VOV4.Sêdang - Rôh tơ’noăng râ má pái pho thong hơnăm 2021, kong pơlê Dak Nông ai 7 rơpâu ngế hok tro tơ’noăng. Rơtế ƀă xing xoăng tơ’nôm mâu tíu tơ’noăng, lâm tơ’noăng, Khu ngăn hnê hriâm ƀă hnê mơjiâng tuăn ngoâ rơkê kong pơlê Dak Nông pơtroh vâ chê 1 rơpâu ngế pêi hnoăng cheăng ngăn tơ’noăng. Mê cho kăn ƀô̆, mâu ngế dêi mâu kơvâ cheăng: hnê hriâm, khu lêng, kŏng an ƀă khu ngăn pơkeăng rơtế veăng.

Dak Nông pơtroh vâ chê 1 rơpâu ngế kăn ƀô̆ ngăn tơ’noăng râ má pái phoh thong hơnăm 2021

Nôkố, kơvâ ngăn hnê hriâm ƀă hnê mơjiâng tuăn ngoâ rơkê hiăng tơbleăng tơdroăng pơkâ, hnê hriâm ăm kăn ƀô̆, thái cô, mâu ngế pêi cheăng veăng kum tung rôh tơ’noăng.Mâu ngế ki châ pro tơ’lêi hlâu má môi ‘na tíu tơ’noăng vâ kơdĭng chôu phut prôk lăm, prôk lăm hngế. A tíu tơ’noăng, hnoăng cheăng séa ngăn, xing xoăng tơdroăng ki ối kal, ‘mâi rơnêu mâu kế tơmeăm ki tơ’nhiê châ kơvâ ngăn hnê hriâm pêi pro kơtăng, rak tơniăn mâu tơdroăng pơkâ ‘na  mâu kơƀăng tăng gâk kring tơniăn rôh po tơ’noăng. Malối, xua ai pơreăng Covid-19 dế ôh tá tơniăn, Khu ngăn hnê hriâm ƀă hnê mơjiâng tuăn ngoâ rơkê Dak Nông hiăng hnê mơhno mâu tíu ki hnê hriâm rak ngăn kơtăng hok tro tơ’noăng râ má pái, mơhnhôk hok tro ƀă kuăn pơlê pôi tá lo ing kong pơlê, malối cho troh a kơpong ki ai pơreăng.

Katarina Nga tơplôu ƀă tơbleăng