VOV4.Sêdang - Hâi lơ 30/6, Hô̆i đong kong pơlê Dak Nông hneăng má IV (hneăng hơnăm 2021 - 2026) hiăng tơkŭm po hneăng hôp má môi rah xo mâu kăn xiâm ai hnoăng dêi Hô̆i đong kuăn pơlê kong pơlê. A hneăng hôp, Vi ƀan tâ phĭu rah xo kăn kong pơlê Dak Nông hiăng tơbleăng tơdroăng rah xo ƀă mơnhên rah xo ƀă 52 ngế kăn teăng mâ hiăng châ rah xo tung Hô̆i đong kong pơlê hneăng má IV, hneăng hơnăm 2021 – 2026.

Dak Nông rah xo mâu kăn xiâm Hô̆i đong kuăn pơlê ƀă Vi ƀan kuăn pơlê hneăng hơnăm 2021 – 2026

Mâu kăn teăng mâ hiăng tâ phĭu rah xo mâu Kăn hnê ngăn, Kăn phŏ hnê ngăn Hô̆i đong kong pơlê ƀă Kăn hnê ngăn, Kăn phŏ hnê ngăn Vi ƀan kong pơlê. Klêi kơ’nâi tâ phĭu: pôa Lưu Văn Trung, Phŏ pơkuâ hnê ngăn cheăng Đảng kong pơlê, châ rah xo to pro Kăn hnê ngăn Hô̆i đong kuăn pơlê kong pơlê hneăng má IV, hneăng hơnăm 2021 – 2026.

Pôa Y Quang Ƀkrông ƀă jâ Mai Thị Xuân Trung, pơtối châ rah xo to pro Kăn phŏ hnê ngăn Hô̆i đong kong pơlê. Ƀă mâu kăn dêi Vi ƀan kong pơlê, pôa Hồ Văn Mười, Kăn phŏ pơkuâ hnê ngăn cheăng Đảng kong pơlê, Kăn pơkuâ Kŏng an kong pơlê châ rah xo to pro Kăn hnê ngăn Vi ƀan kong pơlê. Pôa Lê Trọng Yên, jâ Tôn Thị Ngọc Hạnh pơtối rak kơlŏng Kăn phŏ hnê ngăn Vi ƀan kong pơlê. Pôa Lê Văn Chiến, nếo to pro Kăn phŏ hnê ngăn Vi ƀan kong pơlê (cho Kăn pơkuâ Ƀơrô cheăng Đảng kong pơlê).

A Sa Ly tơplôu ƀă tơbleăng