VOV4.Sêdang - Hâi lơ 20/7, Khu hnê mơhno cheăng hbrâ, tơplâ mơdẩt pơreăng a mơngế kong pơlê Dak Nông hiăng mơdât mot lo ƀă tíu pêi cheăng dêi Vi ƀan hnê ngăn cheăm Quảng Sơn, tơring Dak Glong, xua ai ngế tâ pơreăng COVID-19 troh tíu kố pêi cheăng. Ki nhên gá, tâng tơdroăng ăm ‘nâi sap ing Tíu xiâm séa ngăn châi tamo kong pơlê Dak Lak tơbleăng ‘na 1 ngế ki nếo tâ pơreăng COVID-19 a kong pơlê Dak Lak lăm chêh tối dêi ivá châ chăn a hâi lơ 13/7 ai troh a cheăm Đức Xuyên, tơring Krông Nô ƀă cheăm Quảng Sơn, tơring Dak Glong, ai ối achê ƀă mâu ngế ki cheăng tung Vi ƀan cheăm.

Tíu pêi cheăng cho Vi ƀan hnê ngăn cheăm Quảng Sơn, tơring Dak Glong pêi pro mơdât tơdroăng ki mot lo drêng ai ngế tâ COVID-19

Kong pơlê Dak Nông hiăng pơkâ thế péa to cheăm Đức Xuyên ƀă Quảng Sơn rĕng vê hdró, séa ngăn, tăng, ƀă klâ ăm ối krê tiô pơkâ ƀă mâu ngế ki ai tơdjâk, ối achê ƀă ngế ki tối a kơpêng. Kong pơlê hiăng pơkâ thế mơdât tơdrêng hlối tơdroăng ki prôk lo, mot lo troh a Vi ƀan hnê ngăn cheăm vâ rak tơniăn hnoăng cheăng hbrâ tơplâ mơdât pơreăng, rĕng séa ngăn, tăng xo mâu ngế ki ối achê, ai tơdjâk troh xua hâi lơ 13/7, ngế ki tâ COVID-19 hiăng troh a tíu pêi cheăng cho Vi ƀan hnê ngăn cheăm Quảng Sơn tơpui tơdroăng cheăng.

Katarina Nga tơplôu [ă tơbleăng