Côngz xưv cxiv tsa, kho đuô chor tsêr nhoz trâu pêx xênhv trâus ntux nas chuô ruôr hiêv sâuv thax tsav tỉnh Sơn La tsênhv tâu Quân khu 2 thiêz Tỉnh Sơn La sir jos sik côngv kriz uô, chiê paz trâu pox nhuôs nzor muôx tâu tsêr nhoz, truôx tuk luz nênhx. Lơưr co, chor tsưr ziv tưz tâu kriz uô chiê paz cxiv uô tsêr nhoz trâu 52 ziv chuôz zis muôx tsêr trâus poz vâu thiêz cuôr yôngz tas, txar qơư nhoz trâu 279 zivchuôz zis, kho đuô 90 luz tsêr trâus puôk tsuôx. No zos chor ziv chuôz zis trâus ruôr hiêv tas ntâu tiv zix hâur 2.600 ntâu luz tsêr trâus ruôr hiêv hâur chor jiês lok nas lox thâuv kaz hli 7 thiêz hâur hlik hli 8 nhiv kruôr đhâu sâuv thax tsav tỉnh Sơn La. Chor nhiêx paz zos Ban hêik sơưr đơưk sik côngv paz Trung ương muôz; đros phênhv paz 100 triệu đêiv iz luz tsêr trâus poz vâu, puôk tsuôx tas thiêz tsuv txar qơư nhoz; 30 triệu đêiv trâu iz luz tsêr tsuv kho đuô. Lok chor nênhs uô, muôx 750 ntâu lenhx nênhs tưz tâu chiê paz cxiv uô tsêr zos canr bôv, chiến sĩ nhoz Bôv Chỉ huy Quân sự tỉnh Sơn La, Sư đoàn 316 (Quân khu 2) đros chor dân quân. Txos nhiv no, tưz tsưr tsix jriz uô thiêz cxiv tsa 32 luz tsêr, txar qơư nhoz trâu 19 luz tsêr./.

Lê Hạnh-Lik Thox cxêik nhênhv

Công an tỉnh Điện Biên nhiv kruôr tsưr tsix chiv nhênhv 80 shông Hnuz chax chês Công an thiêz 20 shông Hnuz hội tas nro tsôngv box tsưx phưv têz qơưk chiê tror ndo txos têx luôs hâux lưv, côngz đas jos cxiv tsa thiêz phax tir thêir nênhs fêv, khav tinhv lưv lươngv uô ntêx nyuôs li pưs txux hâur tsưx phưv truôx tuk thax tsav qơư. Thường trực Tỉnh ủy Điện Biên heik Công an Điện Biên tror hlôngr yiêz, gra siêz tsơưr lươngv phôngz yaox tas nro tsôngv box sik đros tsưx phưv têz qơưk; bax fuô uô cxuô faz tsưr ziv chiê lês uô tâu jông têx hâux lưv zok muôz; sik đros tsưx phưv truôx thax tsav ntus đriv 2 têz qơưk Việt Nam-Lol Tsuôk thiêz Việt Nam-Trung Quốc. Ndax six hơưv no, 3 lênhx canr bôv Công an tỉnh Điện Biên tâu têz qơưk Lol Tsuôk muôz côngz mênhx hov 3 uô tâu hâux lưv jông; 4 lênhx công an tâu Chủ tịch têz qơưk muôz côngz mênhx hov 3 uô tâu truôx jông luôs hâux lưv tsưx phưv têz qơưk; 22 lênhx công an tâu Thủ tướng Chính phủ muôz ntơưr kruôs viv muôx côngz đas jos lox lês uô tâu jông têx hâux lưv zok muôz, paz cxiv tsa thiêz tsưx phưv truôx têz qơưk Việt Nam./.

Vũ Lợi-Riê Lâux cxeik, nhênhv

Tỉnh Sơn La tsênhv sir jos bax cxuô kror chiê kriz uô cxiv tsa tsêr cơưv phôv thông nội trú oz cấp Cxênhx iz-Cxênhx oz xar Phiêng Khoài (huyện Yên Châu kuz) trâu hnuz 19/8. No zos luz tsêr cơưv xuz thơưx ciês hâur 13 luz tsêr cơưv nội trú oz cấp nhoz 13 xar ntus đriv zuôr tâu yưv pênhr kriz uô ntơưv tỉnh Sơn La. Lơưr co, côngz trinhx zuôr tâu cxiv tsa ntơưv Tsêr cơưv Cxênhx oz Phiêng Khoài nhiv no, đar muôx 4,9 héc ta, tas nro pênhr yưv uô xar muôx 150 tiv đêiv. Tsêr cơưv txâuk trâu xar muôx 1.000 lênhx shux xênhz tuôx cơưv ntơưr. Zơưv Nguyễn Đình Việt, Chủ tịch Ủy ban tỉnh Sơn La hêik xar Phiêng Khoài sik côngv đros chor sở, nganhx, sêiz đrơưv bax cxuô kror chir tsưr tsix kriz uô tâu trâu hnuz 19/8/2025; bax qơư chiê cxiv uô chor côngz trinhx txơưr đrâuv dưv anr, li tsêr nhoz uô hâux lưv trâu chor xưk kriê ntơưr…/.

Trấn Long-Lik Thox cxêik nhênhv

Tiv tsôngv pêx xênhv nhoz tox siêz tsi yuô tâu muôx txux chi tsưr ziv jênhv pâuz, viv li ntâu lênhx nênhs tưz trâus chor nênhs fêv nziêk đas. Txuz tus nxeik Vàng Thị Nguyệt, 16 shông, heir nênhs Cho nhoz jok Pho Hồ Thầu, xã Tả Lèng nhiv kruôr tâu chơưv paz ntơư iz jiês thiêz uô trâu sơưr đơưk tsuv chênhr phax lok nênhs fêv têx tsưr ziv nziêk đas. Nguyệt sưv thiêz pâuz iz tus nênhs bê hu uô Hằng đhâu sâuv mạng xã hội, nưk tiêk nhoz Hà Nội muôx hâux lưv uô siz, tâu nhiêx hli siêz, 9 tsov đeiv iz hlik. Njênhs thiêz mnôngs trơưk têx luk nziêk đas, Nguyệt tưz cxov yêz tuôx đrav đrôngs, taz sik đhâu co trâus chor nênhs fêv chox muk trâu TP Hải Dương kuz (nhiv no zos TP Hải phòng), đhâu ntơư zos Quảng Ninh thiêz trâus nênhs fêv cơư tsês trâu ntơưv iz qơư hu gâux, zuôv taz kruô thiêz bax zuôr muôz muôs trâu saz Trung Quốc. Tax txos hnuz xiêz 03/8 nhiv kruôr đhâu, thâuv Nguyệt hu thiêz xa tâu tin nhắn lok trâu chor nênhs hâur tsêr, chuôz zis thiêx heik trâu công an pâuz, đros paz chơưv tâu tror lok tsêr. Thiếu tá Lương Tiến Hoàng heik pâuz, chiê phax tir thêir tâu jông têx nênhs fêv, lar heik zos chor nênhs fêv nziêk đas lênhx nênhs muôs, mak chuôz zis, côngv thôngx thiêz chênhr lênhx nênhs trâus nziêk đas co tsuv sik thôngx siêz, côngv têk thiêx phax tir thêir tâu./.     

Khắc Kiên-Riê Lâux cxeik, nhênhv