VOV4.Sêdang - Mâu hâi hdrối mê hía nah, mâu tơdroăng ki pá puât tung tơdroăng test rĕng COVID-19 ƀă hbruô hlá mơ-eá âm tĭnh ăm kuăn pơlê ki prôk tơkâ luâ mâu tíu ki gak drô troăng hiăng pro hên kuăn pơlê a Dak Lak chiâng thăm rế xahpá. Vâi athế lăm tăng tíu ki vâ khăm ngăn, xo mơheăm, hên ngế ôh tá châ pro hlá mơ-eá mê athế prếo vêh ƀă tơdroăng kheá hơ’nêng. Tơdroăng rêh ối, tơdroăng pêi cheăng xuân chiâng xahpá tâi tâng.

Hdroh dêi hiâm mơdêi klêi kơ’nâi lo ing hngêi ki khăm ngăn ivá châ chăn dêi Hngêi pơkeăng pơlê kong kơdrâm Ƀuôn Ma Thuột, kong pơlê Dak lak, nâ Trần Thị Tuyết, ối a Lâm Hà, kong pơlê Lâm Đồng tối ăm ‘nâi, hâi lơ 5/7 nâ prế pú nâ kơto rơxế honđa troh a Gia Lai vâ lăm pôu dêi pú hmâ. Drêng nâ kơtâu vêh a Dak Lak vâ troh a Lâm Đồng mê ‘nâi ai tơdroăng, kong pơlê Lâm Đồng pơkâ thế rêm ngế kuăn pơlê ing tíu ê troh a kong pơlê Lâm Đồng athế châ khăm ngăn ‘na virus SARS-CoV2 la athế âm tĭnh.

Nâ thâ kơtâu troh a hngêi pơkeăng pơlê kong kơdrâm vâ test rĕng, la drêng troh a tíu ki mê hngêi pơkeăng tối pơtâng hiăng pơtê ‘na tơdroăng test ngăn. Ôh tá châ mơnhên ivá châ chăn, ôh tá ai hlá mơ-eá vâ prôk lăm, mê tơdroăng ki nâ  Tuyết tối vâ prếo dêi a hngêi thăm rế chiâng ton hâi.

“Klêi kơ’nâi 2 hâi kơtúa chư ‘na test rĕng COVID-19, kơbong khăm pơlât Đa Khoa Hoàn Hảo athế pơtê tơdroăng cheăng xua tá hâi teăm châ Khu ngăn ‘na pơkeăng kong pơlê Dak Lak ăm phep”

“Ngin dế kreăng ƀă ôh tá ‘nâi athế pro ti lâi vâ châ mot a kong pơlê Lâm Đồng. Tâng nôkố lăm ngi Plei Ku, lăm khăm ivá, châ chăn, mê athế vêh ngi klêng nếo, kơto rơxế hon đa tiah mê athế ai sap ing 15 troh 16 chôu, mê cho tơdroăng ki pá puât khât ăm kuăn pơlê. Ngin xuân pói rơhêng vâ khu râ pơkuâ pro tiah lâi athế kum ăm kuăn pơlê i tơ’lêi hlâu tâ”.

Ngoh Trần Anh Kiệt, vê rơxế kân kơtâu ing Ƀuôn Ma Thuột troh a pơlê kong kân Hồ Chí Minh athế vêh dêi ngi hngêi, athế pơtê môi pơla xua ôh tá hâi châ test dêi ivá vâ mơnhên âm tĭnh, ôh tá tro tâ pơreăng COVID-19.

“To lâi hâi hdrối xuân hmâ lăm test la hlá mơ-eá mơnhên mê hiăng tâi hâi khế, vâi thế lăm test mơheăm ‘nôi mê nếo ăm prôk, ôh tá ai hlá mơ-eá mê pin ôh tá chiâng lo lăm tíu ê, chu troh a châm vâi xuân athế prếo vêh dêi a hngêi”.

Pôa Nguyễn Ngọc Thịnh, Kăn phŏ pơkuâ hngêi pơkeăng pơlê kong kơdrâm Ƀuôn Ma Thuột tối ăm ‘nâi, xua tơdroăng pơkâ thế test rĕng COVID-19 dêi kuăn pơlê thăm rế kơdrâm ó, tung pơla mê, tơmeăm ki vâ mơnuá mơheăm dêi hngêi pơkeăng bú iâ, mê khoh ôh tá hâi teăm tŭm ‘na tơdroăng vâ mơnhên ivá châ chăn dêi kuăn pơlê, xua mê, Hngêi pơkeăng khoh pơtê tơdroăng mơnúa mơheăm.

