VOV4.Sêdang - Hâi lơ 7/7, kong pơlê Dak Nông hiăng pro tơ’nôm péa tíu gâk a troăng kân lăm ngi kong pơlê ki ê troăng kân 14 ƀă 28 vâ séa ngăn, tối ăm ƀok thái pơkeăng hbrâ mơdât pơreăng COVID 19. Tíu gâk má 1 châ pro a troăng kân lăm ngi kong pơlê ki ê kơxô̆ 14 tơkăng ƀă kong pơlê Dak Lak. Tíu gâk má 2 châ pro a troăng lăm ngi kong pơlê ki ê troăng kân kơxô̆ 28 tơkăng ƀă kong pơlê Lâm Đồng.

Dak Nông pro tơ’nôm 2 tíu gâk séa ngăn tối tơbleăng ăm ƀok thái pơkeăng vâ hbrâ mơdât pơreăng COVID 19

Mâu tíu gâk kố ai hnoăng mơdât mâu rơxế mot a Dak Nông, vâ khăm ngăn ki tô tung châ, tơdah tơdroăng tối ăm ƀok thái pơkeăng ƀă troăng prôk dêi tơmối mot tung kong pơlê. Tâng châ hlo mâu ngế nhôm tro tâ pơreăng lơ troh kơpong pơreăng kô djâ a kơpong klâ kơtăn ƀă tơbleăng tơdrêng ăm Khu hnê mơhno hbrâ mơdât pơreăng COVID 19 kong pơlê vâ ai troăng pơxâu phâk teăm tơdrêng.

            A Sa Ly tơplôu ƀă tơbleăng