VOV4.Sêdang - Sap ing khế 7 troh mơ’nui hơnăm kố kô ai ki vâ iâ 50% mơngế sap ing 18 hơnăm tơngi klêng châ pâk vaccine COVID 19. Kố cho tơdroăng châ Khu xiâm pơkuâ ngăn pơkeăng ƀă khăm pơlât ƀă Khu xiâm pơkuâ lêng tơbleăng a roh hôp apoăng dêi Khu hnê mơhno pêi pro tơdroăng pâk vaccine COVID 19 hơnăm 2021 – 2022 tơkŭm po a kơxo lơ 2/7 a Hà Nội.

Pơtối mê, tơdroăng pâk châ pêi pro sap ing khế 7 hơnăm kố troh khế 4 hơnăm 2022, tung mê, ki vâ iâ 50% mơngế sap ing 18 hơnăm tơngi klêng châ pâk. Tơdroăng pâk châ pâk tung lâp tơnêi têa ƀă vâ chê 19.000 tíu pâk tơniăn môi tíu ƀă tíu ki troh lăm pâk lâp lu. Tung mê, kơjo mâu kong pơlê, pơlê kong kơdrâm dế ai pơreăng, ai hên kơpong hngêi kơmăi kơmok.

Tung kong pơlê, pơlê kong kơdrâm, kơjo pâk hdrối ăm mâu ngế a kơpong dế ai pơreăng. Kố cho tơdroăng pâk ki rơdâ má môi sap ing hdrối nah troh nôkố, pôa Nguyễn Thanh Long, Ngế xiâm pơkuâ ngăn pơkeăng ƀă khăm pơlât tối ăm ‘nâi, Khu xiâm kô tơrŭm krá tơniăn ƀă Khu xiâm pơkuâ lêng ƀă mâu kong pơlê ing tơdah, pơto, rak ‘măn, xing xoăng vaccine, ki rơhêng vâ tối cho tơniăn pâk a kơlo ki hên.

A Sa Ly tơplôu ƀă tơbleăng