VOV4.Sêdang - Hâi lơ 12/7, kong pơlê Dak Nông pơtối ai nếo ngế ki yương tĭnh ƀă virus SARS-CoV-2 ki vêh ing Pơlê kong kân Hồ Chí Minh. Ngế ki má 31604 cho nâ C.T.Q, kot mâ hơnăm 1966, ối a cheăm Dak Wer, tơring Dak Rlấp, kong pơlê Dak Nông.

Tiô séa ngăn ‘na pơreăng, dâng 3 chôu kơxo lơ 8/7, nâ Q thế rơxế ki chơ pơlât mâu ngế tamo chơ kơnốu nâ cho P.T.T, kot mâ hơnăm 1962 lăm xạ trị a Hngêi pơkeăng Bình Dân (kơxô̆ 371 Điện Biên Phủ, bêng 4, pơlê krâm 3, Pơlê kong kân Hồ Chí Minh. A hngêi pơkeăng mê tŭm prếi on veăng hiăng test rĕng ƀă ăm hlo âm tính ƀă COVID-19. Troh dâng 21h hâi ki mê, nâ Q thế rơxế chơ dêi kơnốu vêh (hâi ‘nâi nhên rơxế chơ pơlât ki lâi ƀă ngế ki vê rơxế). Troh kơxo lơ 9/7, nâ Q troh a hngêi pơkeăng cheăm Dak Wer tối tơbleăng tơná ƀă châ hnê thế klâ ối krê a hngêi. Troh 23h 30phut kơmăng lơ 11/7, Tíu xiâm séa ngăn mơdât pơreăng kong pơlê Dak Nông tối nâ Q khăm ngăn hlo yương tĭnh ƀă virus SARS-CoV-2.

Mâu ngế ngăn pơkeăng ăm mâu ngế tíu ê lăm klâ krê

Tơdrêng kơmăng mê, khu ngăn pơkeăng Dak Nông hiăng djâ nâ Q lăm klâ krê, xo ngăn mơheăm, têa hé troh 10h hâi lơ 12/7 ăm hlo klêi khăm ngăn RT-PCR tối nâ Q yương tĭnh ƀă COVID-19. Tiah mê, troh kơxêi lơ 12/7, kong pơlê Dak Nông hiăng ai 3 ngế tro COVID-19, xuân to mâu ngế ki vêh ing Pơlê kong kân Hồ Chí Minh.

Klêi xo pơlât ngế ki tâ virus SARS-CoV-2  vêh ing Pơlê kong kân Hồ Chí Minh, kong pơlê Dak Nông hiăng pơkâ tơdrêng hnê tối, thế khăm ngăn mơheăm 3 hdrôh ƀă mâu ngế ki lâi vêh ing Pơlê kong kân Hồ Chí Minh, vâ mơdât pơreăng COVID-19.

Gương tơplôu ƀă tơbleăng