Khưx phưx, uô đuô luôs hâux lưv chos jâuz caz nhoz Lào Cai-paz ntâu chuôz zis txov nhêv hla đhâu cêr pluôs, huôv tsar uô bluô nux

Chos 3 ha têz jâuz caz, 15 hnuz muôx iz fâuv 10 tơưz lưk caz, iz fâuv ntơư zơưv Nguyễn Ngọc Khoa nhoz jok Bảo Ân, xã Kim Sơn, huyện Bảo Yên, tỉnh Lào Cai sâu tâu tsơưs tsơưs 15 tsov đeiv, thâuv ntu kaz shông mak muôx têx ndê txos 20 tsov đeiv, taz sik nhiêx txiêx zuôr nôngz caz chaz xor thiêz ntiêr nênhs đros uô tsuôk tas muôx 3 tsov đeiv xưz:“Pir li uô poz cưk mak tâu ntâu đuô, bâuv li no liêx têz zos chos poz cưk tâu txix 3-4 tênhr, muôs 6 cxênhz txos 7 cxênhz đeiv iz cir, sâu tâu lok 20 tsov đeiv ntâu, cux bâuv li iz fâuv caz”.

Zơưv Nguyễn Ngọc Khoa zos iz hâur chor chuôz zis pêx xênhv nhoz Bảo Yên uô ntêx nyuôs tror huôv tsar chos jâuz, tu zus têx caz chaz xor đhâu moz Covid-19 huôv xênhz. Thâuv ntêx, tiv moz huôv xênhz phiv liv uô têx caz, lưk caz muôs tsi tâu gri, tas nro thax tsav chos 250 ha jâuz caz hâur huyện đhâu ntâu shông huôv tsar uô tsi tâu, muôz ntor luôx por tsês tas ntâu. Đhâu iz shông ntâu lok no, tror truôx tuk tsi muôx moz huôv xênhz, iz cxiê chuôz zis pêx xênhv tror huôv tsar uô luôs hâux lưv heik sâuv, chos đuô thiêz tu têx liêx têz jâuz caz, nhiv no tưz muôx nhos 30 ntâu ha, phênhv ntâu nhoz chor xã Cam Cọn, Bảo Hà, Kim Sơn, Việt Tiến, Nghĩa Đô. Pir li thâuv ntêx, mak muôx qơư sâu zuôr truôx tuk đuô, iz chas muôs trâu tỉnh Yên Bái tsêr meir tu zus caz 2,5 tênhr lưk caz iz hnuz, tsôngv pêx xênhv têx lưk caz tsênhv tâu HTX Nấm Tam Đảo sâu zuôr muk chos ndêz Đông trùng hạ thảo. Njuôk xav, txix hâur shôngk shông txos nhiv no, xav kror đruôz đraz txix chos jâuz, tu zus caz chaz xor nhoz Bảo Yên tax zuôr xar 150 tsov đeiv iz ha, đhâu yưx tas têx nhiêx zuôr nôngz caz, ntiêr nênhs đros tu hur si cux tâu muôx 70 tsov đeiv nhiêx nju. Zơưv Nguyễn Quốc Huy, Giám đốc HTX Nấm Tam Đảo heik, têx chuôz zis đros huôv tsar chos thiêz tu têx caz chaz xor puôr lênhx tâu chos luk sâu zuôr hur si têx lưk caz gri truôx tuk txix 120 cxênhz đeiv iz cir, fênhx zis yax cux zuôr txix 80 cxênhz đeiv iz cir. Tsi tiêk tso siêz muôx qơư muôs truôx tuk, tsôngv box tsênhv tâu buôk ti txos chor nôngz caz jông thiêz pâuz tsưr ziv tu zus lơưr cui tinhv:“Pêz tưz cxiv tsa tsưr ziv kriê tsôngv box lok six tsênhz têx tsưr ziv tu zus caz chiê sơưr đơưk uô trơưk, hu zâuv luôs lưv tus đros huôv tsar uô chiê pêz zôngx ziv seiz car thiêx tu tâu têx caz vav, hloz lox jông, muôs tâu gri”.

