Pơtối mơnhông hnoăng cheăng ƀă pôu râng tơdroăng cheăng dêi Hngêi rak liăn kum ‘na mơdró kâ cho khu xiâm tung pêi pro, rak  ngăn ‘na kơvâ liăn ngân, ‘no liăn mơnhông pêi chiâk pêi deăng, rêh ối - cheăng kâ a thôn pơlê, sap ing hơnăm 2020 troh nôkố, Agribank hiăng kơdĭng lối 1 rơpâu rơtal liăn ki rơlối vâ kơdroh kơxô̆ liăn laih ki mơdrếo, cho cheăng kơjo kum kuăn pơlê vâ rêh ối, pêi cheăng tung pơla ai pơreăng kân COVID-19, tơdrêng amê hnối pơkâ pêi pro hên tơdroăng ki ăm mung liăn, mơdrếo laih iâ sap ing 2% - 2,5% vâ pơchông ngăn bă laih ăm mung tiah hmâ hdrối mê hía nah, tâi tâng kơxô̆ liăn ki ăm mung ai lối 300 rơpâu rơtal liăn ăm mâu khu mơdró kâ krâ kơvâ ƀă mơdró kâ kŭn, khu mơdró kâ kân, mơngế krê ƀă khu mơdró kâ FDI.

Drêng dế pơla ai pơreăng kân COVID-19 xông tâ tú ó tiah dế nôkố, ga pro tơdjâk chiâng ‘mêi troh tŭm kơvâ cheăng kâ - rêh ối dêi kuăn pơlê, tơdroăng cheăng kâ, rêh ối pơlê pơla; vâ teăm veăng kum ăm kuăn pơlê châ mung liăn, rĕng tơniăn ‘na tơdroăng rêh ối, pêi cheăng, tê mơdró kâ, tơkâ luâ xahpá, Agribank hiăng pơkâ kơdroh xo liăn laih ăm tâi tâng mơngế krê, ƀă khu pơkuâ cheăng drêng mung liăn VND a hngêi rak liăn Agribank.

Ki nhên, ƀă kơxô̆ liăn ki mung a hâi lơ 15/7/2021, Agribank pơtối kơdroh liăn laih ai 10% ki ăm mung ƀă mâu ngế ki mung  mơdrếo iâ hơnăm ai laih sap ing 5% tung 1 hơnăm tơngi klêng, ƀă ăm mung ki chiá ton hơnăm ai laih sap ing 7% tung 1 hơnăm tơngi klêng. Tiô riân ngăn, tơdroăng ki pơtối kơdroh mơdrếo liăn laih roh kố, Agribank kơdĭng dâng 5 rơpâu 500 rơtal liăn vâ kum ăm mơngế ki mung.

Pakĭng mê, hngêi rak liăn Agribank xuân hiăng mơ-eăm khât tung tŏng kum mâu tơdroăng ki pá puât ăm kuăn pơlê mung, tơdroăng pêi pro mê châ pro krâu rơhí rơhó, tơdrăng khât, tơ-ƀrê môi tiah: ‘Mâi rơnêu tung mơdrếo liăn xiâm ƀă liăn laih; Ôh tá xo liăn drêng pơtroh liăn tung troăng pơtroh kơthô, lơ tiô troăng tung hyôh a măng tung tơnêi têa ƀă veăng kum lối 130 rơtal liăn ăm tơdroăng cheăng hbrâ, tơplâ, mơdât pơreăng kân COVID-19 ƀă hên ki ê hía. Tiah mê, ƀă tơdroăng ki pơtối kơdroh mơdrếo liăn laih, roh má 5 ki pơtối hiăng mơhno tối hnoăng cheăng ki djâ troăng ahdrối, kơdo mơ-eăm khât păng ‘nâng dêi Agribank tung hnoăng cheăng môi hiâm, môi mơno, môi ivá ƀă Đảng, Tơnêi têa, Chin phuh pêi pro “péa tơdroăng cheăng xiâm”: khŏm mơdât ki tâ tú dêi pơreăng ƀă mơnhông pêi cheăng kâ - rêh ối. Tơdroăng ki kơdroh mơdrếo liăn  laih kô pro ton tá troh hâi lơ 31/12/2021 ƀă châ xúa pêi pro rơdâ a 2 rơpâu 300 tíu ki ăm mung dêi Hngêi rak liăn Agribank tung lâp tơnêi têa.

Nhat Lisa tơplôu ƀă tơbleăng