VOV4.Sêdang - Rôh tơ’noăng râ má pái phôh thong hơnăm 2021, lâp kong pơlê Dak Lak ai 19.800 ngế hok tro chêh inâi tơ’noăng, a 32 to tíu tơ’noăng a tâi tâng mâu tơring, pơlê kong krâm ƀă pơlê kong kơdrâm Ƀuôn Ma Thuột. Vâ tơdroăng ki ‘no on tơhrik rak vế tơniăn, tung plâ po rôh tơ’noăng, Kŏng ti on tơhrik Dak Lak tơrŭm ƀă Khu ngăn hnê hriâm ƀă khăm pơlât kong pơlê tơkŭm séa ngăn tâi tâng mâu tíu tơ’noăng, hô̆i đong tơ’noăng, mâu tíu ki in sao ko ƀai tơ’noăng ƀă châ̆m tơ’noăng.

Dak Lak: Hbrâ mâu túa pơkâ ‘no on tơhrik tơniăn ăm rôh tơ’noăng râ má pái phôh thong Tơnêi têa 2021

Ing mê, mơjiâng ƀă tơbleăng pêi pro mâu túa pơkâ mơ’no on tơhrik tơtro. Pôa Nguyễn Văn Hảo, kăn pơkuâ séa ngăn ki ‘no Kŏng ti on tơhrik Dak Lak tối, maluâ pơreăng kân COVID-19 ôh tá tơniăn, la mâu tíu pêi cheăng ki ối tung kong pơlê hiăng tơbleăng tơrŭm séa ngăn mâu troăng on tơhrik; pơkâ tơleăng mâu tíu ki ôh tá tơniăn hbrâ rơnáu hdrối xuân môi tiah mơdêk hnoăng cheăng gak mơ’no, gak pơkâ mâu tơdroăng tâng lơ ai ki ôh tá mơhúa, rak tơniăn tơbleăng tơdroăng plâ hâi plâ măng tung pơla po tơ’noăng.

Katarina Nga tơplôu ƀă tơbleăng