VOV4.Sêdang - Tây Nguyên hiăng mot rơnó mêi, laga a mâu cheăm ối tung tơring tơkăng kong Ea Súp, kong pơlê Dak Lak hên hâi hiăng hluâ ôh tá ai mêi pro chiâng khăng khoăng ó. Kong prâi ôh tá tơniăn pro lối 9 rơpâu ha loăng plâi iâ hâi môi tiah báu, alâi, pôm loăng, prá tro tơdjâk, thăm nếo hên ƀăng deăng tro tơ’nhê tâi.

Dak Lak: Kong tô khăng khoăng tung dế rơnó mêi, lối 9 rơpâu ha loăng plâi tơ’lêi tơ’nhê tâi

Tiô Ƀơrô pơkuâ ‘na pêi chiâk deăng ƀă mơnhông thôn pơlê tơring Ea Súp, a tơring kố, kong prâi hơnăm kố ôh tá tơniăn, apoăng rơnó mê kong mêi hên, pơtối mê ôh tá mêi môi pơla chía ton pro chiâng khăng khoăng, pro lối 9 rơpâu ha loăng plâi tro tơdjâk, tơkŭm ki hên a péa cheăm Čư K’Ƀang ƀa Čư M’lan. Tơring hiăng thế pêi pro troăng pơkâ tŏng kum kuăn pơlê tro lŭp xua kong prâi. ‘Na ton xŏn tơring kal ai môi rơchôa têa vâ tơniăn tung pêi chiâk deăng.