VOV4.Sêdang - Kong măng lơ 21/6, Tíu xiâm séa ngăn châi tamo Gia Lai tơbleăng, kong pơlê kố nếo ai 1 ngế tâ Covid-19 vêh sap ing kơpong pêi cheăng ƀă kơmăi kơmok a Bình Dương. Ki nhên gá, ngế kơnốu ki tâ COVID-19 kot mâ hơnăm 2005 cho kŏng nhân pêi cheăng a kŏng ti ki tâ kơxup kơxŏng khăng tung tơdrong a Pơlê kong kơdrâm Thủ Dầu 1, kong pơlê Bình Dương. Ngế ki kố ối a hngêi ki mung ăm kŏng nhân ối a bêng Nghĩa Hội, pơlê kong krâm Tân Uyên, kong pơlê Bình Dương ƀă vêh a thôn Yon Tok, cheăm Ia Glai, tơring Čư̆ Sê a kơxo má lơ 19/6. Kơxê tung hâi ki mê, ngế ki kố troh a Tíu xiâm ngăn pơkeăng ƀă khăm pơlât cheăm tối ki ivá ƀă châ pâk xo mơheăm séa ngăn COVID-19 xua vêh sap ing tíu ki ê mơni kô tro pơreăng. Nôkố, 24 ngế cho F1 dêi ngế ki tâ pơreăng kố hiăng châ klâ ăm ối krê tiô pơkâ. Nôkố, ngế ki kố tá hâi hlo tơngê, kơ-o ƀă dế tung tơdroăng ki klâ ối krê tơkŭm. Vi ƀan hnê ngăn kong pơlê Gia Lai ai hlá mơéa pơkâ thế mâu tơring, cheăm tung kong pơlê pơtối pêi pro kơtăng tơdroăng ki ôh tá tơniăn sap ing ngế ki vêh ing kơpong ki ai pơreăng; mơdêk hnoăng cheăng lăm pơtrui ngăn, a mâu troăng ki mot tung kong pơlê.

Katarina Nga tơplôu ƀă tơbleăng