VOV4.Sêdang - Riân troh hâi lơ 13/7, kong pơlê Dak Nông hiăng ai 3 ngế tâ COVID-19. Hlo tơdroăng ki pơreăng COVID-19 ôh tá tơniăn, tơpá vâ ‘nâi hdrối, mơni kô tâ tú tung lâp lu, kong pơlê Dak Nông pêi pro tơdroăng klâ krê lâp kong pơlê tiô pơkâ 15 dêi Ngế pro xiâm hnê ngăn Chin phuh pơxiâm sap ing 12 chôu măng dế hâi lơ 13/7 tá troh drêng ai hlá mơ-éa tơbleăng ki nếo.

Tiah mê, kong pơlê Dak Nông kô pơtê mâu tơdroăng ki ối tơkŭm sap ing 20 ngế tơngi klêng. Ôh tá tơkŭm sap ing 10 ngế tơngi klêng drêng ôh ti xê ối a tíu pêi cheăng, hngêi trung hriâm, hngêi pơkeăng; pơkâ thế ối kơtăn hngế 2 met a tíu ối tơdjuôm. Kơdroh rơxế prôk lăm a troăng ƀă kơxô̆ kuăn mơngế to mâu rơxế tung kong pơlê.

Hnê mơhnhôk kơdroh kơxô̆ ngế pêi cheăng a kơ koan, tíu pêi cheăng, mơdêk pêi cheăng ing măng. Ƀă mâu ngế ki vêh sap ing Pơlê kong kân Hồ Chí Minh (nôkố dế klâ krê tiô pơkâ kơxô̆ 16/CT-TTg), troh a kong pơlê: Pơkâ thế pâk xo mơheăm séa ngăn Realtime PCR a mâu tíu gak séa ngăn, klâ krê khăm pơlât tơkŭm tá troh drêng hiăng ‘nâi âm tĭnh mê pêi pro klâ krê a hngêi ƀă séa ngăn Realtime PCR tiô pơkâ dêi Khu xiâm ngăn pơkeăng.

Katarina Nga tơplôu ƀă tơbleăng