VOV4.Sêdang - Kong pơlê Dak Lak dế pêi pro tơdroăng “Kum rơnó tơ’noăng” a 32 tíu tơ’noăng mơgêi râ má pái phôh thong hơnăm 2021, ƀă vâ chê 1 rơpâu ngế droh rơtăm pleăng hnoăng cheăng veăng. Tiô Khu pơkuâ Đoân droh rơtăm Dak Lak, tơdroăng tŏng kum rơnó tơ’noăng hơnăm kố châ pêi pro tung pơla kong pơlê ai ngế dương tĭnh ƀă SARS-CoV2. Xua mê, mâu ngế ki pleăng hnoăng cheăng kô tơkŭm tŏng kum mơgrúa, xôh pơkeăng kơdê pơreăng a mâu tíu tơ’noăng, pơtâng tối pơkâ tơ’noăng, pơkâ ‘na hbrâ mơdât COVID 19 ƀă mâu tơdroăng hok tro kal tơtrŏng.

Dak Lak ai vâ chê 1 rơpâu ngế droh rơtăm pleăng hnoăng cheăng veăng kum rơnó tơ’noăng hơnăm 2021

Pakĭng mê, môi tiah rêm hơnăm, mâu ngế ki pleăng hnoăng cheăng pơtối séa ngăn inâi hok tro pá puât vâ kơbông krếo, mơhnhôk tŏng kum. Ki rơhêng vâ tối, trang tơdroăng tŏng kum rơnó tơ’noăng – Dak Lak tung măng pơlê pơla Facebook hiăng mơhno mâ ƀă tơ’nôm đi đo tơdroăng ‘na tơ’noăng kum nôu pâ hok tro ƀă hok tro ‘nâi tơdroăng rĕng má môi ƀă tơtro má môi.

A Sa Ly tơplôu ƀă tơbleăng