VOV4.Sêdang - Kơxê lơ 7/7, hok tro a Dak Lak mot tơ’noăng môn Toăn – môn tơ'noăng má 2 dêi Hneăng tơ’noăng mơgêi râ má pái phôh thong hơnăm 2021 ƀă chôu pro ƀai 90 phut tiô troăng tơ’noăng trăk nghiê̆m. Mơgêi roh tơ’noăng mê tâi tâng mâu vâi o mơnhên ko tơ’noăng tro ivá hriâm. Roh tơ’noăng môn Toăn, hneăng tơ’noăng mơgêi râ má pái phôh thong hơnăm kố, kơxô̆ hok tro a Dak Lak veăng tơ’noăng châ lối 99,5%.

Dak Lak: Hok tro loi tơngah drêng mot tơ’noăng, phiu ro drêng mơgêi tơ’noăng môn Toăn

Ƀă tơdroăng ki hbrâ nhên, ki hên hok tro mot tơ’noăng ƀă hiâm mơno loi tơngah, hmiân tuăn ƀă mơgêi môn tơ’noăng ƀă hiâm mơno phiu ro xua ko môn Toăn hơnăm kố ôh tá pá to lâi, vâ môi tiah tiô ko tơ’noăng mơnúa dêi Khu xiâm pơkuâ hnê hriâm ƀă Hnê mơjiâng tuăn ngôa rơkê hdrối mê.

Tiô tơdroăng ing Khu hnê mơhno hneăng tơ’noăng mơgêi râ má pái phôh thong hơnăm 2021 kong pơlê Dak Lak, a tâi tâng mâu hô̆i đong tơ’noăng dêi kong pơlê, môn toăn peăng kơxê ƀă môn văn peăng kơxo, pơrá tơ’noăng tơniăn lĕm, tro tiô pơkâ.

            A Sa Ly tơplôu ƀă tơbleăng