VOV4.Sêdang - Hlo ôh tá tơniăn dêi pơreăng COVID-19, Vi ƀan hnê ngăn kong pơlê Dak Lak nếo pơkâ hlá mơ-éa pơtê pơtân mâu tơdroăng ki tơkŭm hnê hriâm ƀă tơdroăng cheăng pêi pro tung rơnó pơtê hriâm vâ hbrâ mơdât pơreăng. Tiah mê, sap ing hâi lơ 10/7/2021, Dak Lak kô pơtê pơtân mâu tơdroăng ki hnê hriâm ƀă tơdroăng cheăng pêi pro tung pơla pơtê hriâm tiô tơdroăng ki pêi tơkŭm, tơdrêng a mâu tíu ki hnê hriâm, hnê cheăng pêi a kong pơlê tá troh drêng ai tơbleăng nếo.

Chôu hriâm klê têa ăm hok tro a kong pơlê Dak Lak

Hlá mơ-éa châ pơkâ drêng nôkố Dak Lak hiăng ai 7 ngế tâ COVID-19 ƀă mâu kong pơlê ki achê: Phú Yên, Lâm Đồng, Khánh Hòa ƀă kong pơlê ki ê tơdroăng ôh tá tơniăn dêi pơreăng. Tơdroăng ki pơtê pơtân mâu tơdroăng hnê hriâm ƀă pêi pro mâu tơdroăng cheăng a rơnó pơtê hriâm tiô tơdroăng ki tơkŭm châ ngăn cho troăng hơlâ rak tơniăn ivá ăm mâu khu ki hnê hriâm ƀă mâu ngế ki hriâm a mâu tíu ki hnê hriâm a kong pơlê.

Katarina Nga tơplôu ƀă tơbleăng