VOV4.Sêdang - Rôh tơ’noăng râ má pái trung hok phôh thong hơnăm 2021, Dak Lak ai lối 19.800 ngế chêh inâi tơ’noăng a 32 tíu tơ’noăng, ƀă lối 830 to lâm tơ’noăng. Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Lak mơhnhôk 2.700 ngế veăng kum tung rôh tơ’noăng. Tung mê lối 2.250 ngế kăn ƀô̆, thái cô ki ngăn tơ’noăng. Nôkố, kơvâ ngăn hnê hriâm ƀă hnê mơjiâng tuăn ngoâ rơkê dế tơbleăng túa pơkâ, hnê hriâm ăm kăn ƀô̆, thái cô, mâu ngế cheăng ki veăng kum tung rôh tơ’noăng.

Xua tơdroăng ki ôh tá tơniăn dêi pơreăng COVID-19, Vi ƀan hnê ngăn kong pơlê Dak Lak hiăng pơkâ thế Khu ngăn hnê hriâm ƀă hnê mơjiâng tuăn ngoâ rơkê séa ngăn kơtăng mâu hok tro, mâu ngế ki veăng tơkŭm po rôh tơ’noăng pêi pro kơtăng mâu tơdroăng pơkâ ‘na hbrâ mơdât pơreăng COVID-19 dêi kơvâ ngăn hnê hriâm ƀă hnê mơjiâng tuăn ngoâ rơkê hbrâ tơrŭm ƀă Khu ngăn pơkeăng ƀă khăm pơlât, Vi ƀan hnê ngăn mâu tơring, pơlê kong krâm, pơlê kong kơdrâm ƀă mâu tíu pêi cheăng ki ai tơdjâk ‘nâi nhên tơdroăng ki ôh tá tơniăn dêi pơreăng vâ tơbleăng tơkŭm po rôh tơ’noăng a kong pơlê tơtro ƀă tơdroăng ki ai khât, rak tơniăn ăm hok tro ƀă tâi tâng mâu ngế ki veăng tơkŭm po tơ’noăng.

Nga tơplôu ƀă tơbleăng