VOV4.Sêdang - Pêi pro tiô rơkong krếo thế dêi Ngế pro xiâm hnê ngăn Chin phuh ‘na tơdroăng ki ăm vaccine hbrâ mơdât COVID-19 troh rêm ngế kuăn pơlê, Kŏng ti On tơhrik Dak Nông hiăng kum lối hrĭng rơtuh liăn ăm Khu ki râng liăn roê vaccine, hbrâ mơdât pơreăng COVID-19 vâ veăng kum ivá, tơdjuôm kŏng rơtế ƀă tơnêi hbrâ mơdât pơreăng ƀă vêh tung tơdroăng ki rêh ối tiah hmâ. 

Kăn pơkuâ Kŏng ti On tơhrik Dak Nông kum liăn ăm Khu râng liăn roê vaccine hbrâ mơdât COVID-19

Ƀă tơdroăng pơkâ “Tơdjuôm ivá hbrâ mơdât COVID-19”, kăn ƀô̆, kŏng nhân viên, mâu ngế pêi cheăng Kŏng ti On tơhrik Dak Nông hiăng kum lối 200 rơtuh liăn ăm Khu râng liăn roê vaccine hbrâ mơdât pơreăng COVID-19 dêi kong pơlê. Rơtế ƀă mê, Kŏng ti hiăng troh pôu, mơhnhôk hbru tơmeăm ăm Tíu xiâm ngăn pơkeăng pơlê kong kơdrâm Gia Nghĩa môi toăng kơmăi ki vê ngăn ki tôu, kơmăi ki xôh pơkeăng kơdê pơreăng ƀă lối hrĭng to kên pâng môh rơkong pơkeăng.

Tíu pêi cheăng kố hiăng hbruô ăm Tíu khăm pơlât bêng Nghĩa Tân, pơlê kong kơdrâm Gia Nghĩa 3 toăng kơmăi ki vê ngăn tôu hngíu a chê ƀă vê ngăn ƀă kŏng ƀă kên pâng môh rơkong vâ kăn ƀô̆, mâu ngế cheăng xúa tung pơla pêi pro hnoăng cheăng.

Katarina Nga tơplôu ƀă tơbleăng