VOV4.Sêdang - Mot tung rơnó mê hngê, têa kân, rơtế ƀă tơdroăng ki đi đo séa ngăn ‘mâi rơnêu mâu troăng kơxái mơ’no on tơhrik, Kŏng ti on tơhrik Dak Lak hiăng hbrâ rơnáu kế tơmeăm, kơmăi kơmok vâ hbrâ mơdât. Tíu pêi cheăng xuân hiăng séa ngăn tâi khu ki hbrâ ví khía mơhot têa lân lu, tí tăng tŏng xo mâu ngế hliăng tiâ ai 40 ngế, rĕng pơkâ tơleăng drêng trâm tơdroăng xâu xía ‘na on tơhrik.

PC Dak Lak ‘mâi rơnêu rak tơniăn on tơhrik a mâu kơpong ki hiăng tơ’nhiê

Pôa Lê Văn, kăn ƀô̆ pơkuâ tơniăn, Kŏng ti on tơhrik Dak Lak ăm ‘nâi:

“A kong pơlê Dak Lak mê ai khía jâ kơdo apoăng rơnó, mê nếo ai mâu kơpong a mâu tơring Krông Ana, Krông Bông, Čư̆ Kuin, Krông Pač mâu hơnăm pơla hdrối kố nah hmâ tro têa lân lu, mê a mâu kơpong ki khía mơhot môi tiah Ea Súp, Ƀuôn Đôn ƀă hên ki ê, mê ngin hiăng pơkâ túa, séa ngăn tâi tâng mâu tíu ki hiăng tơ’nhiê vâ pro troăng kơxái rak tơniăn tung pơla rơnó mê khía.

Ôh ti xê to a mâu tơring ki kal, mê a tâi tâng mâu kơpong Kŏng ti on tơhrik Dak Lak hiăng ai mâu túa pơkâ ki nhên, hbrâ rơnáu mâu kế tơmeăm xuân môi tiah kuăn mơngế, pơkeăng, vâ hbrâ rơnáu kum ƀă xúa tơdrêng tâng lơ ai tơdroăng xía vâ”.

Katarina Nga tơplôu ƀă tơbleăng