VOV4.Sêdang -  Tung 2 hâi, lơ 17 ƀă 19/7 Dak Lak ai tơ’nôm ngế yương tĭnh ƀă SARS –CoV -2. Tô tuăn xâu ôh tá ai kế kâ tung pơla klâ kơtăn pơlê pơla tiô hnê mơhno dêi kơxô̆ 15 dêi Chin phuh, mê kuăn pơlê a mâu pơlê kong kơdrâm Ƀuôn Ma Thuột  hiăng tơxup dêi rơpó rôe tơmeăm ‘măn, pro mâu tơmeăm tê a mâu kơchơ chiâng to kơnâ yă ƀă ôh tá ai tơmeăm vâ rôe. Pôa Đoàn Ngọc Phượng, Kăn phŏ hnê ngăn Vi ƀan pơlê kong kơdrâm Ƀuôn Ma Thuột  ăm ‘nâi: pơlê kong kơdrâm xuân hiăng mơjiâng pơkâ xuá tơmeăm ƀă tê tơmeăm ki kal ăm kuăn pơlê.

Khu rak ngăn tê mơdró Dak Lak dế mơdêk séa ngăn vâ mơdât tơdroăng pro to yă tê tơmeăm vâ pro pơxúa krê tơná

Pakĭng mê, pơlê kong kơdrâm xuân hiăng hbrâ troăng hơlâ pêi pro, tơ’lêi hlâu ‘na tơmeăm tê tâng lơ ai tơdroăng ôh tá tơniăn vâ kuăn pơlê châ rôe tơmeăm, pôi tá tô tuăn ki xâu tơmeăm tê lơ ôh tá bê. Vâ ai tơmeăm tê ăm kuăn pơlê ki rôe,  Siêu thĭ Co.opmart Ƀuôn Ma Thuột hiăng pơkâ rôe ‘măn lôi mâu tơmeăm, kế kâ, tơmeăm xúa: phái, tơmeăm kâ tơdrêng hlối môi tiah xup kơxŏng khăng, xup, phơh khăng tŭm túa, tơmeăm râm kơchâi, tơmeăm tâ tung kơhôp ƀă tơmeăm kế kâ pro hngíu. Hlối rak tơniăn ai kế kâ ki ối drêh, môi tiah: Hơ’nêh, ká, kơtâ í, kơchâi, plâi, pôm tŭm túa.

Kơ koan pơkuâ kơchơ tê mơdró Dak Lak hiăng pro mơ-éa pơxâu phâk môi tíu tê tơmeăm khoăng Bách Hóa Xanh a troăng Ngô Quyền, bêng Tân An, pơlê kong kơdrâm Ƀuôn Ma Thuột xua xôi tê tơmeăm khoăng ôh tá tĕm yă ƀă tê yă kơnâ tâ yă tĕm xôi pơkâ tung rơnó pơreăng. Khu cheăng hiăng pro mơ-éa pơxâu phâk tiô pơkâ. Dế kố, a tíu tơmeăm ai hên kuăn pơlê dế rôe vâ ‘măn kơdĭng vâ hbrâ, mơdât pơreăng Covid 19, xua xâu ôh tá ai tŭm tơmeăm kâ tung pơlâ klâ kơtăn pơlê pơla tiô pơkâ 15 dêi Chin phuh. Kơ koan pơkuâ kơchơ tê mơdró kong pơlê dak Lak hiăng tơbleăng mơ-éa pơkâ mâu tíu cheăng ki tơdjâk thăm séa ngăn ôh tá lôi ai tơdroăng chô ‘măn tơmeăm khoăng, mơdêk yă ƀă mâu tơmeăm ki xúa rêm hâi.

Gương tơplôu ƀă tơbleăng