Tsôngv pêx xênhv Lào Cai tu zus tsiêx cxu truôx tuk

Muôs tas fâuv keiz lox hâur têx hnuz tsiêz têz qơưs, zơưv Phạm Văn Hưng, xã Thống Nhất, TP Lào Cai tưz chiê têx qơư tu zus keiz nưk nhoz nưk li ntơư lơưr heik kriê, qêz suô, tsuôs yuô tuô lov caz moz ơưk iz ndis qơư tu zus uô ntêx thâuv zuôr qir tror zus fâuv yiêz. 2 cxênhz tus nhuôv keiz cux tâu chuôz zis zuôr lok zus thiêz cxax yuôx vắc xin phax phôngz moz ơưk trơưk li heik kriê. Tsênhv thâuv gri têx krâur tu zus tsiêx cxu tsi so tsar ndê siêz, mak cux phax tir their jông moz ơưk, txo grêk tsơưs têx keiz ok trâul tuôs zos kror jông đuô hur si chiê zus tâu trơưk tsưr ziv, sâu tâu liv:“Zuk tsuv phax tir thêir moz ơưk ciês thâuv xuz thơưx, txơưv chor keiz ok co tưz tâu cxax yuôx phax phôngz moz thâuv nhiv kruôr đâus tâu iz hnuz ntơư. Txuôk lơưr co zos pêz tsuv phax phôngz moz ơưk trơưk li cui tinhv cxax yuôx vắc xin zos 8 jiês thiêz muôz yuôx trâu keiz ok hâuk, tsuôs yuôx tuô lov caz moz, muôz hmôngr jêz siz fmông cxix cxuô phax tir their tsi chiê cik tâu moz ơưk saz đrâuv lok hâur qơư tu zus”.

Thâuv zuôr fâuv buô yiêz lok zus, niêv lâul Lò Thị Chẩu, nhoz xã Phú Nhuận, huyện Bảo Thắng, tỉnh Lào Cai tưz muk txos ntuô têx qơư tu zus ntâu buô chiê xeir nôngz. Chênhr zos li heik co, niêv lâul Chẩu tưz zok nriêr zuôr tâu 35 tus nôngz buô lok zus đros thiêz muôx cxix cxuô têx ntâuz ntơưr trơưk cui tinhv. Iz tus buô nôngz li heik sâuv, niêv lâul zuôr tas 1 tsov 300 cxênhz đeiv, viv li tsuv tiz jông tu cov têx buô hloz lox trơưk siêz xar:“Gri têx buô nôngz shông no cux truôx tuk xưz, cur cux tsuv xeir têx tus jông gâux, lox siz luôs chiê tu cov hloz lox. Zos gri buô kênhx tâu 58-60 lok sik 65 mak cux muôx phênhv sâu truôx tuk lơưv”.

Chiê taz por tsôngv pêx xênhv tu zus fâuv yiêz tâu trơưk li tsưr ziv xar, hâu nov cxuô thax tsav qơư thiêz ngênhx kôngz nuv Lào Cai tưz sir jos heik kriê tsôngv pêx xênhv cov taz por truôx tuk, txix xeir zuôr nôngz tsiêx cxu zus txos trâu tsuôs yuôx tuô lov caz moz ơưk iz ndis qơư tu zus. Nhiv no tsênhv yuôr ntâu phiv liv hâur tu zus viv li têx chuôz zis tsuv tu zus truôx tuk sinh học, uô trơưk luôs lưv tus, luôs 2 chas thax tsav têx tsưr ziv uô nox chiê huôv tsar tu zus huv đros. Zơưv Trần Trung Thành, Phưv Chủ tịch Ủy ban huyện Bảo Thắng, tỉnh Lào Cai heik pâuz:“Nhiv no tsôngv box tu zus lơưr tsưr ziv sinh học thiêz truôx tuk, huôv tsar zus ntâu trơưk yênhx chuôz zis, tsi lav tâuk lav zus tsơưs lok sik siz zâuv tu zus ntâu zuôr uô têx buô sênhv, tsi muôx nênhs zuôr txos…..  Têx tsi jông zôngx ziv njiz trâul, pêz cux tsuv qênhz shuôs thiêz heik kriê tsôngv box chiê lơưr huôv tsar tu zus truôx tuk, trơưk tsưr ziv”.

Uô ndar txos trâu huôv tsar uô tâu truôx thiêz ntêr, cxuô thax tsav qơư nhoz Lào Cai tsênhv cxơưz tiês huôv tsar tu zus tsiêx cxu trơưk têx tsưr ziv yiêz, vênhv tôngv têx chuôz zis huôv tsar uô nox, chuôz zis tu zus tsơưs ntơư đros cxaz chuôz sik côngv têk uô chiê muôx qơư yưv pênhr, qơư sâu zuôr truôx têx tsiêx cxu, xiv huv uô tâu./.

                                                 (CTV-VOVTB-Riê Lâux cxeik)