Zar hnuz keix hnuz xiêz 5/10, tror uô tsaz yênhx uô hâux lưv ntơưv tỉnh Lào Cai lok côngz xưv khưx phưx têx trâus ruôr hiêv tiv coz nas chuô số 10 thiêz tsưr ziv phax tar coz nas chuô số 11, Phưv thủ tướng Trần Hồng Hà đros đoanx côngz xưv Chính phuv tưz qênhz yuôx tsêr meir đêx tênhv Thác Bà thiêz uô hâux lưv đros UB tỉnh. Lơưr pov cov, coz nas chuô số 10 uô ruôr hiêv hnhar lok lênhx nênhs thiêz chuôz zênhx chuôz tas ntơưv Lào Cai. UB tỉnh tưz chox kriê têx lưx lươngv ciêr chênhr khưx phưx têx trâus ruôr hiêv, kho đuô zaoz thôngz nôngx cxênhz, taz por muk lok tâu chiê phưx vưv khưx phưx ntux nas lơưr tsưr ziv “4 ntơưv qơư” truôx siêz txar qơư nhoz muk nhoz qơư taz por đuô.

          Phưv thủ tướng Trần Hồng Hà ntâuk grê siêz tỉnh Lào Cai li chuv tôngv, heik chuôz tsar côngz xưv njuôs pov, taz por pas đêx thiêz thôngz xor mông. Zơưv thix ziv Quân khu 2, tỉnh Lào Cai thiêz têx taz viv cik txos bax jông trâu lưx lươngv, phaz pênhv seiz jor chiê chuv tôngv phax tar coz nas chuô số 11. “ Tsuv đros tsôngv box nhoz hâur têx thax tsav zôngx ziv trâus nas chuô uô ruôr hiêv, đros njêis pêx xênhv têx chuôz zênhx thâuv muôx ntux nas chuô. Đrâuv “4 ntơưv qơư”, tsuv gra lơưr zav nox, yuôx, đêx hâuk, cxuô zav meir, chuôz zênhx chiê txix co paz max zos muôx yưv tox poz..., tsuv uô li chas krêz uô muôx chêx cuk, tsênhv tsênhz. Xar njôngr têx đồng chí zuôr chênhz zênhv đhâu côngz xưv phax tar nas chuô đhâu têx coz nas chuô nhiv kruôr đhâu mak txos coz nas chuô no tsuv uô jông đuô”./.

Đinh Tuấn- Txâur Vax cxeik nhênhv

          Zar hnuz kêix 5/10, ntơưv tỉnh Sơn La, Tập đoàn Trox yêz Việt Nam tưz muôz 2 tiv đêiv paz trâu pêx xênhv kho đuô têx trâus ntux nas chuô uô ruôr hiêv.

           Sơn La zos thax tsav qơư trâus coz chuô sôr 3, sôr 5 thiêz sôr 10 uô ruôr hiêv txos ntâu, uô 12 lênhx nênhs tuôs, 2 lênhx nênhs trâus plox mông, 11 lênhx nênhs trâus saz; yênhx puô luz tsêr thiêz ntâu côngz trinhx trâus puôk tsuôx, tas nro têx trâus ruôr hiêv njuôk xav xar muôx 1.400 tiv đêiv. Tỉnh tưz hêik tas nro sơưr đơưk sir jos tir tar, kho đuô têx trâus uô ruôr hiêv, taz sik têx tsuv kho đuô mak lok six ntâu.

