Sóc Trăng: Paz hlôngr yiêz hâux lưv uô, paz tsôngv box mênhx cxưx Khmer huôv tsar

uô nox

           Pos Trần Thị Rảnh chuôz zis nhoz xã Long Phú, huyện Long Phú zos ziv chuôz zis pluôs, tsi muôx ar uô kôngz, tsi taz li ntơư, pos tsênhv muôx iz tul mê nhuôv nxeik trâus sêv khiz luz chêr viv li luz nênhx lok six txov nhêv. Jênhv pov pos Rảng li têx phêv liv co, Chính quyênx tiv phaz tưz paz 10 tsov đeiv yưv pênhr paz hlôngr yiêz hâux lưv uô, nhoz hâur dự án số 1 lok car chêx qênhx shênhx muôx tsi txâuk ar nhoz, ar uô kôngz, đêx xênhz huôx nhoz tsaz yênhx têz qơưk li qơư tsov txos lok huôv tsar KTXH thax tsav tsôngv box mênhx cxưx tsơưs nênhs thiêz tox siêz, ntu 2021-2030, ntu 1. Pos Rảnh xeir zuôr iz luz yêz tuôv tênhv chiê muk lok muôv muôs vé số hâur niêx hnuz. Cux khov co, paz pos muk muôs tâu đêz đuô, tsi khưr thiêz muôx ntâu six hơưv chiê tsoz phưz chuôz zis đuô. Pos Trần Thị Rảnh pheiz kênh:

          “Txix thâuv têz qơưk paz luz yêz tuôv tênhv, cur muk muôs vé số cux zôngx ziv đuô. Txix thâuv muôx yêz, cur sâu liv tâu txix muôs vé 100-200 cxênhz đeiv, luz nênhx cux jông đuô thâuv ntêx”.

          Yuôr đros chuôz zis zơưv Sơn Cường nhoz xã Thanh Quới, huyện Mỹ Xuyên tâu chính quyênx tiv phaz paz 10 tsov đeiv txix pênhr tsaz yênhx têz qơưk li qơư tsov txos lok huôv tsar KTXH thax tsav tsôngv box mênhx cxưx tsơưs nênhs thiêz tox siêz. Tix lâuk tưz tsês chor nhiêx txiêx co chiê zuôr meir thâux đrox trâu nhux nox:

          “Chuôz zis uô tsâus têz qơưk lok six ntâu hâur paz hlôngr yiêz hâux lưv uô, cur zuôr tâu meir paz thâux tâux trâu nhux nox, nhiv no zus iz tul, tov kaz no zuôr sir jos tu zuk cxaz thiêz”.

          Zơưv Nguyễn Minh Trí, Phưv chủ tịch UB huyện Mỹ Xuyên, tỉnh Sóc Trăng puz pâuz cxaz, xav txos nhiv no, huyện tưz paz zuôr xar 50 ziv chuôzz is zos tsôngv box mênhx cxưx Khmer, phênhv ntâu tsi muôx ar chiê tsêz chos, gôngr phênhv paz pox nhuôk muôx cxaz tsưr ziv huôv tsar uô nox, chuôz cxaz phênhv sâu trâu chuôz zis:

          “Hâur tsaz yênhx têz qơưk li qơư tsov txos lok huôv tsar KTXH nhoz thax tsav tsôngv box mênhx cxưx tsơưs nênhs mak đros dự án paz txưv tsưr ziv huôv tsar uô nox trâu tsôngv box, huyện Mỹ Xuyên tưz paz tâu 49 ziv chuôz zis hlôngr hâux lưv uô cux xưk li huôv tsar uô nox hâur ntu đhâu. Seiz cxuô đros dự án no, pox nhuôk mênhx cxưx tsơưs nênhs, tiv zix zos nhoz thax tsav txov nhêv tưz muôx tâu luz nênhx ngaz tul, pox nhuôk muôx hâux lưv uô, chuoz cxaz phênhv sâu trâu chuôz zis”.

