VOV4.Sêdang - Kơxê hâi lơ 15/7/2021, kong pơlê Dak Nông châ hlo ngế má 5 tro tâ COVID 19 cho ngế vê rơxế prôk hluâ kong pơlê. Ngế tro tâ pơreăng cho kơnốu ngế má 40.924 cho V.H.L.E, kot mâ hơnăm 1991, ối a thôn Mỹ Long, cheăm Mỹ An, tơring Chợ Mới, kong pơlê An Giang. Drêng prôk hluâ kong pơlê Dak Nông ngế ki kố thế xo mơheăm test rĕng ƀă hlo yương tĭnh ƀă virus SARS-CoV2 a 9h15’ hâi lơ 15/7/2021. Ngế tro tâ pơreăng rĕng châ kơvâ khăm pơlât xo mơheăm pơtroh Tíu xiâm mơdât pơreăng kong pơlê khăm ngăn mơnhên ƀă kih thuât RT-PCR ƀă ăm hlo yương tĭnh a 16h45’ rơtế hâi mê.

Ngế ki kố hiăng châ pơto ƀă rơxế pơto mơngế tro tâ pơreăng troh kơpong pơlât COVID 19 dêi kong pơlê. Klêi kơ’nâi châ hlo ngế tro tâ pơreăng, khu cheăng hiăng ti tăng 4 ngế ki ối achê ƀă dế tơkŭm klâ kơtăn xo mơheăm khăm ngăn. Tơdrêng amê, kơvâ khăm pơlât tơkŭm xôh pơkeăng kơdê pơreăng tâi tâng kơpong gak Cai Chanh ƀă kơpong khăm test rĕng dêi Tíu xiâm khăm pơlât tơring Dak Rlâp.

A Sa Ly tơplôu ƀă tơbleăng