VOV4.Sêang - Hlo tơdroăng COVID-19 dế tâ tú ôh tá tơniăn, kơvâ ngăn ‘na hnê hriâm ƀă hnê mơjiâng tuăn ngoâ rơkê kong pơlê Dak Lak hiăng ai mâu túa pơkâ vâ ăm 10 ngế hok tro a kong pơlê troh a Khánh Hòa tơ’noăng râ má pái phôh thong rôh má 2 hơnăm 2021. Tiô túa pơkâ dêi Khu xiâm ngăn hnê hriâm ƀă hnê mơjiâng tuăn ngoâ rơkê, rôh tơ’noăng râ má pái phôh thong rôh má 2 hơnăm 2021 kô tơkŭm po a hâi lơ 5 ƀă lơ 6/8.

Dak Lak ai 10 ngế hok tro tơ’noăng rôh má 2 (tung mê ai 1 ngế o ối tung F2, 9 ngế o tung kơpong ki klâ ối krê mơdât ôh tá ăm veăng tung rôh tơ’noăng rôh má 1). Rôh tơ’noăng má 2 kố, mâu hok tro Dak Lak kô tơ’noăng tơdjuôm a hô̆i đong tơ’noăng kong pơlê Khánh Hòa. Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Lak ăm ‘nâi, khu ki ngăn tơ’noăng hiăng ai mâu túa pơkâ xing xoăng rơxế tơdah xo, tíu ối ăm mâu vâi o hok tro tơ’noăng râ má pái phôh thong rôh má 2 vâ rak tơniăn, malối cho drêng ai pơreăng dế tâ tú ôh tá tơniăn a Dak Lak ƀă Khánh Hòa.

Katarina Nga tơplôu ƀă tơbleăng