“Nôkố athế pâ thế Khu ngăn ‘na pơkeăng rôe khu kơmăi ki vâ seá mơnhên ngăn mơheăm. Ki má péa, kal athế ‘nâi nhên hdrối kuăn mơngế ki vâ séa mơnhên ngăn mơheăm, klêi mê, hngêi pơkeăng athế ai tŭm tơmeăm, kơmăi ki vâ mơnhên. Nôkố, kơdrâm kuăn pơlê pêi cheăng kâ, mâu khu mơdró xuân kal rĕng châ seá mơnhên mơheăm”.

Rơtế ƀă Hngêi pơkeăng pơlê kong kơdrâm Ƀuôn Ma Thuột, a kong pơlê Dak lak ối ai 2 tíu nếo ki test rĕng COVID-19, mê cho Hngêi pơkeăng Nhi Đức Tâm ƀă kơbong khăm pơlât Đa Khoa Hoàn Hảo. Maluâ ti mê, xua Khu ngăn ‘na pơkeăng ƀă khăm pơlât tá hâi teăm ăm phep, mê, kơ’nâi 2 hâi kơtúa chư chêh tối pơtâng test rĕng COVID-19, péa tíu ki kố hiăng pơtê ‘na tơdroăng mơnúa ngăn têa kơhêa, têa hế.

Tiah mê, troh a chôu phut kố, Dak Lak xuân tá hâi teăm ai tŭm tơdroăng ki test rĕng COVID-19. Kuăn pơlê pói rơhêng vâ troh mâu kong pơlê ki pơkal ai hlá mơ-eá mơnhên âm tĭnh SARS-CoV2 athế tơkôm. Tơdroăng rêh ối, tíu cheăng xuân pơrá athế tơkôm ai hlá mơ-eá mơnhên ivá châ chăn.

Tiô pôa Trịnh Quang Trí, Kăn pơkuâ tíu xiâm khăm pơlât châi tamo kong pơlê Dak Lak hlá mơ-eá mơnhên klêi kơ’nâi test rĕng COVID-19 bu mơnhên môi ngế ai lơ ôh tá tâ virus a roh ki mơnuá ngăn têa kơhêa, ga ôh tá xê xêt tiah mê ton hâi tung la ngiâ. Xua ti mê kal athế pêi pro nhên khât ‘na tơdroăng ki mơnhên kuăn pơlê ing tơdroăng mơnúa rĕng vâ ‘nâi tâ tú lơ ôh tá tâ tú COVID-19 môi tiah hlá mơ-éa prôk troăng ƀă pêi pro ing tơdroăng kố xuân tâi liăn ngân, pá ăm kuăn pơlê, la ôh tá hâi châ tơniăn khât.

“Nôkố, pin pêi pro ti lâi vâ kuăn pơlê prôk troh a hngêi pơkeăng vâ tôí tơbleăng dêi ivá vâ pin ‘nâi ngế ki mo lĕm lơ châi tamo. Nôkố, tâng bu test rĕng têa kơhêa, têa hế bu tơtro ƀă mơngế vê rơxế taxi, rơxế kân ki kơtâu troăng hơngế, kal athế kum test tê kơtê ăm vâi, ôh tá xê xo liăn, pro ti mê nếo kum kuăn pơlê, nếo kum ‘na tơdroăng tơplâ mơdât pơreăng”.

Tiô pôa Nay Phi La, Kăn pơkuâ ngăn ‘na pơkeăng kong pơlê Dak Lak tối, tâng môi ngế hiăng ai pơreăng tung châ, test rĕng têa kơhêa hlo âm tĭnh, la kơ’nâi mê, ing virus ngế ki mê kô tơ’lêi tâ tú troh a mâu ngế ki ê. Xua ti mê, ‘na khoa hok, tơdroăng ki mơnhên âm tĭnh vâ lo lăm troh a mâu kong pơlê ôh tá xêt khât, xua hlá mơ-eá ki mơnhên mê bu xêt 2 troh 3 hâi tê. Tơdroăng kố tơkéa vâ tối, mơnhên ‘na tơdroăng test rĕng âm tĭnh ôh tá xêt tung tơdroăng hbrâ mơdât pơreăng COVID-19, la ga dế pro pá khât ăm kơvâ ngăn ‘na pơkeăng ƀă khăm pơlât ƀă kuăn pơlê, pro pá tơdroăng ki chơ pơto kế tơmeăm, ing mê, thăm pro pá ăm tơdroăng cheăng kâ-rêh ối a pơlê pơla.

Nam Trang chêh

Nhat Lisa tơplôu ƀă tơbleăng