           Uô ntêx co, shông 2024, Tập đoàn trox yêz Việt Nam thiêz têx taz viv tưz paz 6 tiv đêiv trâu Sơn La kho đuô têx trâus ntux nas chuô uô ruôr hiêv, cxiv tsa qơư nhoz uô hâux lưv, tsêr nhoz trâu shux xênhz, tsêr uô jâuz mox nor hâur tsêr cơưv ntơưr thiêz cxiv tsa qox trâu pêx xênhv muk lok. Zơưv Nguyễn Đình Việt, Chủ tịch Ủy ban tỉnh Sơn La hêik pâuz: “Hâur ntu đhâu, muôx Mặt trận Têz qơưk hêik sơưr đơưk sik côngv paz, tỉnh Sơn La tưz txêik tâu chor nênhs hâur tas nro têz qơưk, chor tập đoàn, công ty, doanh nghiệp… li têx paz. Nhiv no tỉnh tsênhv sir jos muôz tỉnh têx pênhr thiêz chor doanh nghiệp, nênhs siêz jông li têx paz chiê paz trâu pêx xênhv uô cêr, cxiv tsa vax tsêr trâu pox nhuôs… đros muôx Tập đoàn têx paz, tỉnh jênhv tiêk zuôr zôngv chor pênhr nhiêx no paz trâu pêx xênhv cov tâu jông tiv zix”./.

Lê Hạnh-Lik Thox cxêik nhênhv

           UB tỉnh Lai Châu nhiv kruôr thix ziv thủ tướng chính phuv thiêz têx bộ, nganhx cik txos chox dự án cêr muk chênhr Bảo Hà-Lai Châu lok tsưr ziv yưv pênhr côngz ntu 2026-2030, hlôngr trâu shông 2030 li njuôs xav nhiv no.

          Cêr muk chênhr ntêr 163 cei cêr, txuôk cêr muk chênhr Nội Bài-Lào Cai txos trôngx đriv ntiêx têz Ma Lù Thàng (Lai Châu) sik côngv đros trôngx đriv Kim Thủy Hà (Vân Nam, Trung Quốc). Dự án muk đhâu 2 tỉnh Lào Cai thiêz Lai Châu. Chủ tịch UB tỉnh Lai Châu Lê Văn Lương puz pâuz, tiv phaz cam kết bax pênhr jos chiê car chêx thax tsav qơư thiêz huiz tôngv cxaz têx pênhr jos huv cêr chei txơưr đros cxaz chuôz yưv pênhr. Hâux lưv nzor krêz uô dự án zuôr paz Lai Châu- tỉnh nhiv no tsi tâu muôx cêr muk chênhr cxơưz tiês huôv tsar kinh têr trôngx đriv, ju lix, công nghiệp tsiv uô thiêz taz por txiv ngaz ntus đriv./.

Khắc Kiên-Txâur Vax cxeik nhênhv

            Têis cik 5/10, Cơ quan Cảnh sát qênhz yuôx Công an tỉnh Điện Biên tưz cxov Nông Thị Thu Thủy (xênhz shông 1994, nhoz phường Điện Biên Phủ) lok kror cxâuv “Liv zôngv muôx siêz njênhs chiê đas zuôr nhiêx txiêx cxuô zav” thiêz liv zôngv uô hâux lưv siêz jông chiê zuôr kror liv.

             Lơưr qênhz yuôx, Thủy hêik tiêk zos iz lênhx pox niêv muôx siêz jông, tsik so hêik sơưr đơưk paz nhiêx nhiêx trâu chor nênhs muôx luz nênhx txov nhêv sâuv mạng xar hôiv. Tsênhv tsênhz, Thủy đros Nguyễn Mạnh Tuân (tưz trâus cxov) hêik pâuz kriz uô ntâu hâux lưv siêz jông chuôr, tso tơưv têx đuôz tsik zos kror tsênhz chiê đas zuôr chor nhiêx sik côngv paz co. Txix hli 2 txos hli 6/2025, Thủy tưz đas sđ sik côngv paz tâu 24 triệu ntâu nhiêx.

            Hnuz 2/10, đhâu thâuv Tuân trâus cxov, Thủy tưz tuôx cơ quan công an hêik pâuz zuk kror cxâuv zos sik côngv đas chiê zuôr chor nhiêx hêik sơưr đơưk sik côngv paz trâu uô hâux lưv siêz jông./.

Vũ Lợi-Lik thox cxêik nhênhv