VOV4.Sêdang - Dak Lak kal mơdêk tăng veăng tơ’noăng hbrâ rơnáu tung rôh tơ’noăng mơgêi hriâm râ má pái phôh thong hơnăm 2021, kố cho tơdroăng thế dêi pôa Nguyễn Văn Phúc, Ngế pro xiâm phŏ ngăn ‘na  hnê hriâm ƀă hnê mơjiâng tuăn ngôa rơkê a rôh pêi cheăng ƀă Khu hnê mơhno tơ’noăng mơgêi hriâm râ má pái hơnăm 2021 kong pơlê Dak Lak ‘na tơdroăng cheăng hbrâ ăm roh tơ’noăng mơgêi hriâm râ má pái a kong pơlê kơxê lơ 2/7.

Khu séa ngăn kơpong in sao ko ƀai tơ’noăng, kơpong pro phách, châm ƀai tơ’noăng ƀă tíu ‘măn tơmeăm a mâu tíu tơ’noăng tung kong pơlê. Tung mê, tơkŭm séa ngăn a mâu tíu ai krâm hok tro tơ’noăng ki pa gong cho mâu hok tro ki ôh tá plah tơ’noăng ing mâu hơnăm hdrối.

Hlo ai pơreăng COVID-19 dế tâ tú rơ-iô, Ngế pro xiâm phŏ ngăn ‘na hnê hriâm ƀă hnê mơjiâng tuăn ngôa rơkê cho pôa Nguyễn Văn Phúc tối pơchân rơtế ƀă mâu tơdroăng thế rak tơniăn, pro kơtăng, tro tiô luât pơkâ, kong pơlê Dak Lak xuân kal thế tơmâng troh pro tơniăn hbrâ mơdât pơreăng a mâu kăn ƀô̆, thái cô, mâu ngế cheăng ngăn tơ’noăng ƀă mâu hok tro tơ’noăng.

Hneăng tơ’noăng râ má pái phôh thong hơnăm kố, Dak Lak ai lối 19 rơpâu 800 ngế hok tro tơ’noăng, kong pơlê mơ’no ăm 33 tíu tơ’noăng ƀă lối 849 tíu tơ’noăng. Lối 2 rơpâu 700 ngế kăn ƀô̆ thái cô, mâu ngế cheăng kơvâ hnê hriâm, kŏng an, thái pơkeăng châ troh veăng pêi tơdroăng cheăng ngăn tơ’noăng kring gak vâ tơniăn tung mâu hâi tơ’noăng.

Gương tơplôu ƀă tơbleăng