VOV4.Sêdang - Hâi lơ 16/6, kơvâ ngăn pơkeăng ƀă khăm pơlât kong pơlê Dak Lak pơxiâm tơbleăng pâk vaccine hbrâ mơdât COVID-19 rôh má 2 ăm vâ chê 30 rơpâu ngế cho mâu ngế ki châ kơjo kum a kong pơlê. Rôh kố, Dak Lak tơdah xo 27.210 klŏng vaccine AstraZeneca. Mâu ngế ki châ pâk tung rôh má 2 kố tiô tối hdrối ai 29.900 ngế.

Pâk vaccine hbrâ mơdât Covid-19 a Dak Lak

Tung mê, mâu ngế ki pâk trum má 1 ai 21.787 ngế, tung mê, ai mâu ngế ki pêi cheăng ‘na hbrâ mơdât pơreăng, khu lêng, kŏng an veăng hbrâ mơdât pơreăng, mâu ngế cheăng ‘na tơ-ƀai, pơto chơ tơmối, ôm hyô; mâu ngế ki cheăng ‘na on tơhrik, têa, thái cô (mauh yăo, mần non, râ má môi); mâu ngế pêi cheăng a mâu tíu hnê hriâm, hnê cheăng pêi; mâu ngế pêi cheăng a mâu kơkoan, tíu pêi cheăng chêh pro hlá mơ-éa ki ối ƀă hên ngế (mâu Khu râ, kơvâ cheăng a pơlê kong kơdrâm Ƀuôn Ma Thuột). Mâu ngế ki pâk trum má 2 ai 8.113 ngế cheăng khăm pơlât hiăng châ pâk trum má 1. Tung rôh má 2 tơbleăng pâk vaccine hbrâ mơdât Covid-19, ôh tá pâk ăm mâu ngế ki ai pơreăng tung châ ƀă mâu ngế ki lối 65 hơnăm.

Katarina Nga tơplôu ƀă tơbleăng