VOV4.Sêdang - Chin phuh hiăng pơkâ kơxô̆ 63/NQ-CP ‘na mâu hnoăng cheăng, troăng hơlâ ki kal mơdêk cheăng kâ, ‘no liăn cheăng tơdjuôm ƀă tê tơmeăm ngi kong têa ê krá ton mâu khế mơ’nui hơnăm 2021 ƀă apoăng hơnăm 2022. Tơdroăng sap ing Khu tơrŭm Hngêi rak liăn Việt Nam (VNBA) ăm ‘nâi ai 16 hngêi rak liăn tê mơdró hiăng môi tuăn kơdroh liah mung khu mơdró kâ tơkâ luâ pơreăng COVID-19. Mâu khu mơdró kâ a kong pơlê Dak Lak tơmâng ngăn khât troh tơdroăng kố, xua kố cho rôh vâ vâi tơkâ luâ xơpá, ‘mâi mơnhông cheăng kâ.

Tiô tơdroăng ăm ‘nâi dêi Hngêi rak liăn Tơnêi têa kong pơlê Dak Lak: Riân troh hâi lơ 31/5/2021, mâu khu tơrŭm ăm mung liăn a kong pơlê ai tâi tâng kơxô̆ liăn chĕn tro tơdjâk xua pơreăng COVID-19 cho 15.436 rơtal liăn. Dế nôkố, mâu khu tơrŭm ăm mung liăn hiăng kơdroh liăn laih mung ăm 7.892 ngế ki mung ƀă kơxô̆ liăn chĕn ai 6.401 rơtal liăn, kơxô̆ liăn laih châ kơdroh ai 8 rơtal 814 rơtuh liăn.

Tơdroăng ki mâu hngêi rak liăn kơdroh laih ƀă mâu khu mơdró kâ, kum vâi kơdroh iâ ki xơpá. Laga, kố cho kơxô̆ liăn ki iâ.

Kăn pơkuâ môi kŏng ti mơjiâng pro, tê mơdró kơphế a tơring Krông Pač, kong pơlê Dak Lak ăm ‘nâi: nôkố kŏng ti dế chĕn hngêi rak liăn vâ chê 50 rơtal liăn. Hơnăm 2020 kŏng ti xuân châ hngêi rak liăn kơdroh liăn laih mung. La hơnăm 2021 kố, liăn laih mung xuân ối rak vế tiah hdrối.

Kuăn pơlê a Dak Lak dế tơkôm ƀă loi tơngah mâu khu tơrŭm ăm mung liăn kơdroh liăn laih mung tiô tơdroăng pơkâ thế dêi Chin phuh xuân môi tiah Hngêi rak liăn Tơnêi têa Việt Nam vâ tơkâ luâ hneăng ki ai pơreăng môi tiah nôkố

Pôa Nguyễn Hữu Hoàng Dương, Kăn pơkuâ Kŏng ti tê roê Hoàng Dương Ban Mê ăm ‘nâi: nôkố kŏng ti dế chĕn hngêi rak liăn 8 rơtal 700 rơtuh liăn, ƀă liăn liah mung 9,9%/hơnăm. Péa hơnăm vêh ngi kố tơdroăng ki mơjiâng pro tê mơdró dêi kŏng ti tro pơtê xua pơreăng COVID-19. Kế tơmeăm ôh tá châ tê, tung pơla kế tơmeăm ki roê hlo tâk, liăn laih hngêi rak liăn ôh tá kơdroh.

“Nôkố, khu mơdró kâ tá hâi hlo môi kơxô̆ ki lâi sap ing peăng hngêi rak liăn tŏng kum ăm khu mơdró kâ. Tung pơla ai pơreăng kố mê péa hơnăm kố khu mơdró kâ trâm xơpá. Kế tơmeăm ôh tá châ tê troh a kong pơlê ki ê mê xơpá khât. Rơhêng vâ hngêi rak liăn pro tơ’lêi hlâu ăm khu mơdró kâ vâ khu mơdró kâ ai ivá vâ tơkâ luâ rôh ai pơreăng kố. Rơhêng vâ hngêi rak liăn kơdroh liăn laih mung ăm kŏng ti, vâ kŏng ti mơdrếo i iâ ƀă mơdrếo liăn laih iâ mê nếo ai ivá kâi tơkâ luâ rôh nôkố”.

Agribank peăng kơnhŏng Dak Lak cho khu tơrŭm ăm mung dế tơbleăng tơdroăng kơdroh liăn laih mung ƀă ăm mung mâu kơxô̆ liăn kơjo ăm khu mơdró kâ a Dak Lak tro tơdjâk xua pơreăng COVID-19

Pôa Nguyễn Văn Sanh, kăn pơkuâ Khu pêi cheăng tơrŭm pêi chiâk deăng Thanh Bình, cheăm Dur Kmăn, tơring Krông Ana ăm ‘nâi: Rơnó xeăng tô kố nah, Khu pêi cheăng tơrŭm pêi chiâk deăng Thanh Bình hiăng tơrŭm ƀă Viê̆n hriăn ngăn ƀă Mơnhông hdrê loăng pêt Việt Nam hnê hriâm kih thuât pro phái ki lĕm hdrê Đài thơm 8 tiô pơkâ VietGAP ăm vâi krâ nhŏng o tung khu tơrŭm cheăng.

Túa pơkâ kố hiăng po troăng pêt, uâ pơliê phái pơkí, dâi lĕm. Krê pôa Sanh hiăng kok dêi mâu hlá mơ-éa mơnhên hnoăng rak xúa tơnêi ƀă kế tơmeăm dêi rơpŏng vâ mung 3 rơtal 400 rơtuh liăn pêi cheăng pêt, tê mơdró. Troh nôkố, pôa Sanh xuân môi tiah mâu ngế ki tơrŭm cheăng tung khu pêi cheăng tơrŭm châ hngêi rak liăn kơdroh liăn laih mung.

“Nôkố xơpá ‘na liăn, malối cho liăn vâ ‘no ăm tơdroăng ki tro têa lu, liăn ‘no ăm tơdroăng ki tôh kế tơmeăm, rơnêu mê kal ai liăn. ‘Na khu pêi cheăng tơrŭm mê ai mâu ngế cheăng, rơtế ƀă kăn pơkuâ athế xo dêi kế tơmeăm dêi rơpŏng hngêi tơná vâ kok mung xo liăn a hngêi rak liăn vâ mơdrếo liăn on tơhrik ƀă liăn rơnêu, liăn pêi cheăng liăn khế ăm nhŏng o.

Troh nôkố mê tá hâi ai hngêi rak liăn ki lâi kum, kơjo ‘na liăn laih mung. Rơhêng vâ tiah kố, xua pơreăng kố mê hngêi rak liăn hôm chiâng kơdroh môi iâ liăn laih”.

Tơdroăng ăm ‘nâi ‘na 16 to hngêi rak liăn tê mơdró, Khu tơrŭm Hngêi rak liăn Việt Nam (VNBA) môi tuăn kơdroh liăn laih ăm mung tŏng kum khu mơdró kâ tơkâ luâ pơreăng COVID-19. Kố cho tơdroăng ki khu mơdró kâ tơkôm, tơngah.

Lê Xuân Lãm chêh

Katarina Nga tơplôu ƀă tơbleăng