Sik côngv têk huôv tsar uô nox nhoz thax tsav chos jâuz, tu zus caz chaz xor ntơưv Yên Bái

Tas nro xã Báo Đáp, huỵên Trấn Yên (Yên Bái) muôx 300 ntâu chuôz zis chos jâuz tu zus caz chaz xor, xav hur si muôx 135 ha ntâu, phênhv ntâu nhoz chor jok Đồng Sâm, Đồng Danh, Đồng Ghềnh, Đồng Bưởi. Xã cux tưz yênhx lix tâu 5 HTX, 25 tổ tác sik đros huôv tsar uô nox. Shông 2022, tsôngv pêx xênhv hâur xã tu zus ntâu têx caz chaz xor, chor lưk caz xar muôx 300 tênhr, gra lok phênhv sâu tâu 25 tyv đeiv. Têx jâuz, caz chaz xor yênhx tsoz chos, tsiêx tu zus chênhr nhoz no. Tix lâus Nguyễn Văn Tư nhoz jok Đình Xây, xã Báo Đáp heik pâuz:

“Txix thâuv hlôngr chos têx jâuz tu zus caz chaz xor, kinh tế tưz truôx tuk lơưv, chor caz zus iz shông cux tâu ntâu đuô pir li lưv zav tsoz chos txơưr đuô lok six ntâu”.

Cux zos chuôz zis muôx phênhv sâu tâu ntâu txix chos jâuz, tu zus caz chaz xor, xav kror đruôz đraz iz jiês niêv lâul Nguyễn Thị Hải nhoz jok Đồng Xây, xã Báo Đáp chuôz zis khơưk sâu tâu txix 250-300 cir lưk caz. Niêv lâul Hải heik pâuz, chuôz zis tưz sir jos uô lơưr têx tsưr ziv kriê lok sâuv tu zus, viv li uô tâu trơưk siêz xar, uô tâu bâuv li chas HTX sâu zuôr tas hur si.

“Zos six uô tâu jông li nhiv no, mak chos jâuz tu zus caz chaz xor zuôr tâu đuô pir li chos blêx thiêz ntâu zav tsoz chos txơưr đuô”.

Zơưv Trần Đức Tiến, Chủ tịch Ủy ban Báo Đáp, huyện Trấn Yên heik pâuz: Chiê krêz đar thiêz huôv tsar uô tâu jông đuô luôs hâux lưv no, hâur ntu đhâu, xã tưz sir jos chox kriê, phênhz côngz canr bôv muk kriê pêx xênhv uô trơưk tsưr ziv uô nox yiêz, vênhv tôngv tsôngv box chos têx jâuz caz tsi zôngv yuôx tsuôs; muôz meir lêix cov ar têz nxênhr, nthuô đoz đrox đu lus, tsi chiê liêx têz phaz…..

Iz chas ntơư, cxuô thax tsav qơư nhoz Trấn Yên cux tror yax mông, kriê yênhx lix têx HTX, Tổ hợp tác chos jâuz tu zus caz xor. Co chênhr zos têx qơư paz pêx xênhv tsiv uô, doanh nghiệp sâu zuôr xiv huv. Zơưv Đặng Quốc Vương, canr bôv seiz car kinh tế xã Báo Đáp, huyện Trấn Yên heik pâuz:

“HTX hux jos đros công ty jâuz caz chiê sâu zuôr têx chuôz zis pêx xênhv chor lưk caz, no zos gri truôx tuk đuô thâuv ntêx pir li chor tuz luôv lơưr sâu zuôr”.

Chiê paz sâu zuôr pêx xênhv hâur huyện têx lưk caz, nhiv kruôr đhâu, Dưv anr tsêr meir tu zus caz chaz xor ntơưv xã Báo Đáp, huyện Trấn Yên tưz tâu cxiv uô, tas muôx 02 ha ar têz, xav hur si têx nhiêx txiêx yưv uô zos 50 tyv đeiv. Tsêr meir zos Công ty tu zus caz chaz xor Yên Bái seiz car, txos nhiv no phênhv ntâu tưz uô tiêr 02 qơư zus caz thiêz qir uô hâux lưv, iz shông zuôr tsiv uô tâu 150 tênhr xor, bâuv li 1.100 tênhr lưk caz. Đhâu thâuv tsiv uô, têx xor caz zuôr tâu muôs trâu ciêz đrôngs Ấn Độ, Nhật Bản thiêz chor têz qơưk Liên minh châu Âu. Zơưv Đinh Xuân Trường, Giám đốc Công ty tu zus caz chaz xor Yên Bái heik pâuz: Đros thiêz tsêr meir lox đar li no, muôx têx zuôr sâu zuôr tas nro chor chuôz zis tu zus caz hâur thax tsav huyện Trấn Yên li têx lưk caz thôngz đhâu cir hux thôngx đros chor HTX thiêz tuz luôv, gri truôx tuk txix 170-180 cxênhz đeiv iz cir.

“Lok sâuv sik hux jos mak công ty tưz cir hux thôngx đros sâu zuôr 8 HTX hâur thax tsav huyện li têx xiv huv, chos luk zuôr sâu zuôr tas nro pêx xênhv têx lưk caz tưz uô tâu. Chiê taz por muôx txâuk lưk caz trâu tsêr meir, Công ty luôs hâux lưv sâu zuôr têx lưk caz zos sâu zuôr đhâu HTX thiêz đhâu têx tuz luôv taz sik công ty tsưr ziv zos, sir jos sâu zuôr têx HTX li xiv huv ntâu đuô chiê taz por trâu chor nênhs uô hâux lưv hâur HTX muôx phênhv sâu tâu truôx tuk”.

Nhiv no thax tsav chos jâuz caz hâur huyện Trấn Yên đar muôx 300 ntâu ha, 1.500 chuôz zis pêx xênhv đros uô. Txix têx luôs hâux lưv uô tâu trơưk tsưr ziv, siêz xar, shông 2023 no, huyện tror yax kriê, vênhv tôngv pêx xênhv huôv tsar, krêz đar liêx têz; muôz têx zuz jâuz caz jông thiêz yiêz, tsơưr lươngv siêz lok tsêz chos….. Txix ntơư, gra siêz tsiv gri, muôx phênhv sâu tâu ntâu. Tas nro huyện sir jos chos yiêz 102 ha jâuz caz, têx lưk caz sâu cov tâu 1.400 tênhr./.

(Đinh Tuấn-Riê Lâux xceik, nhênhv)