VOV4.Sêdang - Veăng hơ-ui kum ăm mơngế ki xahpá a Pơlê kong kân Hồ Chí Minh, drêng ai pơkâ mơdât mot lo, prôk lăm tiô tơdroăng pơkâ kơxô̆ 16 dêi Ngế pro xiâm hnê ngăn Chin phuh, mâu roh “Rơxế ki pơto kế tơmeăm hơ-ui kum” dêi mâu khu râ, kơvâ cheăng a kong pơlê Dak Lak hiăng lo prôk vâ pơtroh. Lối chât tâ̆n kế tơmeăm hiăng ƀă dế châ pơtroh a Pơlê kong kân peăng Hdroh, maluâ a kong pơlê Dak Lak xuân dế trâm pá xua dế tơplâ, mơdât ƀă pơreăng COVID-19.

Tâng tối dêi Khu lo tŏng veăng pơlê kong kơdrâm Ƀuôn Ma Thuột dế tơdjêp ƀă Khu pơkuâ vâi kơdrâi Kŏng an kong pơlê Dak Lak ƀă mâu khu ki tŏng kum mơngế pá puât tơkŭm po “Roh rơxế tuăn pâ’’ vâ pơto kơchâi drêh, plâi, pôm tŏng kum kuăn pơlê dêi Pơlê kong kân Hồ Chí Minh tung mâu hâi pêi pro klâ kơtăn lâp pơlê pơla, nâ Lê Thị Thanh Tâm, ngế pơkuâ tíu tê tơmeăm Lợi Tâm, pơlê kong kơdrâm Ƀuôn Ma Thuột hiăng thâ tơpui ƀă pú hmâ vâ rơtế lăm tŏng kum.

Nâ Tâm tối: ngăn Sài Gòn lĕm mơdrŏng krip ‘nâng mê chiâng ôh tá pá hro xua pơreăng, nâ tâ plâi nuih nâ tơmiât vâ tŏng kum:

“Hlo Pơlê kong kân Hồ Chí Minh dế trâm pá xua mê á tơrŭm ƀă Khu lo tŏng veăng vâ kum kuăn pơlê a Pơlê kong kân Hồ Chí Minh tơkâ hluâ rơnó pơreăng xông tâ tú pá puât kố. Pói tơngah Pơlê kong kân Hồ Chí Minh rĕng tơkâ hluâ pơreăng xông tâ tú kố vâ vêh rêh ối tơniăn lĕm’’.

Roh rơxế pơto kơchâi drêh djâ tơdroăng tuăn pâ dêi mơngế Dak Lak mot a pơlê kong kân inâi Pôa

Nâ Tống Thị Tươi ối a bêng Tân Lợi, pơlê kong kơdrâm Ƀuôn Ma Thuột - ngế ki veăng hên tung tơdroăng mơhnhôk mâu ngế tŏng kum mơngế pá puât rơtế ƀă mâu “Roh rơxế tuăn pâ” tơdjêp Dak Lak ƀă Pơlê kong kân Hồ Chí Minh pơrá châ khu kŏng an kong pơlê ƀă mâu ngế tŏng kum mơngế pá puât chu a tíu pêt kơchâi drêh dêi mâu kơpong pêt kơchâi drêh a Ƀuôn Ma Thuột vâ rôe. Kơxô̆ kơchâi drêh pơtroh a kơpong ai pơreăng, rế kum kuăn pơlê kong kân kơdroh ki tơvâ tơvân, rế kum châ tê kơchâi drêh tung kong pơlê Dak Lak:

“10 hâi hdrối mê á hlo pơreăng môi tiah kố vâi krâ ôh tá châ tê. Klêi kơ’nâi hlo pơreăng xông tâ tú ó a Pơlê kong kân Hồ Chí Minh ó ‘nâng mê ngoh nâ o ngin tơpui ƀă dêi pó mot amê rế kum ăm vâi krâ châ tê kơchâi drêh rế ai kơchâi drêh pơtroh mâu tíu dế kal ƀă drêng kố cho Pơlê kong kân Hồ Chí Minh dế mơ-eăm mơdât pơreăng. Roh rơxế kố cho roh rơxế má péa ƀă ngin kô ai roh rơxế má pái’’.

Rơpâu kơtâ í xuân châ pơtroh a kơpong ai pơreăng xông tâ tú ó

Jâ Nguyễn Thị Lý, Kăn phŏ hnê ngăn Khu lo tŏng veăng pơlê kong kơdrâm Ƀuôn Ma Thuột tối ăm ‘nâi, klêi kơ’nâi Khu lo tŏng veăng pơlê kong kơdrâm tơrŭm ƀă Khu pơkuâ vâi kơdrâi Kŏng an kong pơlê Dak Lak tơkŭm po tơdroăng “Roh rơxế tuăn pâ” troh tŏng kum kơpong ai pơreăng xông tâ tú ó, péa tíu cheăng hiăng tơdah tơdroăng tŏng kum hên ing mâu ngế tŏng kum mơngế pá puât.  

Troh nôkố, tơdroăng “Roh rơxế tuăn pâ” hiăng pơto vâ chê 50 tâ̆n kơchâi drêh, plâi pôm, rơpâu kơtâ í ƀă kơphế pơtroh a pơlê kong kân Hồ Chí Minh, ƀă tâi tâng kơxô̆ liăn vâ chê 400 rơtuh liăn. Tơdroăng tơniăn ăm mâu ngế vê rơxế tung tơdroăng pơto kơchâi drêh xuân châ tơtrŏng, tơniăn hbrâ mơdât pơreăng.

“Vâ tơniăn ăm ngế vê rơxế prôk ƀă troh kơpong ai pơreăng mê Khu lo tŏng veăng pơlê kong kơdrâm tơrŭm ƀă tíu xiâm khăm pơlât pơlê kong kơdrâm khăm ngăn rĕng ăm mơngế vê rơxế. Klêi kơ’nâi mâu ngế vê rơxế prôk ing pơlê kong kân Hồ Chí Minh troh a tíu xiâm khăm pơlât pơtối khăm ngăn rĕng ăm mâu ngế vê rơxế vâ mâu ngế vê rơxế hmiân tuăn mot tung tơdroăng rêh ối tiah hmâ’’.

Drêng mâu hâi lâp tơnêi têa, ki má lối cho Pơlê kong kân Hồ Chí Minh, dế mơ-eăm hbrâ mơdât pơreăng, mâu roh pơto tơmeăm tuăn pâ dêi Dak Lak ôh tá xê tơdroăng tŏng kum kế tơmeăm khoăng. Mê cho hiâm mơno kum dêi pó, cho rơkong tơpui rơtế môi hiâm mơno tơkâ hluâ pá puât, troh tah pơreăng.

Nam Trang chêh

A Sa Ly tơplôu ƀă tơbleăng