          Shông 2021, thủ tướng chính phuv tso tơưv Cuiz tênhv số 1719 lok thôngz đhâu tsaz yênhx têz qơưk li qơư tsov txos lok huôv tsar KTXH thax tsav tsôngv box mênhx cxưx tsơưs nênhs thiêz tox siêz ntu 2021-2030, ntu 1 txix shông 2021-2025. Tsaz yênhx muôx 10 dự án. Đros dự án 1 zos car chêx qênhx shênhx muôx tsi txâuk ar nhoz, ar uô kôngz, đêx xênhz huôx, hâur co muôx tsưr ziv chuôz tsar paz hâux lưv uô, paz hlôngr yiêz hâux lưv uô huv đros tsôngv box mênhx cxưx li zoz qơưx, têx muôx ntơưv qơư.

          Lơưr Ban mênhx cxưx tỉnh Sóc Trăng, hâux lưv paz tsưr ziv huôv tsar uô nox, hlôngr yiêz hâux lưv uô trâu pox nhuôk têx shôngk jê ntơưv no tâu tỉnh tsov cưv uô trơưk lênhx nênhs, lơưr cui tênhv. Xav txix shông 2021 txos nhiv no, tỉnh tưz thiêz tsênhv krêz uô hâux lưv paz hlôngr hâux lưv uô trâu 4 cxênhz 500 ziv chuôz zis, chor nhiêx txiêx zos 45 tỷ đeiv ntâu. Zơưv Lý Rotha, Tsar ban mênhx cxưx tỉnh Sóc Trăng puz pâuz:

          “Seiz cxuô tsôngv box mênhx cxưx tsơưs nênhv thâuv tâu dự án paz lok six jông siêz thiêz uô tsâus Đangv, têz qơưk tưz tsov cưv txos. Thôngx cxix, tsôngv box mênhx cxưx sir zôngv phênhv pênhr co muôx chêx cuk, qir paz chuôz zis muôx phênhv sâu ngaz tul”.

          Đros hâux lưv paz hlôngr yiêz hâux lưv uô trâu tsôngv box mênhx cxưx tsơưs nênhs, ntâu chuôz zis tsôngv box mênhx cxưx Khmer nhoz tỉnh Sóc Trăng nhiv no tưz muôx luz nênhx ngaz tul; paz chuôz zis chuôz cxaz phênhv sâu, sir jos hla đhâu cêr pluôk, hlôngr yiêz luz nênhx. Đros Đảng, têz qơưk thiêz tiv phaz li têx tsaz yênhx, chính sách mênhx cxưx, dự án txơưr chor ziv chuôz zis tsôngv box mênhx cxưx Khmer hâur tỉnh txu grês hâur yênhx shông 3% ntâu. Tỉnh Sóc Trăng cux sir jos, txos kaz shông no, chor ziv chuôz zis pluôk hâur tas nro tỉnh zuôr txu grês yuôr tsi nto 8 cxênhz 500 ziv. Jêx jos, thax tsav tsôngv box mênhx cxưx tsơưs nênhs tỉnh Sóc Trăng muôx ntâu hlôngr yiêz jông./.

          (VOV4-Txâur Vax cxeik nhênhv)

Moz siêz txos pluôk nox hâur tsêr cơưv niêv txir zus mor trâu shux xênhz tox siêz Sơn La

Thâuv chor nhuôs cơưv so ntơưr zar tas cik cux chênhr zos thâuv tưz bax uô tâu tiêr pluôk su trâu zuôr xar 300 lênhx shux xênhz nhoz tsêr cơưv ntơưr niêv txir zus mor cxênhx nhuôs zâu Sao Mai, xã Tông Cọ, huyện Thuận Châu, tỉnh Sơn La.

Niêv lâul Lò Thị Linh, uô jâuz mor nox trâu shux xênhz hâur tsêr cơưv heik pâuz, tas nro têx lênhx uô jâuz mor nox trâu shux xênhz nhoz no puôr lênhx tâu cơưv đhâu têx lớp kriê tsưr ziv uô jâuz mor nox, viv li lênhx tưs cux pâuz uô thiêz pâuz tsênhz têx zuôr trâul txos thâuv uô jâuz mor trâu shux xênhz nox.

“Niêx hnuz pêz khênhr xeir têx zav nox hur thiêz nhôngk, jâuz txir ntông jông, truôx tuk lol uô trâu chor nhuôs nox. Lok sâuv tsôngk tril yo mak puôr lênhx hnar têx tsôngk yo uô jâuz mor jông iz zav hur si, muôx lôngx têk, ntông fuôv....., tas nro sơưr đơưk puôr lênhx uô hâux lưv viv truôx tuk zav nox, paz têx nhuôs muôx pluôk nox kaz thiêz tsơưr lươngv”.

