VOV4.Sêdang - Mâu kong pơlê Tây Nguyên tối tơdjuôm ƀă Dak Lak tối krê hiăng mot tung rơnó mê hngê. Laga, a cheăm Ea Siên, pơlê kong krâm Ƀuôn Hồ, kong pơlê Dak Lak xuân tá hâi ai kong mê, long rơchoâ têa hiăng xiâ tâi pro vâ chê 2 rơpâu ha ƀăng tơnêi pêt hdrê loăng khăng răng ƀă lối 1.400 rơpŏng ôh tá ai têa ôu kâ hum roh.

Chêk kơphế kân rơdâ lối 1 ha dế tung hơnăm ai plâi dêi rơpŏng hngêi pôa Hứa Văn Quân, cheăm Ea Siên, pơlê krâm Ƀuôn Hồ dế trâm pá xua kong tô mơdrăng ó. Kơphế dế tung pơla drêh dêi plâi ki ‘ló gá thế ngiât lĕm la tơkâ hlá hŏn tâi tâng, plâi kơbâng khăng hlối tơruih. Pôa Hứa Văn Quân ăm ‘nâi, tâng tung pơla pái hâi la ngiâ kong pơtối ôh tá ai mêi, kơdrum loăng plâi ôh tá châ toh têa, mê kô hlâ tâi tơdroăng mê kô ai khât.

“Pơla kố môi tiah mâu hơnăm hdrối ôh tá tro kong tô mơdrăng kơphế plâi  thế kân tâ, la xua kong tô mơdrăng ó mê ôh tá kâi kân pro plâi kơphế kŭn kân tâng vâ pơchông ƀă mâu hơnăm. kong tô mơdrăng ối pro tơkâng loăng kơphế khăng hŏn, plâi kơbâng tơruih hên, thăm nếo ai hên loăng hiăng hlâ”.

Kuăn pơlê cheăm Ea Siên dế tơkôm kong mêi tơrêm chôu vâ hbrâ ví ƀă kong tô mơdrăng khăng khoăng

Môi tiah kơdrum kơphế pêt tơvât ƀă alâi lai rơdâ 1,4 ha dêi rơpŏng hngêi jâ Siu H’Niê, thôn 2B, cheăm Ea Siên, pơlê kong krâm Ƀuôn Hồ xuân dế trâm pá ƀă kong tô mơdrăng ó. Jâ Siu H’Niê tối, hơnăm nah tơnêi ki kố châ xo lối 4 tâ̆n kơphế kloăng gá, 5 tâ̆n kloăng alâi, la hơnăm kố kong tô mơdrăng pro kơphế khăng hŏn chôu tơl’êi chếo, alâi pêt tơvât tung deăng kơphế hiăng hlâ. Kơxô̆ liăn pêi lo dêi rơpŏng hngêi jâ Siu H’Niê ki hên kơnôm a 1,4 ha tơnêi kố, laga kong tô mơdrăng hiăng chôu tâi.

“Kong tô mơdrăng tiah kố alâi hlâ tâi, hơnăm nah châ xo dêi 20 rơtuh liăn hơnăm kố hlâ tâi, ‘na kơphế xuân dế hŏn hlá, tơruih plâi. A rơchôa têa hiăng xiâ tâi hlo tơnêi rơheăng. Tâng péa pái hâi nếo ôh tá ai mêi mơni plâi gá tơruih tâi. Kong tô mơdrăng ó pro lŭp kân ‘nâng”.

Hrĭng ha alâi ki nếo pêt dêi kuăn pơlê cheăm Ea Siên, pơlê kong krâm Ƀuôn Hồ tro hlâ xua ôh tá ai têa tôh

Riân dêi Vi ƀan cheăm Ea Siên ăm hlo , rơnó xeăng tô hơnăm 2021, lâp tung cheăm ai vâ chê 2.000 ha loăng plâi tŭm túa; tung mê 1.500 ha loăng plâi ton hơnăm cho kơphế, tiu, măc ca, plâi treăng ngốu; ki u ối lối 500 ha loăng plâi iâ khế mê cho: báu, alâi, prá ƀă klô̆ng trĭng.

Tiô pôa Nguyễn Quốc Cường - Kăn hnê ngăn Vi ƀan cheăm Ea Siên, tơdroăng kong tô mơdrăng tung cheăm hiăng hlo tung hên hơnăm, malối a rơnó tô mơdrăng. Laga, tơdroăng kong tô mơdrăng a tơdế rơnó mêi môi tiah nôkố iâ hlo. Pôa Cường ăm ‘nâi, xua kơnôm ing têa mŏng pá kơdâm tơnêi a cheăm oh tá ai, têa vâ hrik tôh loăng plâi ƀă xúa ôu hum roh ki hên ing péa to rơchôa Ea Mích, Ea Blang ƀă mâu long, têa plông kŭn.

Tơdroăng hâi hlo ai mêi kân mê chiâng pro mâu rơchôa, mâu long lơ mâu têa long chiâng ôh tá châ hdoăng hên hiăng rĕng xiâ. Thăm nếo, mâu rơchôa long têa ƀă long Ea Mích ƀă Ea Blang tung hên hơnăm hdrối nah hâi châ kui tah trâp, ‘mai rơnêu hdoăng têa ôh tá châ tơxâng ƀă ki vê hdró apoăng chiâng pro khăng khoăng ó tâ.

Khăng khoăng ôh tá xê to pro lŭp vâ chê 2.000ha loăng plâi, mê ối bro lối 7.500 pơ’leăng mơngế tung cheăm ôh tá ai têa vâ xuá.

“Kong tô mơdrăng a cheăm kố hiăng pro xơpá ăm tá tơdroăng vâ tôh loăng plâi pêt ƀă têa vâ ôu kâ rêm hâi. ‘Na têa xúa ôu kâ rêm hâi mê Vi ƀan hnê ngăn cheăm hiăng tối tơbleăng ăm pơlê kong krâm Ƀuôn Hồ mơjiâng tíu hdoăng têa tơchoâm hrik ing long Krông Ƀuk Hạ troh a tíu hdoăng têa a thôn 2A vâ ai têa mơ’no ăm kuăn pơlê a mâu thôn pơlê; ‘na têa tôh ăm loăng plâi mê cheăm xuân hiăng pơtroh mâu troăng rơhlâ thế kui tah trâp, ‘mâi rơnêu  pro, lơ pro lĕm nếo péa to rơchôa Ea Mích ƀă Ea Blang tâng ôh kâng pro tơ’nôm rơchôa ki ê vâ ai têa tôh loăng plâi ăm kuăn pơlê tung cheăm”.

Kong tô mơdrăng  a tơdế rơnó mêi hngê mơhno ăm hlo kong krâi rế ton rế ôh tá tơniăn pá vâ  tá ‘nâi hdrối a Tây Nguyên.

Tuấn Long chêh

Gương tơplôu tơbleăng