VOV4.Sêdang - Hâi lơ 14/6, Khu hnê mơhno hbrâ mơdât pơreăng a mơngế kong pơlê Dak Nông pâ thế ƀă Khu pơkuâ ngăn Đảng, Vi ƀan hnê ngăn kong pơlê Dak Nông séa ngăn pro pơhôi mâu troăng hơlâ hbrâ mơdât pơreăng COVID-19 vâ pêi pro péa tơdroăng rế hbrâ mơdât pơreăng, rế mơdêk pêi cheăng kâ rêh ối pơlê pơla. Tiah mê, kong pơlê Dak Nông kô séa ngăn ăm vêh po nếo mâu tơdroăng cheăng pơto chơ tơmối sap ing kong pơlê ngi kong pơlê ki ê tiah hmâ ƀă mâu kong pơlê ki tá hâi ai ngế ki tâ pơreăng lơ ai pơreăng la hiăng luâ 14 hâi ôh tá ai ngế tâ ki nếo.

Khu ki ai tơdjâk kong pơlê Dak Nông séa ngăn vê ngăn ki tôu a tíu gâk, hbrâ mơdât pơreăng COVID-19 a Troăng kân 14

Mâu tíu tê mơdró ôu kâ ƀă hên ki ê châ vêh pêi cheăng nếo la athế pêi pro mâu tơdroăng pơkâ rak tơniăn hbrâ mơdât pơreăng, tơdroăng ki tơkŭm po mơdĭng, pơkoăng châ vêh tơkŭm po la pôi tá luâ 30 ngế. Laga, kong pơlê Dak Nông pơkâ thế mâu tơring, cheăm athế séa ngăn tơdroăng ki ôh tá tơniăn dêi pơreăng a kong pơlê, hbrâ tŭm mâu tơdroăng, rơxế ki kal vâ hbrâ mơdât ƀă mâu tơdroăng ki ôh tơniăn dêi pơreăng, tơdrêng amê hnối pơkâ thế kuăn pơlê pơtối pêi pro kơtăng tơdroăng pơkâ 5K dêi Khu xiâm ngăn pơkeăng ƀă khăm pơlât.

Katarina Nga tơplôu ƀă tơbleăng