Cưk kriê Trần Thị Thu, thơưx seiz car tsêr cơưv heik, đros trâu taz por têx côngz trênhx, qơư uô jâuz mor nox thiêz lênhx nênhs txơưx uô jâuz mor kaz, uô lơưr ntâuz ntơưr tưz cir chos luk đros têx taz viv côngz zav nox, phênhz têx pluôk nox trâu shux xênhz taz por muôx cxix cxuô jâuz mor thâuv tưs cux tâu tsêr cơưv moz siêz txos, tsưr ziv zos paz têx nhuôs muôx txâuk đas jos cơưv txux thiêz uô têx nuv uz no.

“Tsêr cơưv tsưr tsix uô jông têx pluôk nox trâu shux xênhz hâur tsêr cơưv, cxiv uô, phênhz têx zav nox hâur niêx hnuz, hâur ciêz cov huv đros chiê chor nhuôs nox cxix cxuô têx jâuz mor, cxiz nhuôs nox kaz lo, muôx đas jos. Hâur luôs hâux lưv vêv xênhz truôx tuk zav nox, tsêr cơưv cux xeir tsov têx qơư côngz zav nox txâuk njênhs, muôx suôz bê chiê cir ntơưr, chos luk uô jông, truôx tuk zav nox”.

Yuôr ntơưv tsêr cơưv cxênhx iz thiêz cxênhx 2 Hoàng Văn Thụ, xã Chiềng Mung, huyện Mai Sơn, canr bôv, cưk kriê ntơưr tsi so hux jos đros shux xênhz niêv txir seiz kaz tsơưr lươngv têx pluôk nox, zav nox zuôr saz đrâuv lok.....uô trâu shux xênhz nox, chiê taz por shux xênhz têx pluôk nox muôx cxix cxuô jâuz mor thiêz truôx tuk. Cưk kriê Trần Thị Nga, thơưx seiz car tsêr cơưv heik pâuz:

“Shông no tsêr cơưv cux tưz đas cir đros qơư uô têx jâuz mor nox trâu shux xênhz chiê taz por tsơưr lươngv, muôx qênhz yuôx shuôs têx qơư uô jâuz mor co hur si. Shông no tsêr cơưv muôx 100 ntâu lênhx shux xênhz đas cir nox nhoz hâur tsêr cơưv niêv txir zus mor, phênhv ntâu shux xênhz li niêv txir cux lok six jông siêz, thôngx ziv đros”.

Tas nro huyện Mai Sơn xav hur si muôx 17.400 ntâu lênhx shux xênhz nox mor hâur tsêr cơưv niêv txir zus mor nhoz 40 luz tsêr cơưv. Zơưv Nguyễn Vinh Hà, Phưv tsar phongx zoz zux huyện heik pâuz, phongx tsi so chox kriê têx tsêr cơưv uô jâuz mor trâu shux xênhz nox hâur tsêr cơưv tsuv taz por têx jâuz mor cxix cxuô, huv đros thiêz truôx tuk zav nox; qênhz shuôs jông qơư tsiv uô, cux li hâux lưv uô jâuz mor, fax thâux têx jâuz mor......

“Pêz heik têx tsêr cơưv uô jâuz mor trâu shux xênhz nox hâur tsêr cơưv qênhz shuôs têx côngz trênhx, chuôz zênhx phưx vưv uô jâuz mor nox trâu shux xênhz, muôx tsưr ziv cxiv kho chiê taz por  truôx tuk. Tsưr tsix nriêr pâuz lok truôx tuk zav nox trâu shux xênhz đhâu cơưv cxaz nzir, muôz têx tsênhv njiêz truôx tuk lol zav nox thiêz kriê txux chi uô uô cê huv đros”.

Shông cơưv no, tas nro tỉnh Sơn La muôx 400 ntâu luz tsêr cơưv tsưr tsix uô jâuz mor trâu nhos 126 cxênhz lênhx shux xênhz nox hâur tsêr cơưv, phênhv ntâu zos nhoz tox siêz đêz đrôngs, thax tsav txov nhêv./.

Lê Hạnh-Riê Lâux cxeik, nhênhv