VOV4.Sêdang -  Kơxê lơ 16/6, a pơlê kong kơdrâm Ƀuôn Ma Thuột, Vi ƀan Măt trâ̆n Tơnêi têa Việt Nam kong pơlê Dak Lak pơtối tơkŭm po tơdah tơ’nôm 1 rơtal liăn dêi mâu khu tơrŭm cheăng, ngế krê tung kong pơlê Dak Lak veăng tơlo liăn rôe vaccine ƀă mâu tơmeăm khăm pơlât hbrâ mơdât COVID 19. Pơtối mê, kăn teăng mâ Vi ƀan pơlê kong kơdrâm Ƀuôn Ma Thuột hiăng diâp ăm kơxô̆ liăn 500 rơtuh liăn; Kŏng ti on tơhrik Dak Lak diâp ăm lối 350 rơtuh liăn; mâu khu tê mơdró a pơlê kong kơdrâm Ƀuôn Ma Thuột xuân diâp ăm kơxô̆ liăn vâ chê 200 rơtuh liăn.

Ngế teăng mâ Kŏng ti on tơhrik Dak Lak diâp 355 rơtuh liăn ăm kăn teăng mâ Viƀan Măt trâ̆n Tơnêi têa Việt Nam kong pơlê Dak Lak

Tâi tâng kơxô̆ liăn ki Vi ƀan Măt trâ̆n Tơnêi têa Việt Nam kong pơlê Dak Lak tơdah kơxê kố cho 1 rơtal liăn. Klêi kơ’nâi tơdah, Vi ƀan Măt trâ̆n Tơnêi têa Việt Nam kong pơlê Dak Lak hiăng pơtroh tâi tâng ‘na kơxô̆ liăn rôe vaccine tơnêi têa kum ăm tơdroăng rôe vaccine ƀă tơmeăm khăm pơlât hbrâ mơdât pơreăng COVID 19.

Tiah mê, xêo troh nôkố klêi kơ’nâi lối môi măng tĭng môi tuăn rơkong krếo dêi Vi ƀan Măt trâ̆n Tơnêi têa Việt Nam ‘na tơdroăng veăng tơlo liăn rôe vaccine ƀă kế tơmeăm khăm pơlât hbrâ mơdât pơreăng COVID 19 hiăng ai chât khu pú hên, ngế krê a Dak Lak veăng tơlo liăn tâk troh vâ chê 7 rơtal liăn.

A Sa Ly tơplôu ƀă tơbleăng