Yên Bái bax cxuô chuôz zênhx, trôngx tos thiêz cxuô faz tsưr ziv phax tir thêir moz trâu shông cơưv yiêz

Hâur zuôr xar iz luz hlik đhâu lok no, chor cưk kriê ntơưr nhoz tsêr cơưv cxênhx nhuôs zâu Minh An, huyện Văn Chấn tưz tuôx tsêr cơưv chiê bax têx qơư nhoz cơưv ntơưr, chuôz zênhx phưx vưv kriê thiêz cơưv, qêz suô, tu đu lus nhuôv shux xênhz têx chuôz zênhx uô si, tsêr lớp cơưv cov hur si chiê bax trâu shông cơưv yiêz. Cưk kriê Lý Thị Lương heik pâuz:

“Hâur ntu so sor, pêz cux tuôx trâu tsêr cơưv qêz suô, đoz têx đrox, tu qơư nhoz cơưv ntơưr hur si chiê bax tok chor nhuôs tror tuôx tsêr cơưv thiêz cux chiê taz por vêv xênhz phax tir thêir moz Covid-19”.

Shông cơưv 2021-2022, tsêr cơưv cxênhx nhuôs zâu Minh An njuôk xav zuôr tok xar muôx 300 lênhx nhuôv tuôx nhoz cơưv hâur tsêr cơưv tsênhv qơư thiêz 2 qơư cơưv hâur têx jok.

Cưk kriê Trịnh Thị Mai, thơưx seiz car tsêr cơưv heik pâuz: Đhâu thâuv lox tôngv, vêv xênhz hur si, đu lus, chor cưk kriê ntơưr tsênhv sir jos bax uô têx hâux lưv zuôr trâul txos chiê phax tir thêir moz Covid-19, paz shux xênhz chor uô niêv uô txir tso siêz chiê têx tuz nhuôs tuôx nhoz cơưv ntơưr hâur tsêr cơưv:

“Tsêr cơưv muôx tsưr ziv uô tsênhv tsênhz trâu yênhx hli, yênhx ciêz. Tok chor nhuôs tror tuôx tsêr cơưv taz por lok phax tir thêir moz gênhk, lar heik zos uô trơưk li têx cui tinhv phax tar moz, kror no tsêr cơưv lok six moz siêz txos”.

Têx hnuz lok no, đros trâu chor cưk kriê ntơưr, shux xênhz li ntâu lênhx uô niêv uô txir nhoz Văn Chấn txơưv max uô liêx têz, têx hâux lưv uz no taz sik lơưr cux nduô hâux lưv tsês chiê tuôx paz tsêr cơưv qêz suô, tu chor nhuôv têx qơư nhoz cơưv ntơưr, bax tok shông cơưv yiêz. Niêv lâuk Hoàng Thị Hiệu, nhoz xã Nghĩa Tâm heik:

“Cur pov chor cưk kriê lơưr tuôx tu thiêz qêz suô têx tsêr lớp cơưv ntơưr, cur cux chiv chir tuôx no chiê đros qêz suô, tu têx qơư nhoz cơưv ntơưr cov hur si, đu lus. Đros trâu co, cur cux tưz bax ntơưr cơưv, chuôz zênhx chiê phưx vưv chor nhuôs cơưv ntơưr hâur shông cơưv yiêz”.

Tas nro huyện Văn Chấn muôx 65 luz tsêr cơưv, hâur co muôx 24 tsêr cơưv uô tâu jông luôs hâux lưv kriê txux chi trơưk li têz qơưk cui tinhv. Bax trâu shông cơưv yiêz, six hơưv đhâu, huyện tưz cxiv uô yiêz 66 qar lớp cơưv, qơư uô hâux lưv thiêz 52 côngz trênhx uz no…. Txos nhiv nor, 100% lênhx shux xênhz lớp 1, lớp 2, lớp 6 tưz txâuk ntơưr cơưv trơưk tsaz yênhx zoz zux phưv thôngz shông 2018. Chor cưk kriê ntơưr cux tâu cơưv cxaz nzir têx txux chi tsưr ziv yuôr trâul lok sâuv kriê ntơưr trâu têx nhuôs trơưk Bộ Zoz zux tsưr ziv txix cơưv oline. Pos Nguyễn Thị Hà, Phưv Phongx Zoz zux huyện Văn Chấn heik pâuz: Xav tinhv moz Covid-19 tsênhv huôv xênhz phiv liv, viv li Phongx tưz heik cxuô luz tsêr cơưv cxiv tsa tsưr ziv tsênhv tsênhz chiê phax tir thêir têx tsi jông muôx têx yưv siv:

“Cxuô luz tsêr cơưv tsuv uô jông lơưr têx cui tinhv lok phax tar moz gênhk trơưk li ngênhx muôx vax huôv heik kriê; bax cxuô luôs hâux lưv, cxuô zav chuôz zênhx zuôr trâul txos li: Cuô đêx yuôx nzuôr têk, njuôk shuôs đas jos, heik uô trơưk cui tinhv iz tus nhoz kuôk đêz iz tus cov truôx tuk…. Txos nhiv no, tưz hu zâuv têx nhuôs zâu muôx 5 shông tuôx tsêr cơưv tâu xar 100%; têx nhuôv 6 shông ndê lớp 1 tax 100% thiêz chor shux xênhz cơưv tas ntơưr cxênhx iz ndê lớp 6 ntơư tax zuôr xar 100% thiêz”./.

