VOV4.Sêdang - Kong pơlê Dak Lak nôkố dế xo mơheăm khăm ngăn a tíu gak mơdât pơreăng ăm mâu ngế lo ing mâu kong pơlê peăng Hdroh tơnêi têa. Pơtối mê, mâu ngế vê rơxế pơto tơmeăm, mâu ngế to rơxế ô tô krê lơ rơxế hon đa mot tung kong pơlê Dak Lak ing Pơlê kong kân Hồ Chí Minh ƀă mâu kong pơlê peăng Hdroh tơnêi têa, môi tiah: Đồng Nai, Bình Dương, Vũng Tàu, Tiền Giang kô châ xo mơheăm khăm ngăn rĕng a tíu gak mơdât pơreăng a troăng kân lăm ngi kong pơlê ki ê kơxô̆ 14 ối tung cheăm Hòa Phú, pơlê kong kơdrâm Ƀuôn Ma Thuột.

Mâu ƀok thái pơkeăng xo mơheăm vâ khăm ngăn

Tung pơla xo mơheăm khăm ngăn sap ing hâi lơ 18 troh lơ 30/6/2021, pôa Trịnh Quang Trí, Kăn pơkuâ Tíu xiâm mơdât pơreăng kong pơlê Dak Lak tối ăm ‘nâi: tơdroăng xo mơheăm khăm ngăn rĕng a tíu gak ngăn mơdât pơreăng kô kum Dak Lak hbrâ tâ tung tơdroăng hbrâ mơdât COVID 19.

A Sa Ly tơplôu ƀă tơbleăng