VOV4.Sêdang - Kơxo lơ 1/7, Khu hnê mơhno hneăng tơ’noăng mơgêi râ má pái phôh thong kong pơlê Dak Lak lăm séa ngăn tơdroăng hbrâ tơkŭm po hneăng tơ’noăng mơgêi râ má pái phôh thong a mâu tíu tơ’noăng tung pơlê kong kơdrâm Ƀuôn Ma Thuột. Hneăng tơ’noăng mơgêi râ má pái phôh thong 2021, kong pơlê Dak Lak ai 1 hô̆i đong tơ’noăng, 32 tíu tơ’noăng ƀă lối 19.800 ngế hok tro veăng tơ’noăng. Krê pơlê kong kơdrâm Ƀuôn Ma Thuột ai 9 tíu tơ’noăng.

Khu hnê mơhno hneăng tơ’noăng mơgêi râ má pái phôh thong kong pơlê Dak Lak séa ngăn tơdroăng hbrâ tơkŭm po hneăng tơ’noăng mơgêi râ má pái phôh thong a mâu tíu tơ’noăng

Troh nôkố, mâu hngêi trung hiăng pêi kêi đeăng mâu pơkâ ‘na kế tơmeăm khoăng, mâu ngế ngăn tơkŭm po tơ’noăng. Drêng pơreăng COVID 19 xông tâ tú ó, vâ tơniăn ivá ăm hok tro, kăn ƀô̆, thái cô, mâu ngế pêi cheăng, pakĭng rah hok tro hdrối hneăng tơ’noăng, mâu tíu tơ’noăng hiăng mơjiâng troăng pêi xôh pơkeăng kơdê pơreăng klêi kơ’nâi roh tơ’noăng, pro kơpong vâ khăm ngăn ki tô tung châ, tíu xếo kŏng, pâng rơkong môh ƀă ai ki vâ iâ má môi 2 kơbong tơ’noăng ki hbrâ.

Troh nôkố, kong pơlê Dak Lak tá hâi châ hlo kăn ƀô̆, mâu ngế pêi cheăng kum tung hneăng tơ’noăng lơ hok tro veăng tơ’noăng ki lâi tro thế veăng tơ’noăng roh má 2.

A Sa Ly tơplôu ƀă tơbleăng