VOV4.Sêdang - A pơlê kong kơdrâm Ƀuôn Ma Thuột, kong pơlê Dak lak dế nôkố, ai môi kơpong hngêi pêi cheăng ƀă kơmăi ƀă 2 tíu pêi cheăng ki kơdrâm mơngế, ai dâng 4 rơpâu ngế dế pêi cheăng. Drêng ai tơdroăng ki tâ tú dêi pơreăng COVID-19, mâu Kŏng ti, mâu hngêi kơmăi, mâu tíu cheăng hiăng ƀă dế pơkâ pêi pro hên troăng hơlâ vâ hbrâ, tơplâ, mơdât pơreăng tiô tơdroăng pơkâ thế dêi Khu xiâm pơkuâ hnê ngăn Đảng xuân môi tiah khu kăn kong pơlê vâ kring vế, rak tơniăn ăm mơngế pêi cheăng ƀă tơdroăng pêi chiâk pêi deăng, tê mơdró kâ.

Kŏng ti tơlo liăn cheăng Đông Nam Á a Kơpong hngêi pêi cheăng kơmăi Hoà Phú, pơlê kong kơdrâm Ƀuôn Ma Thuột, kong pơlê Dak Lak ai lối 600 ngế kăn ƀô̆, mơngế pêi cheăng dế pêi. Jâ Lê Thị Tuyết Hạ, Kăn phŏ pơkuâ ngăn Kŏng ti tối, tơdroăng pêi cheăng, mơdró kâ dêi khu kố hiăng pêi adrêng ƀă tơdroăng hbrâ, tơplâ, mơdât pơreăng, malối, rak vế, pêi pro tiô hnê tối 5K ‘na pơkeăng ƀă hnối pơkâ ăm tơrêm ngế kăn tôh, khu pơkuâ ngăn tơdroăng cheăng.

“Apoăng cho rak vế, pêi pro tiô pơkâ “5K” dêi khu xiâm ngăn ‘na pơkeăng ƀă khăm pơlât. Tơdrêng amê, Kŏng ti xuân hiăng pơkâ thế tâi tâng rêm ngế mot lo tung Kŏng ti kố athế tối tơbleăng dêi ivá châ chăn ăm khu ngăn ‘na pơkeăng, mot tung kơbong ki khăm ngăn tung châ, xếo pơkeăng; ăm môi khu ki vâ tơdah kuăn  pơlê ƀă xo hlá đơn vâ rĕng teăm châ ‘nâi, châ hlo mâu ngế ing kơpong hơngế hơngo mot tung kŏng ti. Pakĭng mê, ngin ối ăm thế rêm ngế ối kơtăn hơngế drêng pêi cheăng; hngêi kâ hmê xuân ăm mơngế pêi cheăng pro mơnât hding tâ tá vâ kring vế tơniăn ăm tơdroăng pôi tâ tú pơreăng, rak tơniăn ăm tơdroăng pêi cheăng”.

Kơpong ăm klâ ối krê dêi Khu mơdró kâ a hngêi kơmăi Tân An 1

Kŏng ti pêi cheăng tiô tơnó Xuân Hòa ki hmâ hâng pơklêp meăm a Hngêi kơmăi Tân An 1, bêng Tân Lợi, pơlê kong kơdrâm Ƀuôn Ma Thuột dế nôkố ai vâ chê 100 ngế pêi cheăng. Rak vế, pêi pro tơdroăng hbrâ, tơplâ mơdât, mê Kŏng ti hiăng mơjiâng kơbong ki khăm ngăn, klêi mê, ăm kuăn pơlê xếo kŏng a tíu ki mot lo; ăm mơngế gak ngăn plâ hâi măng vâ vê ngăn ki tô hngíu tung châ, pơkâ thế rêm ngế mot lo tung kŏng ti xếo pơkeăng kơdê pơreăng, hnê tối kuăn pơlê tối tơbleăng dêi ivá châ chăn tơná, hbru kum ăm kên klup rơkong - môh; mơjiâng tíu ki klâ ối  krâ ƀă hnối xôh pơkeăng tâ tá plông, hngêi trăng. Jâ Trần Thị Thanh Hoa, Kăn ƀơrô ngăn ‘na kuăn mơngế cheăng dêi Kŏng ti Xuân Hoà tối ăm ‘nâi, rêm ngế pêi cheăng dêi khu mơdró kâ xuân athế châ hnê hriâm ‘na tuá hbrâ tơplâ mơdât pơreăng, hnối hnê tối ăm dêi rơpŏng hngêi ƀă pơlê cheăm.

