VOV4.Sêdang - Pêi pro tiô tơdroăng hnê mơhno dêi Hngêi rak liăn Tơnêi têa pơtối tơbleăng tối mâu troăng hơlâ tŏng kum, pơkâ tŏng veăng kuăn pơlê ki mung liăn tro tơdjâk xua pơreăng COVID-19 tâ tú tung pơlê pơla, sap ing hâi lơ 16/6/2021, Hngêi rak liăn Agribank mơdêk tâk péa hdroh kơxô̆ liăn ăm mung ki kơjo ƀă mâu kuăn pơlê ki tro tơdjâk xua pơreăng COVID-19, tơkéa vâ tối ăm mung tâk troh 200 rơpâu rơtal vâ kum mâu kuăn pơlê ‘mâi mơnhông rêh ối, cheăng kâ, rak tơniăn hnoăng pêi cheăng kâ tê mơdró, rak tơniăn tŏng kum rêh ối pơlê pơla.

Kơdrum kơphế ‘mâi pêt rơdâ 1 ha dêi ngoh Lê Đức Anh, (đô̆i 5, Kŏng ti kơphế D’Rao, tơring Čư Mgar, kong pơlê Dak Lak) hiăng troh hơnăm má 8, pơxiâm mot tung hơnăm ki rơdêi má môi. Mâu loăng kơphế ai tơkâng hveăng hên plâi trĭng.

Ngoh Đức Anh ăm ‘nâi: hdrối nah ngoh hiăng ko ‘nhiê kơdrum kơphế ki hiăng krâ, vâ ăm tơnêi pơtê 2 hơnăm tro tiô pơkâ ‘mâi pêt kơphế, klêi mê pêt nếo. Kơnôm ‘nâi rah hdrê ki lĕm rơdêi, pêi tro tiô mâu tơdroăng hnê ‘na kih thuât rak ngăn mê kơdrum kơphế  xông rơdêi lĕm. Ôh tá môi tiah a hên tíu ki ê, loăng gá hmâ hlâ xua hên túa pơreăng kâ ’nhiê klêi pêt péa pái hơnăm.

“Pơtối pêt kơphế klêi mâu hơnăm pơtê têng tơnêi, pêt prá alâi hdrê loăng ki ê vâ ăm tơnêi hơpok nếo, ƀă pin pêt nếo kơphế ăm kơtóu plâi hên. Drêng hâi ‘mâi pêt nah, drêng kơphế hiăng krâ mê môi ha bú châ xo 7-8 tâ̆n plâi. Drêng hiăng ‘mâi pêt nếo troh rơnó kơphế dé xông rơdêi ai plâi châ xo sap  15-17 tâ̆n, tâng hơnăm kong prâi mêi tro tô ‘lo, po văng rak ngăn krâu tâ kô hên tâ nếo. Kơdrum loăng mê 1 ha, châ xo 17 tâ̆n”.

Kăn ƀô̆ hngêi rak liăn Agribank  a Dak Lak chu veăng kum kuăn pơlê pro hlá mơ-eá vâ kơdroh liăn rơkâ ăm mung xua tơdjâk pơreăng COVID-19

Pôa Nguyễn Hữu Thọ, Ngế pơkuâ Kŏng ti kơphế D’Rao ăm ‘nâi: Kŏng ti ai 488 ha kơphế, sap hơnăm 2010 troh nôkố hiăng pơtối pêt 289 ha, châ lối 60%. Kơxô̆ liăn ăm pơtối ‘mâi pêt lối 33 rơtal liăn. Tâi tâng xua Hngêi rak liăn  kum ‘na pêi chiâk ƀă mơnhông thôn pơlê a tơring Čư Mgar ăm mung tơvêh rơkâ iâ. Sap apoăng hơnăm 2020 troh nôkố, xua yă kơphế kơnâ tâ yă tê mê Kŏng ti trâm hên xơpá. Pakĭng mê nếo, lối 65% tung kơxô̆ 453 ngế kŏng nhân ki pêi cheăng dêi kŏng ti cho hdroâng kuăn ngo, tơdroăng rêh ối cheăng kâ trâm hên xơpá; tâi tâng xuân mung liăn hngêi rak liăn vâ pêi cheăng kâ rêh ối.

Tung kơxô̆ ki ối chĕn 41 rơtal liăn nôkố dêi Kŏng ti, tâi tâng mê xuân mung to  a hngêi rak liăn kum Pêi chiâk deăng Mơnhông thôn pơlê dêi tơring. Sap ai pơreăng COVID-19 tâ tú, Kŏng ti hiăng châ hngêi rak liăn ăm pro mơdon hơnăm tơvêh chĕn ƀă kơdroh liăn rơkâ. Tơdroăng kô ki iâ gá hiăng veăng kum Kŏng ti, mơngế ki pêi cheăng kơdroh iâ xơpá.