Trơưk li pos Nhữ Thị Tâm, Phưv Tsar phongx Kôngz nuv thiêz huôv tsar tox siêz huyện Bảo Yên, tỉnh Lào Cai, huôv tsar uô tâu mak lok six jông, hâur thax tsav muôx têx cxiv uô tâu yênhx qơư chos ntâu têx jâuz caz, tu zus caz chaz xor truôx tuk. Chênhr viv li, hâur thax tsav qơư cux xav tinhv jâuz caz zos iz zav tsoz chos chênhr, sir jos txos tas hông 2025 khưx phưx đuô hur si têx liêx têz chos jâuz caz xưk li thâuv ntu tsi tâu muôx moz Covid-19 huôv xênhz, txos tas shông 2030 tsar ndê têx têz chos jâuz caz hâur tas nro huyện muôx 500 ha; iz chas ntơư, hu lênhx nênhs tuôx yưv pênhr uô cov tâu tsơưs tsơưs iz luz tsêr meir tsiv uô lưk caz hâur thax tsav:“Huyện xav tinhv tsuv cxiv tsa uô jông têx hâux lưv txix thâuv qir uô txos trâu sâu muôs, reik đros tsiv uô. Txix ntơư muôx têx khưx phưx tâu têx tsi jông, tsi trơưk siêz xar, muôx moz....paz huôv tsar truôx uô luôs hâux lưv choz jâuz caz, tu zus caz chaz xor”.

Txơưv tênhx qơư huôv tsar, hlôngr yiêz, ntâu chuôz zis pêx xênhv cux tsi yuô moz siêz trâu hâux lưv co tiv thâuv ntêx moz huôv xênhz uô ruôr hiêv txos. Cấp ủy, hâu nov ntơưv qơư tsênhv sir jos vênhv tôngv tsôngv pêx xênhv hlôngr yiêz tsưr ziv, siêz xar, xuz thơưx muôz têx liêx têz uô tsi jông kôngz thiêz nzaz nzơưv têx ntus đêx chiê chos jâuz caz. Iz chas ntơư, tsi so tsưr tsix têx jiês cơưv shâuv cxaz nzir txux chi yuôr trâul, gra siêz tsưr ziv chos thiêz tu têx jâuz caz trâu pêx xênhv.

Heik ntơưv jiês cơưv huôv tsar kinh tế tập thể hâur kaz hli 7 nhiv kruôr đhâu, zơưv Trịnh Xuân Trường, Chủ tịch Ủy ban tỉnh Lào Cai heik cxuô ngênhx muôx vax huôv đros trâu huyện Bảo Yên tsuv nzaz nzơưv têx pênhr jos txix têz qơưk têx tsaz yênhx thiêz ntơưv qơư li Nghị quyết huôv tsar kôngz nuv chiê krêz đar thax tsav chos jâuz caz, sik côngv đros tsiv uô-sâu zuôr têx lưk caz, muôz HTX uô qơư khov chiê pêx xênhv thiêz doanh nghiệp siz paz huôv tsar uô:“Hâur ntu zuôr txos, pêz zuôr heik trâu HĐND tỉnh, tsoz jâuz caz zos tsoz chos chênhr, gra lok kinh tế siêz zos uô jông têx hâux lưv sik hux jos, sik paz huôv tsar, chênhr viv li tsuv đros đơưk têx phiv liv. Iz zav li muôx têx thôngz đhâu trâu Hội đồng Nghị quyết chuyên đề paz max pênhr txeik txix 3-5 tyv đeiv uô luôs hâux lưv no chiê uô tâu jông”./.

                                                                                                                    An Kiên-Riê Lâux cxeik, nhênhv