“Ngin hiăng thế tâi tâng mâu ngế kŏng nhân tung Kŏng ti drêng tâi chôu pêi cheăng mê athế prếo vêh a hngêi, pôi tá trâm mâ, tơpui tơno ƀă kơdrâm mơngế ki tơviah tung pơla kố, bu chiâng lo ing hngêi drêng ai tơdroăng kal khât, vâ kơ rak dêi ivá, châ chăn, pơtối pêi cheăng tơniăn”.

A pơlê kong kơdrâm Ƀuôn Ma Thuột, kong pơlê Dak Lak dế kố ai lối 100 khu mơdró kâ, cheăng a kơpong hngêi kơmăi ki tơkŭm kơdrâm mơngế, ai dâng 4 rơpâu ngế pêi cheăng.

Rêm ngế mot lo tung mâu kơpong hngêi kơmăi a pơlê kong kơdrâm Ƀuôn Ma Thuột pơrá rak vế, xếo pơkeăng a kơbong pơlât

Tiô pôa Đoàn Ngọc Thượng, Kăn phŏ hnê ngăn Vi ƀan pơlê kong kơdrâm Ƀuôn Ma Thuột tối, drêng ai pơreăng COVID-19 xông tâ tú, ki rơhêng vâ tối, pơkeăng hiăng tâ tú a mâu hngêi mơdró, hngêi pêi cheăng kơmăi tung mâu kong pơlê, pơlê kong kân tung lâp tơnêi têa, pro tơ’nhê hên kế tơmeăm, Vi ƀan hnê ngăn pơlê kong kơdrâm hiăng pơkâ thế mâu khu mơdró kâ a pơlê kong kơdrâm pơkâ hnê, thế pêi pro tơdrêng tơdroăng hbrâ, tơplâ mơdât pơreăng a kơlo ki  ó má môi. Mơjiâng khu lăm seá mơnhên ngăn tâi tâng mâu khu mơdró kâ, kơpong pêi cheăng hngêi kơmăi tâng hlo tíu ki lâi ai xôi kô pơxâu phak. Ing mê, khŏm mơ-eăm pêi cheăng hên tâ, cho rế mơnhông pêi cheăng - tê mơdró kâ, rế tơplâ mơdât pơreăng, ôh tá ăm pơtối châ tâ tú tung pơlê pơla.

“Vâ pêi pro lĕm tro hnoăng cheăng hbrâ, tơplâ, mơdât pơreăng COVID-19, tung la ngiâ, a mâu kơpong hngêi kơmăi kal athế pêi pro lĕm tro ‘na tơdroăng cheăng hnê tối vâ mâu khu mơdró kâ rak vế, pêi pro tŭm têk mâu troăng hơlâ hbrâ, tơplâ, mơdât pơreăng tro tiô tơdroăng hnê tối dêi Khu xiâm ngăn’na pơkeăng ƀă khăm pơlât. Pơkuâ rak ngăn krâu khât kơxô̆ mơngế kŏng nhân ki dế pêi cheăng tung mâu Kŏng ti. Vi ƀan hnê ngăn pơlê kong kơdrâm xuân chôa ‘lâng pơkâ thế mâu hngêi kơmăi, mâu tíu pêi cheăng kum ăm rêm ngế kâ koi, ối pơtê tâng lơ dah ai xêh tơmeăm chía hlâu; đi đo séa mơnhên ngăn mâu rơxế pơto kế tơmeăm, kuăn pơlê, malối ƀă mâu rơxế ki lo ing mâu kong pơlê, pơlê kong kân ki ai pơreăng a mâu khu mơdró kâ”.

Roh ki ai pơreăng COVID-19 xông tâ tú má 4 kố, kong pơlê Dak Lak hiăng hlo ai 5 ngế ki dương tính ƀă pơreăng SARS-CoV2, tung mê, ai 4 ngế hiăng châ pơlât prêi ƀă hiăng lo ing hngêi pơkeăng. Kong pơlê xuân hiăng ăm kuăn pơlê klâ ôí krê, ăm ôí kơtăn hơngế lối 200 ngế ki F1, ăm klâ ối a hngêi lối 20 rơpâu 500 ngế. Vâ kơdroh tơdroăng ki tâ tú pơreăng COVID-19 châ tâ tú tung pơlê pơla, sap ing mâu hâi hdrối, mâu kơ koan ki ai tơdjâk hiăng tơkŭm lăm tăng mơngế ki ôí achê ƀă mơngế ki tro tâ pơreăng, hdró kơpong ƀă xo ngăn mơheăm ki ai tơdjâk. Tơdroăng kố cho vâ kring vế tơniăn ăm tơdroăng rêh kâ ối ăm kuăn pơlê thăm rế pơtối châ rêh ối-cheăng kâ lĕm ro.

Tuấn Long chêh

Nhat Lisa tơplôu ƀă tơbleăng