(Đinh Tuấn-Riê Lâux cxeik, nhênhv)

Têx uô tâu jông txix Tôv Covid côngv thôngx nhoz jêx jok tox siêz huyện Mộc Châu (Sơn La)

Nhoz sâuv iz ntar trôngz tox nxaz, sâuv txos cêr muk txos trâu jok Tà Số, xar Chiềng Hắc, huyện Mộc Châu, qơư qênhz yuôx sêiz jor caz moz Covid-19 tâu pox nhuôs hâur jok uô chiê qênhz yuôx chor nênhs muk lok trâu hâur jok. Iz hnuz muôx yênhx puô lênhx nênhs muk lok đhâu ntơưv no, tas nro puôr lênhx tâu chor Tôv Covid côngv thôngx sâu tsênhv mênhx bê, qơư nhoz, số điện thoại tsês thiêz hêik sơưr đơưk chox đêiv ntâuz bos kror ndâux thiêz muôz đêx yuôx nzuôr têk tsik so. Tix lâus Dềnh Xênhv Muôk, Tôv phax tar caz moz Covid-19 jok Tà Số 2, xar Chiềng Hắc, huyện Mộc Châu hêik:

“Ntơưv no pêz muôx 3 tôv sik hlôngr sêiz jor yênhx hnuz, hêik pox nhuôs sơưr đơưk muk lok, tsuv chox đêiv bos kror ndâux chiê phax tar caz moz. Chor nênhs nhoz têx qơư txơưr tuôx zos tsik muôx hâux lưv đaz tsi zov chênhr mak pêz tsik khênhr lok trâu hâur jok”.

Đros chor jêx jok nhoz tox siêz, pox nhuôs li jênhv pâuz tsênhv kik, yênhx hnuz Tôv Covid côngv thôngx tưz uô thênhv siêz têx ntâuz ntơưr cov zôngx ziv pâuz tâu chiê yax kriê trâu pox nhuôs pâuz đhâu cxiv luôs loa nta suôz hâur jok. Chor thành viên tôv tsênhv muk trâu yênhx chuôz zis chiê yax kriê, hêik pox nhuôs sơưr đơưk uô truôx jông lơưr têx tsưr ziv chiê phax, tar caz moz trơưk Bôv Y têr hêik kriê, tiv zix zos kruôz kriê trâu pêx xênhv chir chir sêiz shuôk zuk đas jos ntơưv tsêr, hêik pâuz y têr thâuv zuk lok sik muôx nênhs hâur chuôz zis tror lok txix têx qơưk muôx caz moz. Tix lâus Lu Xênhv Muôk, Tôv phax tar caz moz Covid côngv thôngx jok Tà Số 2, xar Chiềng Hắc, huyện Mộc Châu puz pâuz nzir:

“Yax kriê, hêik trâu cxuô ziv chuôz zis pâuz, zos chuôz zis tưs muôx nênhs muk uô nox đêz, nhoz ntơưv têx qơư muôx caz moz mak hu tênhv muk hêik cov nhoz truôx jông ntơưv kror qơư co. Zos muôx nênhs tror lok txix têx qơư muôx caz moz mak tsuv hêik pâuz y têr thiêz cêv kuôk tsêx trung huv zos li cui tênhv”.

Nhiv no, huyện Mộc Châu muôx zuôr xar 700 Tôv Covid côngv thôngx đros xar muôx 2000 lênhx nênhs uô hâux lưv. Chor nênhs uô hâux lưv hâur chor Tôv Covid côngv thôngx mak tâu xêir zuôr ciês txix chor nênhs yax kriê viên sir jos uô hâux lưv ciês ntơưv zuk qơư nhoz. Chênhr viv li lơưr tsik so zos chor nênhs moz siêz, sir jos, nzor nriêr pâuz tâu xor mông, sêiz kaz, pov thiêz hêik trâu cấp ủy, chinhr quyền ntơưv qơư cux xưk li têx cơ quan muôx vax huôv pâuz thâuv muôx yưv têx phiv liv.

Zơưv Vì Văn Biên, Chủ tịch UBND xar Chiềng Hắc, huyện Mộc Châu hêik:

“UBND xar tưz kriz uô Tôv Covid côngv thôngx thiêz chor tôv co tưz sêiz shuôk chor nênhs chiv chir sêiz car, thôngx cxix kriz uô tôv qênhz yuôx caz moz txix têx yêz thiêz chor nênhs txix têx qơư txơưr tuôx, thiêz tsưr ziv uô no mak tâu pêx xênhv sơưr đơưk thôngx ziv đros uô siêz”.

Đros tas nro cxiv luôs chinhr triv thiêz yênhx lênhx pêx xênhv li sir jos sik côngv siêz, thôngx ziv, Tôv Covid côngv thôngx tưz uô tâu truôx jông luôs hâux lưv qênhz yuôx, tir thêir caz moz Covid-19 sâuv thax tsav./.

(TTTB-Lik Thox cxêik nhênhv)