VOV4.Sêdang - Tung pơla hdrối kô nah ai tơdroăng tối ‘na 17 ha kong, a poh xá 726, dêi cheăm Ia Dal, tơring Ia H’Drai, kong pơlê Kon Tum tro kuăn pơlê ko muih xo tơnêi vâ pêi chiâk, ƀă achê kố nếo châ séa ngăn. Tơdroăng ki vâ tối tung pơla tơleăng mâu tơdroăng hlo ai hên tơdroăng pơkí, môi tiah tơnêi kong tro ko mê to mâu kong ki ai vâi kơtôa ‘na tíu pêi cheăng rak ngăn tơnêi ki mê.

Kong loăng tro ko muih vâ xo tơnêi pêi chiâk

Ki hên kong tro ko ‘nhiê ai 17 ha mê, kuăn pơlê hiăng pêt pôm loăng ƀă pêt plâi loăng hôt. Tung mê, ai loăng plâi hôt ki hiăng péa pái hơnăm, xuân ai deăng ki nếo muih, nếo pêt. Tơdroăng 17 ha kong a cheăm Ia Dal, tơring Ia H’Drai, kong pơlê Kon Tum tro ko ‘nhiê vâ xo tơnêi pêi chiâk hiăng châ pôa Dương Văn Trang, Kăn hnê ngăn Đảng kong pơlê Kon Tum hnê mơhno mơnhên ing apoăng khế 6. La vâ chê 1 khế hdrối kố nah, tơdroăng dêi mâu tíu pêi cheăng ai tơdjâk troh xuân ối tơvâ tơvân hâi ‘nâi nhên. Laga, ki khât gá ai hên mâu kong tro ko ‘nhiê, ƀă ai hên tơdroăng ki kơ’nâi mê hiăng ton la ôh tá châ mơdât, ôh tá tơleăng pơxâu phâk tơdrêng.

Gương tơplôu ƀă tơbleăng