VOV4.Sêdang - Vâ tơniăn ăm tơdroăng krí xo, uâ mơdiê [a\ tê kơphế châ tơ-[rê, kơdroh krí kơphế ki ối drêh, ối kơbâng; mơdêk pêi lo liăn, hơ’lêh tơdroăng rêh ối kuăn pơlê [a\ kum kêi đeăng mâu pơkâ mơnhông cheăng kâ - rêh ối pơlê pơla dêi kong pơlê, Kăn hnê ngăn Vi [an kong pơlê Dak Lak nếo ai pơkâ ‘na tơdroăng krí xo, uâ mơdiê [a\ tê kơphế rơnó pơla hơnăm 2018 – 2019.

Tiah mê, Kăn hnê ngăn Vi [an kong pơlê Dak Lak pơkâ mâu tơring, pơlê kong krâm, pơlê kong kơdrâm hnê mơhno pơkâ [a\ thăm gâk ngăn kơtăng [a\ng deăng kơphế hbrâ vâ krí xo; thăm pơtâng tối, mơhnhôk mâu khu tơru\m cheăng, rêm ngế ôh tá krí plâi ối drêh, ối kơbâng, rak tơniăn kơphế tum châ lối 95%; tâng krí thế tum ki vâ iâ châ 80%; tơdrêng amê ai túa pơxâu phak kơtăng [a\ mâu ngế krí, roê kơphế ối drêh, ối kơbâng.

Mâu khu, kơvâ cheăng, tơring [a\ khu tơru\m cheăng, rêm ngế ki pêt, uâ mơdiê, tê kơphế tung kong pơlê po rơdâ châ tơ-[rê tiô pơkâ, tơdroăng tơkêa mơnhông pêi kơphế krá tơniăn.

Mâu kơvâ tơru\m thăm séa ngăn, teăm tơdrêng châ hlo, pơxâu phâk mâu ngế ki lu lêa tung tê mơdró, rôe, uâ mơdiê, tê rôe kơphế.

A Sa Ly tơplôu [ă tơbleăng