VOV4.Sêdang - Ƀă tơdroăng tơdjuôm ivá dêi hên khu tơrŭm cheăng, khu râ ƀă mâu ngế krê, tung mâu hâi hiăng hluâ, Vi ƀan Măt trâ̆n tơnêi têa Việt Nam kong pơlê Dak Lak hiăng mơhnhôk châ vâ chê 200 tâ̆n kơchâi drêh, plâi, pôm tŭm túa kum ăm Pơlê kong kân Hồ Chí Minh vâ veăng pơtroh kuăn pơlê kơpong ai pơreăng. Ƀă tơdroăng tơdjêp ing mâu măng pơlê pơla Facebook, ôh tá xê to kuăn pơlê a Dak Lak mê mâu khu pêt kơchâi drêh plâi pôm a Lâm Đồng xuân veăng tơlo, pơtroh vâ kum vâi krâ kơpong kâng kơxái ôh tá ăm lo pa gong xua pơreăng COVID 19.

Mâu rơxế pơto tơmeăm ing mâu tơring djâ tơkŭm a Khu pơkuâ Đoân droh rơtăm kong pơlê

Jâ H’Kim Ƀyă, Kăn pơkuâ ‘na pơtâng tối mơhnôk kuăn pơlê kơvâ cheăng Đảng kong pơlê, Kăn hnê ngăn Vi ƀan Măt trâ̆n Tơnêi têa Việt Nam kong pơlê Dak Lak tối ăm ‘nâi, 1 măng tĭng hiăng hluâ, măt trâ̆n mâu râ tung kong pơlê hiăng mơhnhôk tơlo vâ chê 200 tâ̆n kơchâi drêh, plâi pôm. Mâu tơmeăm kố châ tơkŭm a 1 tíu vâ rah ki lĕm, rah hvât tah mâu kơchâi ki hiăng ôh tá lĕm ahdrối vâ kơxuô pơto troh a Pơlê kong kân Hồ Chí Minh.

Kơchâi drêh, plâi, pôm châ rah, mơgrúa lĕm ahdrối kơxuô vâ pơto djâ

Mâu rơxế pơto pêng kơchâi drêh plâi pôm ƀă mâu tơmeăm kâ djâ tơdroăng tuăn pâ, tơdroăng pêi ki lĕm rơtế rơkong mơhnhôk dêi kuăn pơlê Dak Lak tơdjuôm ivá rơtế lâp tơnêi têa troh tah pơreăng.

A Sa Ly tơplôu ƀă tơbleăng