VOV4.Sêdang - A rôh hôp tơbleăng hnoăng cheăng tung mâu khế mơ’nui hơnăm po a kơxo lơ 30/6 a Hà Nội, pôa Phùng Đức Tiến, ngế xiâm phŏ ngăn chiâk deăng ƀă mơnhông thôn pơlê tối nhên, vêh pêi chiâk deăng cho hnoăng cheăng ki rơkê plĕng vâ rak vế mơdêk dêi kơvâ cheăng ƀă pêi pro “pơkâ pêi 2 tơdroăng” tiô tơdroăng ki pơkâ thế dêi Ngế pro xiâm hnê ngăn Chin phuh tung pơla ai pơreăng COVID-19 mơni kô ôh tá tơniăn.

6 khế hdrối kố nah, mâu tơdroăng pơkâ dêi kơvâ pêi chiâk deăng pơrá pêi klêi ƀă tơluâ tiô pơkâ: Tơdroăng ki rĕng châ 3,83%; tâk 3,71% ‘na ki kơnâ, kơxô̆ liăn pêi lo ing pêi chiâk deăng loăng pơlái, ká xi xŏng tâk 28,3% ƀă 24,23% rơtal dollars, pêi chiâk deăng tơxâng cho kơvâ ki xiâm dêi tơdroăng cheăng kâ, malối tung mâu rôh xơpá xua tơdjâk dêi pơreăng COVID-19.

Klêi kơ’nâi 6 khế hdrối nah dêi kơvâ pêi chiâk deăng cho tơdroăng ki veăng tŏng kum dêi khu pơkuâ tơdroăng kal kí xuân veăng kơhnâ dêi mâu kong pơlê, khu mơdró kâ, khu tơrŭm ngăn mâu kơvâ cheăng ƀă kuăn pơlê ki pêi chiâk deăng ing mê rế hía rế mơjiâng ƀă pro ivá kong kế tung pêi chiâk deăng.

Katarina Nga tơplôu ƀă tơbleăng