VOV4.Sêdang - Hneăng tơ’noăng hơnăm kố lâp kong pơlê Gia Lai ai lối 14 rơpâu ngế hok tro kĭ veăng tơ’noăng ƀă 39 tíu tơ’noăng khât ƀă 17 tíu tơ’noăng ki hbrâ a 17 tơring, pơlê krâm, pơlê kong kơdrâm, ƀă 616 kơbong tơ’noăng. Tiô tối hdrối kô ai 1.282 ngế kăn ƀô̆ ngăn tơ’noăng, 20 ngế kăn ƀô̆ séa ngăn ƀă vâ chê 500 ngế veăng tung tơdroăng tơ’noăng mê cho mâu khu kŏng an, ƀok thái pơkeăng, khu gak kring tơniăn.

Pôa Nguyễn Văn Long, Kăn phŏ pơkuâ hnê hriâm ƀă hnê mơjiâng tuăn ngôa rơkê kong pơlê Gia Lai tối ăm ‘nâi, Khu pơkuâ hnê hriâm ƀă hnê mơjiâng tuăn ngôa rơkê kong pơlê Gia Lai hiăng mơjiâng troăng tơ’noăng mơgêi râ má pái ƀă 4 râ vâ hbrâ mơdât pơreăng COVID 19.

Sap ing kố troh po hneăng tơ’noăng, mâu Khu ngăn tơ’noăng tung kong pơlê Gia Lai hbrâ troăng hbrâ mơdât ƀă mâu tơdroăng ki ôh tá tơniăn tá ‘nâi hdrối vâ hneăng tơ’noăng tơkŭm po tơniăn, kơtăng, châ tơƀrê má môi tung pơla ai pơreăng COVID 19 dế xông tâ tú ôh tá ‘nâi tối hdrối môi tiah nôkố.

          A Sa Ly tơplôu ƀă tơbleăng