VOV4.Sêdang - Kơxo lơ 11/6, a cheăm Ea Uy, tơring Krông Pač, Khu pơkuâ cheăng Đoân droh rơtăm Dak Lak tơkŭm po leh lo lăm pêi cheăng droh rơtăm pleăng hnoăng cheăng hơnăm 2021 ƀă hên tơdroăng pêi ki pơxúa xua pơlê pơla. Leh lo lăm pêi cheăng dêi droh rơtăm pleăng hnoăng cheăng rơnó pơtê hriâm kong pơlê Dak Lak hơnăm 2021 châ tơkŭm po ƀă mâu tơdroăng pêi môi tiah: pơxiâm mơjiâng pro 1 toăng hngêi tuăn pâ ƀă môi plông peăng ƀa long, mơjiâng pro 1 km troăng on tơhrik bâ troăng pơlê; diâp 30 kơxuô tơmeăm ăm mâu rơpŏng ai hnoăng tơnêi têa ai tơdroăng rêh ối pá puât; pơtâng tối hbrâ mơdât COVID 19.

Khu pơkuâ ngăn Đoân droh rơtăm Dak Lak pơxiâm lo pêi hnoăng cheăng a mâu pơlê cheăm

Ngoh Y Lê Pas Tơr, Kăn phŏ pơkuâ Đoân droh rơtăm kong pơlê Dak Lak tối ăm ‘nâi, rơtế ƀă mâu tơdroăng pêi cheăng veăng mơnhông cheăng kâ – rêh ối pơlê pơla; mơjiâng thôn pơlê nếo, kơchơ tê mơdró rơkê; mâu tơdroăng pêi cheăng dêi rơxông ối nếo kong pơlê Dak Lak tung tơdroăng pêi cheăng rơnó pơtê hriâm hơnăm kố kô tơkŭm po tŏng kum ăm đoân viên - droh rơtăm tơkâ hluâ pá puât xua tơdjâk dêi pơreăng, pơtối mơnhông mơdêk tơdroăng tăng cheăng pêi tung đoân viên droh rơtăm a kong pơlê.

A Sa Ly tơplôu ƀă tơbleăng