“Hngêi rak liăn kum pêi chiâk deăng kum ăm tíu pêi cheăng kơdroh liăn rơkâ ki tơvêh ăm hngêi rak liăn, kơdroh tâi tâng mâu liăn rơkâ ki ăm mung. Sap ing 9,5 ta troh 9% mê tâi tâng châ pơ’lêh chu ối 8,5 klêi mê 7,5 ƀă 6,5 mê xuân kơdroh iâ ki hngăm ‘na liăn rơkâ ăm tíu pêi cheăng tung 6 khế apoăng hơnăm 2021.  

Sap hơnăm 2020, hngêi rak liăn hiăng séa ngăn ƀă kơdroh troh tâi hơnăm 2021. Mê liăn rơkâ ki mê xuân kum ăm tíu pêi cheăng hên há vâ tơleăng  mơnhên tơdroăng xơpá tung pơla hdrối kô hía nah”.

Kum mâu tíu pêi cheăng dêi hngêi trung Mầm non tư thục

Pôa Lê Hồng Phong  cho ngế ki mơdró ‘no liăn mơjiâng hngêi trung Mầm non tư thục Phong Lan, a pơlê kân Quảng Phú, tơring Čư Mgar hiăng lối 10 hơnăm kố. Ing ai pơreăng COVID-19 tâ tú, ai drêng ki hngêi trung thế pơtê rak ngăn to lâi khế hlối. Nôkố rêm hâi bú tơdah 70 ngế muăn, tơ’mô ƀă 1/4 tâng vâ pơchông ƀă tơdroăng ki hmâ. 13 ngế cô hnê thế pơ’lêh dêi rơpó pơtê hnê. Hngêi trung krê pá kong, mê mâu cô pơtê hnê vâ tối, pơtê ôh tá kâ liăn khế.

Pôa Phong ăm ‘nâi: Khu mơdró dêi pôa xuân châ hngêi rak liăn kơdroh tơvêh liăn rơkâ.

“Hngêi rak liăn krếo khu mơdró ƀă kơ-êng vâ ‘nâi tơdroăng ki xơpá mê ti lâi? ƀă hnê mơhno ăm khu mơdró vêh pro hlâ mơ-eá chêh tối tơbleăng. Tơdroăng nôkố mê á vâ hngêi rak liăn pro kơdroh tâ nếo liăn rơkâ tung tâ tú pơreăng kố, ƀă pro ton khế hơnăm tơvêh liăn xiâm ki mung. Má péa nếo, tâng châ thế kum ăm hngêi trung châ mung iâ  liăn vâ ăm liăn khế kơ mâu cô ki hnê, kum ăm mâu cô ki hnê tung pơla dế tâ tú pơreăng”.

Pêi pro hnê mơhno dêi Chin phuh ƀă Hngêi rak liăn Tơnêi têa Việt Nam - Agribank Kơnhŏng Dak Lak dế tơbleăng tŏng kum ăm mơngế ki mung kơdroh liăn rơkâ mung xua tơdjâk pơreăng COVID-19

Pôa Nguyễn Quang Vinh, Ngế phŏ pơkuâ hngêi rak liăn kum pêi chiâk deăng ƀă mơnhông thôn pơlê peăng Kơnhŏng Dak Lak ăm ‘nâi:

“Tung pơla 2 hơnăm kố nah ai tâ tú pơreăng COVID mê Hngêi rak liăn Agribank Kơnhŏng Dak Lak  hiăng kum ăm mơngế ki mung tơkâ luâ xơpá ƀă ‘mâi mơnhông pêi cheăng tê mơdró, môi tiah kơ’nâi kố: Pơkâ hâi khế hơnăm tơvêh chĕn, ôh tá kơdroh liăn rơkâ ƀă lôi môi tiah mê khu chĕn ai 2 rơpâu 277 mơngế ki mung, ƀă kơxô̆ liăn ối chĕn ai 451 rơtal liăn. Ăm mung tơvêh liăn rơkâ 735 rơtal liăn, ƀă kơxô̆ liăn ăm mung ai 337 rơtal liăn, tung mê, ai 19  khu mơdró ƀă kơxô̆ liăn ăm mung 144 rơtal liăn.

Ôh tá kơdroh rơkâ ƀă mâu ngế ki mung ton nah ƀă kơlo rơkâ ki kơdroh sap 1- 3% ngăn tiô kơ ngế ki mung. Pơla khế hơnăm ai pơreăng tâ tú ta troh nôkố mê Agribank Kơnhŏng Dak Lak  hiăng pê klei hồ sơ ăm 31 rơpâu 500 ngế ki mung, ƀă kơxô̆ liăn ăm mung ai 16 rơpâu 320 rơtal liăn. Mê Agribank  peăng Kơnhŏng Dak Lak hiăng veăng kum kơdroh xơpá vâ tơniăn tung pêi cheăng kâ ƀă mơnhông cheăng kâ.

Tuấn Long chêh

Gương tơplôu ƀă tơbleăng