VOV4.Sêdang - Xua tơdjâk dêi pơreăng kân COVID 19, hên khế hiăng hluâ mâu khu tê mơdró ‘na rơxế pơto kế tơmeăm khoăng a Dak Lak tro kơdroh pêi lo liăn sap ing 70 – 80%, thăm nếo ôh tá châ pêi lo liăn drêng thế pơtê pêi cheăng. Drêng pá puât mê dêi khu tê mơdró, Khu pơkuâ ‘na rơxế pơto tơmeăm Dak Lak pâ thế mâu kơ koan cheăng kơdroh xo hnoăng mơhá lơ pro mơdon hâi khế chêl chĕn, nâp ƀaoh hiêm ăm mơngế pêi cheăng vâ mâu khu tê mơdró tơkâ hluâ hneăng pá puât kố.

Kŏng ti pêi cheăng tiô rơnó tê mơdró ƀă pơto chơ tơmối dêi Hải Cường (ai tíu pêi cheăng a Ƀuôn Ma Thuột) ai 8 toăng rơxế chơ tơmối ai xoăng koi kơtâu troăng pơkâ sap Dak Lak troh Hà Nội, ƀă lối 30 ngế pêi cheăng mâu ngế vê rơxế ƀă, mâu ki veăng kum cheăng tung rơxế, ngế cheăng riân ngăn liăn, khu ki xui xo ‘măn tơmeăm.

Pôa Nguyễn Hải Cường – Ngế pơkuâ Kŏng ti pêi cheăng tiô rơnó Mơdró kâ ƀă ngăn ‘na chơ tơmối Hải Cường ăm ‘nâi, xua pơreăng tâ tú hên tung lo lâi khế hdrối kô hía nah kơxô̆ tơmối to rơxế hiăng chu kơdroh hên, mâu rơxế ôh tá châ kơtâu chơ tơmối ing Dak Lak vâ prôk ngi Hà Nội ƀă chơ vêh nếo pro khu mơdró lŭp hên ‘nâng. Mơhé lŭp la kŏng ti xuân thế nâp tŭm tâi tâng mâu kơxô̆ liăn pro hnoăng mơhá, lơ liăn ƀaoh hiêm pơlê ăm mâu ngế pêi cheăng tro tiô hiăng pơkâ. Tâng ôh tá veăng tŏng kum mơni khu mơdró kô ôh tá châ pêi cheăng xếo.

“Tung pơla kố khu mơdró thế chêl a kơxô̆ ki lŭp dâng 100 rơtuh liăn môi khế. Kơxô̆ liăn ki mê tá liăn mơhá liăn khế ăm mâu ngế pêi cheăng, mung tơraih rơxế, liăn nâp hnoăng rơxế kơtâu drô troăng kân, liăn tơkâ tơvêh ăm hngêi rak liăn. Ngin pâ mâu pơ koan khu râ pơkuâ cheăng môi tiah Khu xiâm ngăn troăng prôk, khu xiâm ngăn ‘na pro hnoăng mơhá, mâu Hngêi rak liăn thế kơdroh liăn tơkâ, liăn nâp pê lo VAT, liăn nâp kơtâu drô troăng kân… bú ai tiah mê ’nôi ngin nếo kâi vâ rêh vâ troh drêng hiăng kâi mơdât pơreăng ah rơxế kô châ kơtâu nếo’’.

Xua pơreăng COVID-19 vêh tâ tú nếo, mâu khu mơdró ‘na rơxế chơ tơmối a Dak Lak thế pơtê pêi cheăng lơ pêi cheăng klêi mê pơtê

Khu ngăn rơxế ô tô Dak Lak ai 40 khu mơdró rơxế kơtâu chơ tơmối ƀă chơ tơmeăm tŭm túa. Tiô pôa Phạm Văn Mạnh - Kăn hnê ngăn khu rơxế ô tô Dak Lak, xúa pơreăng COVID-19 tâ tú nếo chiâng pro tơdjâk kân troh tơdroăng cheăng dêi mâu rơxế kơtâu chơ tơmối dêi mâu khu mơdró.

