VOV4.Sêdang - Mâu hngêi trung râ má pái phôh thong a kong pơlê Gia Lai hiăng pêi pro klêi vâ tơniăn ăm hneăng tơ’noăng mơgêi râ má pái phôh thong lâp tơnêi têa châ tơniăn, tung pơla dế ai pơreăng COVID-19 xông tâ tú, ki pin ôh tá ‘nâi hdrối ga tiah lâi.

A hngêi trung râ má pái Nguyễn Bỉnh Khiêm, pơlê kân Čư̆ Sê, kong pơlê Gia Lai, mâu vâi o hok tro lâm 12 dế rơbot mâu ƀai ki hiăng hriâm, ƀă pro mâu ko ƀai tơ’noăng mơnúa. Mâu thái cô dêi hngêi trung râ má pái Nguyễn Bỉnh Khiêm ối hnê ăm mâu vâi o hiâm mơno krá tơniăn vâ pro ƀai rơkê tơ’noăng châ điêm hên má môi.

Cô Trần Thị Hồng Uyên, cô ki hnê rơbot hbrâ tơ’noăng môn Ngữ Văn, hngêi trung râ má pái Nguyễn Bỉnh Khiêm ăm ‘nâi:

“Tung pơla hriâm tâp ƀă hnê mê cô ƀă hok tro ngin pêi pro kơtăng khât ‘na tơdroăng ki hbrâ mơdât pơreăng dêi pơkâ 5K, tâi tâng mâu vâi o veăng tung pơla hriâm pơrá djâ tơvế, kên pâng môh rơkong, têa kơdê pơreăng. Tung pơla ai pơreăng môi tiah dế nôkố, ki rơkê plĕng tung hriâm tâp dêi mâu vâi o xuân tro tơdjâk, xua tơdjâk dêi pơreăng sap ing hơnăm nah troh hơnăm kố, cô ƀă hok tro , hngêi trung, thái cô tơrŭm ƀă mâu khu tơrŭm pêi pro tơdroăng ki rơbot ƀai tơ’noăng kơtăng, mơhnhôk vâi nôu pâ, hnê khê̆n kuăn muăn veăng tŭm a mâu lâm rơbot tơ’noăng”.

Hok tro pêi pro kơtăng tơdroăng ki truâ kên pâng môh rơkong ƀă jíu kŏng ƀă têa kơdê pơreăng tung pơla rơbot ƀai

Rôh tơ’noăng hơnăm kố, hngêi trung râ má pái Nguyễn Bỉnh Khiêm, tơring Čư̆ Sê châ xoăng 23 to lâm tơ’noăng ƀă lối 300 ngế hok tro tơ’noăng. Tiô thái Nguyễn Hải Hà, kăn pơkuâ hngêi trung râ má pái Nguyễn Bỉnh Khiêm, klêi kơ’nâi Khu ngăn hnê hriâm ƀă hnê mơjiâng tuăn ngoâ rơkê kong pơlê Gia Lai tối tơbleăng inâi, tíu pêi cheăng hiăng xing xoăng mâu lâm tơ’noăng tơtro. Pakĭng mê, hngêi trung ối hbrâ rơnáu tŭm mâu têa jíu kŏng kơdê pơreăng, kên pâng môh rơkong, kơmăi ki vê ngăn ki tô a châ ƀă hên ki ê vâ rak tơniăn hbrâ mơdât pơreăng COVID-19 tung tơplâ rôh po tơ’noăng.

“Tâng ai hok tro ối tung F1,F2, mê athế tơbleăng ăm Khu ngăn ‘na hnê hriâm ƀă hnê mơjiâng tuăn ngoâ rơkê. Khu kô ai tơdroăng pơkâ cho tối ‘na ivá châ chăn hdrối rôh po tơ’noăng 7 hâi vâ ‘nâi tơdrêng hlối tơdroăng ki ối achê dêi hok tro, kăn ƀô̆ ngăn tơ’noăng. Kăn pơkuâ Khu ngăn hnê hriâm ƀă hnê mơjiâng tuăn ngoâ rơkê kong pơlê xuân hiăng pơcháu cho tâng ăm ai tơdroăng ki mê mâu ngế ki ối achê ƀă mâu ngế ki F0, F1 mê tíu pêi cheăng athế pôu râng dêi hnoăng cheăng, vâ pro tiah lâi rôh tơ’noăng râ má pái châ pêi pro kơtăng”.

