VOV4.Sêdang - Mâu khế hdrối mê hía nah, a kong pơlê Dak Lak hiăng vêh mơnhên ai 82 ngế ki krếo phôn tơ chĕn kuăn pơlê, lơ pâ thế vêh mơnhên tơdroăng ki tong xúa on tơhrik ƀă hên mâu tơdroăng ki ê. Tơdroăng ki pơtối ai mâu hneăng krếo phôn tơ chĕn liăn ngân ƀă mơnhâu tơpâ on tơhrik hiăng pro kuăn pơlê tô tuăn. Kơ koan, mâu khu râ pơkuâ hiăng tối  tơbleăng kuăn pơlê kal hbrâ kơchăng ƀă mâu ngế ki tí tăng krếo phôn hmâng lơ vâ, vâi ki mê cho khu ki lu lêa, pơloi tăng hliăng tơdroăng vâ châ xo liăn kuăn pơlê tê kơtê.

Pôa Trần Văn Nho, hngêi ối a hơlâ troăng hơlâ kơxô̆ 447 troăng Lê Duẩn, bêng Ea Tam, pơlê kong kơdrâm Ƀuôn Ma Thuột, ăm ‘nâi, khế 6 kố nah, pôa tâng ai ngế krếo ing kơxô̆ phôn hlo tơviah pâ thế nâp liăn on tơhrik lối 370 rơpâu liăn. Xua hiăng klêi nâp liăn mê pôa nhôm ai mâu ki hêak, pơloi pôa krếo ăm Tổng đài ngăn ‘na on tơhrik vâ mơnhên mê ‘nâi ki mê cho vâi hêak pơloi vâ xo liăn:

“Vâi tối rơpŏng hngêi á dế chĕn liăn on tơhrik  ƀă thế ăm liăn hdrối 16h tâng ôh vâi kô tơpâ on tơhrik troăng hngêi á. Á  kơ-êng mê nôkô nâp ti lâi vâi tối klêi hlo tin nhăn, klêi mê klik a troăng link vâ tơbleăng ăm ‘nâi mã khách hàng klêi mê kô hnê tơdroăng ki nâp liăn. A tơmiât ti mê ôh tá xê, á nhôm ai tơdroăng ki vâi vâ tong xo ki ê tung kơmăi pin.  Klêi mê a krếo hlối ăm Tổng đài ngăn ‘na on tơhrik tiô kơxô̆ 19001909 vâ tơbleăng tối tơdroăng mê, ngế kơdrâi ki cheăng a Tổng đài mê tối ki mê cho vâi vâ hêak pơloi‘’.

Mâu kơxô̆ phôn hiăng krếo ăm kuăn pơlê Dak Lak vâ hêak pơloi

Xuân tâng phôn krếo pâ liăn môi tiah mê há, pôa Trương Văn Sơn, ối a thôn 11, cheăm Hòa Phú, pơlê kong kơdrâm Ƀuôn Ma Thuột, tối:

“Rơpŏng hngêi á tối tơchoâm xuân ai khế ki ‘nâ hâi teăm nâp liăn on tơhrik, mê xuân hlo kơxô̆ phôn krếo tối pơchân thế  troh a kŏng ti nâp liăn. Klêi mê rơpŏng hngêi hiăng nâp liăn la xuân ối hlo krếo nếo, pâ liăn, hlo ai kơxô̆ ki tơviah. Rơpŏng hngêi xuân tối ăm kŏng ti, hiăng nâp liăn ti lâi lơ ối krếo, ti lâi lơ tro mâu phôn hêak pơloi ti mê’’.

Tiô tối ăm ‘nâi dêi Tíu xiâm rak ngăn tơmối dêi khu ngăn on tơhrik Miền Trung, sap khế 5 troh nôkố, a kong pơlê Dak Lak  hiăng ai 82 ngế kuăn pơlê tối ai kơxô̆ phôn tơviah krếo heâk pơloi, tối tơná cho ngế pêi cheăng dêi kơvâ ngăn ‘na on tơhrik thế ăm liăn on tơhrik; ki ‘nâ cho ngế dêi kơ koan kŏng an dé séa ngăn vâ ‘nâi tơdroăng dêi tơmối ki tong xo on tơhrik… Ngế ki krếo phôn thế nâp liăn ‘nâ hía lơ mơnhên vâ ‘nâi tơdroăng ti kô ti mê a kơmăi pro tiô troăng link pơtroh tin nhăn.

Kuăn pơlê thế hbrâ rơnáu drêng tâng kơxô̆ phôn krếo ing kơxô̆ ki tơviah

Klêi mơnhên, Kŏng ti ngăn on tơhrik Dak Lak tối mê cho mâu ki krếo heâk inâi, tung mê ai hên kơxô̆ phôn ôh tá xê a Việt Nam. Mâu rôh krếo phôn heâk pơloi kuăn pơlê mê, vâ tong xo tơdroăng a phôn vâ châ xo liăn pin tung tai khoản phôn râng kŏng, tai khoản pin a hngêi rak liăn. Hnê tối ăm kuăn pơlê thế hbrâ rơnáu, drêng hlo kơxô̆ phôn ki tơviah krếo mê cho vâi pâ liăn, thế hbrâ rơnáu ah lơ tro vâi hêak pơloi.

Pôa Hà Văn Chương, Kăn phŏ pơkuâ kŏng ti ngăn on tơhrik Dak Lak ăm ‘nâi:

“Kŏng ti ngăn on tơhrik Dak Lak hnê tối ăm mơngế ki xúa on tơhrik: má môi cho ngế ki xúa on tơhrik bú nâp liăn ing phôn ki khât  nâp a mâu ngế, khu tơkŭm ki cheăng liăn xo môi tiah hiăng hmâ nâp mâu khế hdrối mê. Má péa, mâu ngế ki xúa on thế tơtrŏng drêng tối mâu tơdroăng pơkí tơná ăm mơngế ki tơviah. Má pái, mâu tơdroăng ‘na nâp liăn on tơhrik bú tơdah xo ing bâng ki khât dêi khu ngăn on tơhrik môi tiah sap ing nah ta troh nôkố ôh tá xê nâp ing phôn râng kŏng; oh tá riân ‘na mâu ngế ki kal veăng kum dêi mơngế ki xúa kô chiâng krếo ăm Tíu xiâm rak ngăn tơmối 19001909  vâ khu ngăn on tơhrik veăng kum hnê  tối”.

Tung pơla hdrối kố nah, tơdroăng hêak pơloi ing phôn râng kŏng hiăng hlo hên hĭn a mâu kong pơlê tung lâp tơnêi tdêa. Mâu rôh krếo phôn hêak pơloi mê châ pêi pro ing ing sim sok, lơ ing mâu phần mềm tự động. Mê cho tơdroăng ki hêak pơloi vâi xúa kơmăi kơmok ki dâi nôkố ki hâi xut tah tâi mâu tơdroăng hriăn tong. Xua mê, kuăn pơlê thế mơdêk ki hbrâ rơnáu đi đo tâng lơ hlo ai kơxô̆ phôn krếo hêak pơloi vâ tơ chĕn thế rĕng krếo vâ mơnhên ngăn…, ôh tá xê to khu ki krếo pâ nâp liăn on tơhrik tá mâu hoă đơn ki ê nếo, vâ ví pôi tá ăm khu ‘mêi châ tong liăn tơmeăm khoăng.

VOV Tây Nguyên

Gương tơplôu ƀă tơbleăng