax li Tsaz yênhx “Mê nhuôv puôs zênhx pênhz phax” thiêz “paz mê nhuôk muk cơưv ntơưr” tsênhz tsênhz zos qơư khov truôx tul trâu mê nhuôk njuôs mênhx cxưx tsơưs nênhs txov nhêv tiv zix nhoz tox siêz. Têx lênhx mê nhuôk co zuôr tâu hloz lox thiêz muôx tâu luz nênhx tov kaz no jông đuô. “Mê nhuôv puôs pênhz phax” zos iz luôs hâux lưv uô paz ziv chuôz cxaz cêr sik côngv siêz hâur bộ đội pênhz phax thiêz tsôngv box nhoz ntus đriv./.

(VOV4-Txâur Vax cxeik nhênhv)