Thái Trần Văn Lượng, kăn pơkuâ hngêi trung râ má pái Tôn Đức Thắng, tơring Đức Cơ ăm ‘nâi, rôh tơ’noăng râ má pái hơnăm kố pakĭng tơdroăng ki pêi pro kơtăng hnoăng cheăng hbrâ mơdât pơreăng ƀă rơbot mâu ƀai ki hiăng hriâm ăm hok tro, hngêi trung ối kum hok tro ki ai tơdroăng rêh ối xơpá, vâ mâu vâi o pêi pro tro rôh tơ’noăng la ngiâ.

“Hngêi trung kô po tơ’noăng râ má pái phôh thong tiô 2 tơdroăng pơkâ, tâng pơreăng a kơlo môi tiah nôkố hngêi trung kô ăm rơbot ƀai ton a hngêi trung. Mâu môn hok tro rơbot thái cô thế rah chêh hdrối hlá mơ-eá vâ hbrâ. Tâng pơreăng tâ tú rơ-iô mê thái cô kô in tâi tâng mâu tơdroăng ki rah chêh klêi mê pơtroh ăm hok tro vâ mâu hok tro rơbot ƀai tơdrêng tiô hnê mơhno dêi khu xiâm ngăn hnê hriâm ƀă hnê tuăn ngôa rơkê.

Hok tro hdroâng kuăn ngo a mâu hngêi trung ai hên, rêh ối xơpá, hngêi trung hnê mơhno thế mâu hlá mơ-eá vâ rơbot mê hngêi trung kô veăng kum liăn vâ hok tro kơdroh ki ‘no liăn ‘no in hlá mơ-eá”.

Hneăng tơ’noăng hơnăm kố lâp tung kong pơlê Gia Lai ai lối 14 rơpâu ngế hok tro chêh inâi tơ’noăng ƀă 39 điêm po tơ’noăng ƀă 17 tíu ki hbrâ a 17 tơring, pơlê kong krâm, kong kơdrâm, ƀă 616 veăng tơ’noăng. Tiô tối kô ai 1282 ngế kăn ƀô̆ ngăn tơ’noăng, 20 ngế kăn ƀô̆ séa ngăn ƀă vâ chê 500 ngế pêi tơdroăng cheăng ki ê mê cho mâu kŏng an, mâu ngế ngăn pơkeăng, mâu ngế kring gak.

Pôa Nguyễn Văn Long, Ngế phŏ pơkuâ ngăn Khu xiâm ngăn Hnê hriâm ƀă hnê  tuăn ngôa rơkê kong pơlê Gia Lai ăm ‘nâi, Khu ngăn hnê hriâm ƀă hnê tuăn ngôa rơkê Gia Lai hiăng mơjiâng troăng hơlâ tơ’noăng mơgêi râ má pái phôh thong ƀă 4 râ vâ hbrâ ví ƀă pơreăng COVID- 19. Sap nôkố troh rôh po tơ’noăng, mâu Hô̆i đong ngăn tơ’noăng râ má pái tung kong pơlê Gia Lai hbrâ troăng hơlâ ví mâu tơdroăng lơ ki kơdrâ lơ trâm vâ tơdroăng po tơniăn châ tơniăn, kơtăng, hlối tơ-ƀrê.

“Khu ngăn hnê hriâm ƀă hnê tuăn ngôa rơkê hnê mơhno ăm mâu khu pêi cheăng, mâu tíu pêi cheăng hlối tơbleăng mâu tơdroăng cheăng pêi ăm rôh tơ’noăng tro tiô pơkâ, hlối tơniăn tiô mâu tơdroăng pơkâ hbrâ mơdât pơreăng tung pơla ai pơreăng COVID-19 tâ tú rơ-iô. Tung mê ai 4 tơdroăng pêi pro tơkŭm po tơ’noăng tơdâng ƀă 4 râ dêi tơdroăng ki dế tâ pơreăng, pêi pro kơtăng tiô pơkâ 5K hdrối tơ’noăng, tung pơla tơ’noăng ƀă klêi tơ’noăng.

Khu xiâm ngăn hnê hriâm ƀă hnê tuăn ngôa rơkê xuân pơtroh hlá mơ-eá thế mâu hok tro, thái cô veăng ngăn tơ’noăng, mâu kăn ƀô̆ ngăn tơ’noăng thế tối tơbleăng tơná ăm khu ngăn pơkeăng hdrối 7 hâi vâ po tơ’noăng tơ’noăng ƀă tơbleăng tối mâu tơdroăng ‘na tíu chêh inâi tơ’noăng, mâu kơpong tơ’noăng vâ tối mơnhên.

Hoàng Qui chêh

Katarina Nga tơplôu ƀă tơbleăng