VOV4.Sêdang - Ƀơrô Kan sát cheăng kâ (Kŏng an kong pơlê Gia Lai) tơrŭm ƀă mâu khu cheăng dêi tơring Kƀang, Gia Lai nếo châ hlo tơ’nôm 1 khu tê mơdró krê ai chât met khô̆i loăng ôh tá ‘nâi xiâm kối. Ki rơhêng vâ tối, xua khu tê mơdró ôh tá tơrŭm, xua mê, mơdon hên hâi, khu cheăng nếo tơkŭm séa ngăn hnôu ‘măn loăng. Kơxo lơ 15/7, ngế pơkuâ hnôu lôu péa, khu cheăng hiăng tơkŭm séa ngăn, châ hlo apoăng dâng 18 met khô̆i loăng ki hiăng uâ pŭm, hên túa loăng.

Gia Lai: Châ hlo lối 18 met khô̆i loăng tung hnôu khu tê mơdró a tơring Kƀang 

Klêi kơ’nâi 24 chôu tiô pơkâ, ngế pơkuâ tê mơdró ôh tá mơnhên chiâng xiâm rêi kơxô̆ loăng ƀă mơ-éa ki tơdjâk. Ki kơdrâ akố cho, drêng khu cheăng dế xêo kơxô̆ loăng, ai 7 ngế kơnốu tăng troh, tối tơdah pơtroh kơxô̆ loăng kố tung hnôu dêi khu tê mơdró Mai Hồng. Nôkố, kơvâ cheăng kŏng an kong pơlê Gia Lai ƀă Kŏng an tơring Kƀang dế pơtối séa ngăn, mơnhên roh tơdroăng. Hên kơxô̆ loăng tung roh kố hiăng châ pơto troh Tíu pêi cheăng khu gak ngăn kong tơring Kƀang tơkôm vâ pơxâu phak.

A Sa Ly tơplôu ƀă tơbleăng