Mê cho, mâu rơxế kơtâu môi tiah rơxế chơ tơmối, rơxế bus, rơxế taxi xuân thế kơdroh rơxế kơtâu, kơxô̆ tơmối to… Kơxô̆ liăn châ xo tâng riân dêi mâu khu mơdró kơdroh sap 70-80%, tung pơla mê, tâi tâng mâu khu mơdró xuân mung liăn ing hngêi rak liăn vâ rôe rơxế chơ tơmối kơtâu. Pakĭng mê, mâu khu mơdró ối thế mơhá liăn khế ƀă liăn ôh tá ai cheăng pêi ki pơtân ăm mâu kăn ƀô̆ mâu ngế pêi cheăng; nâp liăn ƀaoh hiêm pơlê pơla, ƀaoh hiêm ôh tá ai cheăng pêi, nâp liăn tơkâ prôk luâ kông, liăn rak ‘mâi rơnêu troăng, liăn pro hnoăng mơhá tŭm túa; liăn rơkâ tơvêh ki hngêi rak liăn ƀă hên liăn ki ê.

Pôa Phạm Văn Mạnh tối, hlo ai tơdroăng xơpá ki nếo tối mê, Khu ngăn rơxế kơtâu hiăng pro hlá mơ-éa pâ mâu kơ koan khu râ pơkuâ cheăng veăng kum ăm mâu khu mơdró tung pơla dế ai pơreăng COVID-19 tâ tú rơ-iô.

“Ngin hiăng ai hlá mơ-éa pâ pơtroh ăm khu xiâm ngăn liăn ngân ƀă kơ koan pro hnoăng mơhá séa ngăn pro kơxô̆ liăn nâp hnoăng mơhá VAT ƀă mâu khu mơdró kô kơdroh 1-2% tâng vâ pơchông ƀă 10% môi tiah pơkâ hdrối nah; ‘na hngêi rak liăn ngin xuân púi vâ hngêi rak liăn hdró ‘nôi kơxô̆ liăn chĕn ôh tá riên liăn tơkâ tung pơla 12 khế dêi hơnăm 2021; ‘na tơdroăng nâp liăn ƀaoh hiêm, ngin xuân pâ thế Khu xiâm ngăn cheăng pêi mố đô̆i rong ƀă pơlê pơla tối ăm Ƀaoh hiêm kong pơlê pâ ôh tá êa nâp liăn ƀaoh hiêm ăm mơngế pêi cheăng tung pơla 1 hơnăm, ƀă kô nâp liăn la lâi khu mơdró kố châ pêi cheăng ah nếo”.

Kơxô̆ liăn châ xo dêi mâu ngế tung khu rơxế ô tô chơ tơmối dêi Dak Lak kơdroh sap 70-80% , thăm nếo ôh tá ai kơxô̆ liăn pêi lo

Pôa Lê Đình Minh - Ngế xiâm phŏ pơkuâ ngăn troăng prôk rơxế kơtâu kong pơlê Dak Lak tối, nôkố hiăng xo hlá mơ-éa krếo pâ dêi Khu ngăn rơxế ô tô Dak Lak. Khu kố kô tơkŭm mâu tơdroăng ki chêh pá mê pơtroh ăm râ kơpêng cho Vi ƀan kong pơlê ƀă mâu kơvâ cheăng ai tơdjâk troh vâ môi tuăn ƀă tơdroăng pâ kơdroh liăn nâp tơdrêng ăm mâu khu mơdró, Khu pêi cheăng tơrŭm khu rơxế chơ tơmối tung kong pơlê.

“Nôkố tiô pâ thế dêi Khu ngăn rơxế ô tô Dak Lak, Vi ƀan kong pơlê hiăng pơcháu ăm Khu ngăn ‘na liăn kong pơlê, khu ngăn cheăng pêi mô đô̆i rong ƀă pơkê pơla, Khu ngăn troăng prôk, Khu ngăn pơkeăng, Khu xiâm ngăn ‘na pro hnoăng mơhá kong pơlê, Hngêi rak liăn, Khu ngăn ‘na ƀaoh hiêm… tơkŭm tí tăng ‘nâi plĕng tăng troăng hơlâ hnê mơhno dêi Tíu xiâm ƀă tơdroăng ki dế hlo pá puât a kong pơlê vâ tăng troăng hơlâ tŏng kum mâu khu mơdró ô tô chơ tơmối tung pơla dế pơtê cheăng xâu hbrâ mơdât pơreăng COVID-19 tơkâ luâ mâu rôh ki xơpá nôkố. Drêng hiăng môi tuăn dêi rơpó tơdroăng tơkêa mê kô pơtroh ăm Vi ƀan kong pơlê tơleăng mơnhên tro tiô luât hiăng pơkâ’’.

Tuấn Long chêh            

Gương tơplôu ƀă tơbleăng